ကရင်နီ(ကယား)ပြည်နယ် ဒီးမော့ဆိုမြို့နယ် အရှေ့ခြမ်းတိုက်ပွဲအတွင်း ရဲဘော်တစ်ဦးကျဆုံးခဲ့ကြောင်း ကရင်နီအမျိုးသားများကာကွယ်ရေးတပ်(KNDF)တပ်ရင်း (၆)က ယနေ့ထုတ်ပြန်သည်။
ဩဂုတ် ၂ ရက်က စစ်ကောင်စီတပ်နှင့် တိုက်ပွဲ ဖြစ်ပွားစဥ်ကျဆုံးခဲ့ခြင်းဟု ဆိုသည်။
“ဒီးမော့ဆို အရှေ့ဘက်ခြမ်းတိုက်ပွဲမှာ ကျတာပါ။အခုထိလည်း တိုက်ပွဲက ပြင်းထန်နေတုန်းပဲ။ ဖြစ်နေတုန်းပဲ”ဟု KNDF တာဝန်ရှိသူက ပြောသည်။
အနာဂတ်ဖက်ဒရယ်ဒီမိုကရေစီရရှိရေးအတွက် အသက်ပေးတိုက်ခိုက်သွားခဲ့သော ရဲဘော် ညားရယ်အား အာဇာနည်သူရဲကောင်းအဖြစ် မှတ်တမ်းတင်အလေးပြုကြောင်းလည်း KNDF တပ်ရင်း (၆)က ဖော်ပြသည်။
Public Service Announcement
ဒီးမော့ဆိုမြို့အရှေ့ခြမ်းတွင် စစ်ကောင်စီက စစ် ကြောင်းသုံးခုဖြင့် ထိုးစစ်ဆင်ပြီးနောက် ယခုလ ၂ ရက်ကစ၍ တိုက်ပွဲနေ့စဥ်နီးပါး ဖြစ်ပွားနေဆဲ ဖြစ်သည်။
လက်ရှိ ဒီးမော့ဆိုအရှေ့ခြမ်းတိုက်ပွဲတွင် စစ်ကောင်စီ၏ စစ်ကြောင်းသုံးခု၌ အင်အား ၃၀၀ ထက်မနည်းရှိကြောင်းလည်း ကရင်နီတပ်ပေါင်းစုမှ တာဝန်ရှိသူက အသိပေးသည်။
လက်ရှိ ဒီးမော့ဆိုအရှေ့ခြမ်းတိုက်ပွဲအရ စစ်ကောင်စီသည် ဒီးမော့ဆို-ဖရူဆိုလမ်းမကြီးကို ထိန်းချုပ်ရန် ကြိုးပမ်းနေခြင်းဟု ၎င်းက သုံးသပ်သည်။
လက်ရှိ တိုက်ပွဲဖြစ်ပွားရာ ဒေသနှင့်နီးစပ်သည့် ဒေါညင်းခူ – ထီးပေါ့ဆိုလမ်းပိုင်း လုံးဝအသုံးမပြုရန်နှင့် ယာယီပိတ်ထားမည်ဟု KNDF က အသိပေးထားသည်။
