စစ်ကိုင်းတိုင်း၊ ဒီပဲယင်းမြို့နယ်တွင် စစ်ကောင်စီတပ်စစ်ကြောင်းကြောင့် ရွာပေါင်း ၂၀ ကျော်မှ ပြည်သူများမှာ ဘေးလါတ်ရာထွက်ပြေးတိမ်းရှောင်နေရပြီး မရကန်ရွာကို မီးရှို့ဖျက်ဆီးနေကြောင်း ဒေသတွင်းသတင်းရင်းမြစ်များက ပြောသည်။
ယနေ့ (သြဂုတ် ၂ ရက်)နံနက်ပိုင်းက ရေဦးနယ်မှ ဒီပဲယင်းအရှေ့ခြမ်းသို့ ဝင်ရောက်လာသည့် စစ်ကောင်စီ၏ ခမရ(၇၀၈)နှင့် (၇၀၂)စစ်ကြောင်းသည် မရကန်ကျေးရွာ၌ တပ်စွဲပြီး နေအိမ်များမီးရှို့ဖျက်ဆီးနေကြောင်း ရေဦးအခြေပြုPeople’s Defense Comrade ပြန်ကြားရေးတာဝန်ခံ ကိုထူးခန့်ဇော်(အမေ့သား)က ပြောသည်။
ထို့အပြင် စစ်ကောင်စီတပ်က လက်နက်ကြီးဖြင့်ပါ အနီးဝန်းကျင်ရှိ ကျေးရွာများအား ပစ်ခတ်နေကြောင်းလည်း ဒေသခံများက ပြောသည်။
“မရကန်ရွာကို မီးရှို့နေတဲ့စစ်ကြောင်းက ခုအချိန်ထိ မရကန်ရွာထဲမှာပဲ ရှိနေသေးပြီး ၎င်းရွာမှာပဲ ညအိပ်တပ်စွဲထားတယ်လို့ သတင်းရတယ်။”ဟု ဒေသတွင်းကင်းထောက်ရဲဘော်တစ်ဦးက ပြောသည်။
Public Service Announcement
မရကန်ရွာနှင့် အနီးဝန်းကျင်ရှိကျေးရွာများမှ ပြည်သူများအနေဖြင့် တိမ်းရှောင်ထားကြရန် ဒေသတွင်းတော်လှန်ရေးအင်အားစုများက သတိပေးသည်။
ဒီပဲယင်းနယ်ရှိ စစ်ရှောင်များအပြင် ရွှေဘိုမြို့နယ်ဘက်ခြမ်းမှ စစ်ရှောင်များလည်း ရောက်ရှိနေပြီး စစ်ရှောင်အလွန်များပြားနေ၍ အကူညီများလိုအပ်နေကြောင်း ဒီပဲယင်းမြို့နယ်ညီနောင်များအဖွဲ့က ပြောသည်။
စစ်ကိုင်းတိုင်းတွင် စစ်ကောင်စီတပ်က ပြီးခဲ့သည့် ဇူလိုင်တစ်လအတွင်း နေအိမ်ပေါင်း ၁,၇၅၀ ကျော် မီးရှို့ဖျက်ဆီးပြီး ပြည်သူကိုးဦး မီးရှို့သတ်ဖြတ်ခဲ့ကြောင်း အမျိုးသားညီညွတ်ရေးအစိုးရ (NUG) ပြည်ထဲရေးနှင့် လူဝင်မှုကြီးကြပ်ရေး ဝန်ကြီးဌာန၊ မီးသတ်ဦးစီးဌာနက ထုတ်ပြန်ထားသည်။
