စစ်ကောင်စီက လုံခြုံရေးများ တင်းကျပ်ထားသည့်ကြားမှ ရန်ကုန်မြို့လယ် ဆူးလေလမ်း လူကူးခုံးကျော်တံတားပေါ်တွင် တော်လှန်လူငယ်များက ရှစ်လေးလုံးလူထုအရေးတော်ပုံ (၃၅)နှစ်ပြည့် အထိမ်းအမှတ် လှုပ်ရှားမှုကို ယနေ့ (သြဂုတ် ၈) နံနက်က ပြုလုပ်ခဲ့သည်။
လူငယ်များက အကျီအနက်ပေါ်တွင် ရှစ်လေးလုံး စာသားကို ရေးသား၍ ဆူးလေ ခုံးကျော်တံတားပေါ်၌ ချိတ်ဆွဲကာ စစ်အာဏာရှင်စနစ် ဆန့်ကျင်ရေးလှုပ်ရှားမှုကို ပြုလုပ်ခဲ့ခြင်း ဖြစ်သည်။
ယင်းဆန္ဒပြလှုပ်ရှားမှုကို လူ့ဘောင်သစ်ဒီမိုကရက်တစ်ပါတီ (DPNS)နှင့် လူ့ဘောင်သစ်လူငယ် (YNS)ရဲဘော်များ ပူးပေါင်း၍ လုပ်ဆောင်ခဲ့ခြင်း ဖြစ်သည်။
‘၈’ လေးလုံးလူထုအရေးတော်ပုံ (၃၅)နှစ်ပြည့် အထိမ်းအမှတ်နေ့၌ ရန်ကုန်မြို့လယ် ဆူးလေလမ်းမ လူကူးကုန်းကျော်တံတားပေါ်တွင် စစ်အာဏာရှင်စနစ် ဆန့်ကျင်ရေးလှုပ်ရှားမှုတစ်ရပ် ကို ပြုလုပ်ခဲ့ပါသည်။ ၂၀၂၁ ဖေဖော်ဝါရီမှ ပြန်လည်စတင်ခဲ့သော လူထုတော်လှန်ရေးသည် လွန်ခဲ့သည့် ၃၅ နှစ်က လူထုလူလူတန်းစား အလွှာပေါင်းစုံ တော်လှန်ခဲ့သော စစ်အာဏာရှင်စနစ် ဆန့်ကျင်ရေး တိုက်ပွဲအဆက်ဖြစ်ကြောင်း DPNS က ဖော်ပြထားသည်။
Public Service Announcement
ထို့ကြောင့် ယနေ့အထိ နှစ်ပေါင်းများစွာ ပြည်သူလူထုအား ဖိနှိပ်အနိုင်ကျင့်နေသော စစ်အာဏာရှင်စနစ်ကို အမြစ်ပြတ်ချေမှုန်းပြီး တောင်တန်းမြေပြန့် လူထု လူတန်းစားတရပ်လုံး လွတ်မြောက်ရန် ဆက်လက် တိုက်ပွဲဝင်သွားကြရန်လည်း DPNS က တိုက်တွန်းနှိုးဆော်ထားသည်။
