ရန်ကုန်မြို့၊ မြောက်ဥက္ကလာပမြို့နယ်ခန်းမ၌ တပ်စွဲထားသည့်စစ်ကောင်စစ်ကောင်စီတပ်ကို အဝေးထိန်းမိုင်းများဖြင့်တိုက်ခိုက်ခဲ့ကြောင်း KMD18- မြိုပြကျီးကန်း (Crow Squad) အဖွဲ့မှတာဝန်ရှိသူကပြောသည်။
ဩဂုတ် ၁ ရက် ည ၉ နာရီခွဲခန့်တွင် စစ်ဆင်ရေးပြုလုပ်ခဲ့ခြင်းဖြစ်ပြီး နွေဦးအောင်လံ စစ်ဆင်ရေး အနေဖြင့် လုပ်ဆောင်ခဲ့ခြင်းဖြစ်ကြောင်း ယင်းအဖွဲ့ကသတင်းထုတ်ပြန်ထားသည်။
ည ၉ နာရီခွဲဝန်းကျင်တွင် မြောက်ဥက္ကလာ အဝိုင်းနှင့် မြို့နယ်ခန်းမ အနီးတွင် ဗုံးပေါက်ကွဲသံ ကျယ်လောင်စွာ ကြားရကြောင်း မြောက်ဥက္ကလာပမြို့နယ်နေ ပြည်သူတစ်ဦးကလည်း ပြောသည်။
” ည ၉ ခွဲကျော်လောက်က အဝိုင်းဘက်မှာ ဗုံးပေါက်ကွဲသံ အကျယ်ကြီး တချက်ကြားလိုက်ရတယ်။ ခဏနေတော့ မြောက်ဥက္ကလာ သန္တာထိပ်ကနေ လူနာတင်ကားသံတွေ၊ စစ်ကားတွေ ဝီစီမှုတ်ပြီး အပြင်းမောင်းသွားတဲ့ အသံတွေ ကြားလိုက်ရပါတယ်။ ပေါက်တာက အဝိုင်းထိပ်က မြို့နယ်ခန်းမနားလို့ ပြောကြတယ် ” ဟု ဒေသခံတစ်ဦးက ပြောသည်။
Public Service Announcement
အဆိုပါ ပေါက်ကွဲမှု ဖြစ်ပွားပြီးနောက် မြောက်ဥက္ကလာပမြို့နယ် မော်ကျွန်းမှတ်တိုင်အနီးနှင့် ဘုရားအနီးကြိုးတံတားတို့တွင်စစ်ကောင်စီ ပိတ်ဆို့ရှာဖွေကြောင်း ရပ်ကွက်နေပြည်သူတစ်ဦးက ပြောသည်။
ထို့အပြင်စစ်ကောင်စီဝင်များသည် မြောက်ဥက္ကလာ အဝိုင်းလမ်းဆုံ မီးပွိုင့်၊ ဆေးတက္ကသိုလ် (၂) ရှိရာ ခေမာသီလမ်းနှင့် မြောက်ဒဂုံအဆင်း မြောက်ဥက္ကလာပ ဘက်အခြမ်း ကျိန်သစ္စာရှင်ဘုရားဘက်ခြမ်းတို့တွင် လမ်းများ ပိတ်ဆို့၍ စစ်ဆေးခဲ့ကြောင်း ရန်ကုန်မြို့နေ အဌားယာဥ်မောင်း တစ်ဦးက ပြောသည်။
စစ်ကောင်စီ ဘက်မှ ပိတ်ဆို့စစ်ဆေးမှုများ လုပ်ဆောင်ခဲ့သော်လည်း အဖွဲ့သားအားလုံးဘေးကင်းကြောင်းမြို့ပြကျီးကန်းမှ တာဝန်ရှိသူတစ်ဦးကပြောသည်။
စစ်ဆင်ရေးကြောင့်စစ်ကောင်စီဘက်မှ ဒဏ်ရာရနိုင်သော်လည်း အတည်မပြုနိင်သေးကြောင်း၊ မြို့နယ်ခမ်းမသို့ ဆေးရုံကားများ လာရောက်ခဲ့သည်ဟု မြေပြင်မှ သတင်းရကြောင်း ယင်းတာဝန်ရှိသူကပြောသည်။
“ယနေ့မှာဆိုရင်ဖြင့် အကြမ်းဖက်စစ်တပ် ခေါင်းဆောင် မင်းအောင်လှိုင်က ဘီလူးရုပ်ကို မင်းသားခေါင်းစွပ် ဘုရားဒကာယောင်ယောင် ဟန်ဆောင်ကာ ပြည်သူအားလုံးကိုလိမ်ညာလှည့်စားပြီး လွတ်ငြိမ်းခွင့်တွေပေးနေပေမဲ့ အတုအယောင်ပဲဖြစ်တယ်ဆိုတာ ကျွန်တော်တိုအားလုံး နားလည်ထားပြီးဖြစ်ပါတယ်။ လုံးဝလွတ်ငြိမ်းခွင့်ကိုတော့ မိမိတိုအနေဖြင့် ဆက်လက်တိုက်ယူသွားရမှာဖြစ်ပါတယ်။ ” ဟု မြို့ပြပြောက်ကျားအဖွဲ့ အသိပေးသည်။
ထို့အပြင် ဩဂုတ် ၁ ရက် ည ၈နာရီကျော်တွင် စစ်ကောင်စီတပ်စွဲထားသည့် ရွှေပေါက္ကံ ထွေအုပ်ရုံးကို မြောက်ဥက္ကလာပမြို့နယ် ပြည်သူ့ကာကွယ်ရေးတပ်ဖွဲ့ တပ်ခွဲ ၂ ကဗုံးခွဲတိုက်ခိုက်ခဲ့ကြောင်းသတင်းထုတ်ပြန်ထားသည်။
