ပြည်သူ့ကာကွယ်ရေးတပ်မတော်(PDF) တောင်ညိုစစ်ကြောင်းသည် မော်လမြိုင်-ရေး-ထားဝယ် ပြည်ထောင်စုလမ်းမကြီးပေါ်တွင် လုံခြုံရေးနှင့် ယာဥ်စစ်ဆေးခြင်းများ ဆောင်ရွက်ခဲ့ကြောင်း မှတ်တမ်းဓာတ်ပုံများကို အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနက ယနေ့ ထုတ်ပြန် အသိပေးသည်။
စစ်ဆေးမှု ပြုလုပ်သည့် နေရာဒေသနှင့် အချိန်ကို ဖော်ပြမထားသော်လည်း PDF ရဲဘော်များက ကုန်တင်ယာဉ် ၊ ခရီးသည်ယာဉ်များ အပါအဝင် လမ်းအသုံးပြုနေသည့် ယာဉ်များကို စစ်ဆေးနေသည့် ပုံရိပ်များကို ဖော်ပြခဲ့သည်။
အဆိုပါလမ်းပိုင်းတွင် PDFနှင့် ကရင်အမျိုးသားအစည်းအရုံး(KNU) လက်အောက်ခံတပ်များ ပူးပေါင်းပြီး လုံခြုံရေးစစ်ဆေးမှုများကို ယခုနှစ် ဇွန်လလယ်မှစ၍ ခပ်စိပ်စိပ်ပြုလုပ်လာခဲ့ခြင်းဖြစ်သည်။
ထိုသို့ ဆောင်ရွက်နိုင်မှုသည် စစ်ကောင်စီတပ် နယ်မြေများကို စွန့်လွှတ်လိုက်ရသည့် အခြေအနေကို မြင်သာစေကြောင်း KNU ပြောရေးဆိုခွင့်ရှိသူ ပဒိုစောတောနီးက ယမန်နေ့တွင် People’s Spring သို့ ပြောကြားသည်။
Public Service Announcement
စစ်ကောင်စီတပ်အနေဖြင့် ယခင်က KNU တပ် များကို ပိတ်ဆို့ တိုက်ခိုက်မှုများ လုပ်ဆောင်နိုင်ခဲ့သော်လည်း အာဏာသိမ်းပြီး ၂နှစ်တာ ကာလတွင် စစ်စွမ်းအား သိသာစွာ ကျဆင်းနေသည့် အခြေအနေကို ပဒိုစောတောနီးက ပြောပြခြင်းဖြစ်သည်။
“ဒီနေ့ဒီအခါမှာကတော့ကျနော်တို့ကို ပိတ်ဆို့ဖို့ နေနေသာသာ ဖြစ်လာတဲ့ တိုက်ပွဲတွေက အလူးအလဲပဲ ခံနေရတယ်ဆိုတာ ကျနော်တို့ မြင်နေရတယ်။ အောက်ဘက်ကို ဆင်းလာရင် တပ်မဟာ (၁)ပေါ့နော်။ အဲဒီ ရန်ကုန်-မော်လမြိုင်ကာလမ်း။ ရန်ကုန်- မော်လမြိုင်ကားလမ်းမှာ စစ်အာဏာမသိမ်းခင်တိုက်ပွဲတွေဖြစ်ရင် ကျနော်တို့ တောပိုင်းတွေမှာ ဖြစ်တာများတယ်။ ဒီနေ့ ဒီကာလမှာ ရန်ကုန် -မော်လမြိုင်ကားလမ်း အထူးသဖြင့် တပ်မဟာ(၁)နယ်မြေ ကျိုက်ထို-ဘီးလင်း-သထုံ ကြည့်လိုက်ရင် တိုက်ပွဲဖြစ်လိုက်ရင် ကားလမ်းမပေါ် တွေ့နေရတယ်ဆိုတာ ဒါ ဘာဖော်ပြလဲဆို ကျနော်တို့ကောင်းကောင်းမွန်မွန် စိုးမိုးနိုင်ပြီဆိုတာပြောလို့ရတယ်။ ဟိုးတောင်ပိုင်း ပြန်ဆင်းလာတဲ့အခါ မော်လမြိုင်နဲ့ ရေး-ထားဝယ် ကားလမ်းတလျှောက် အဲဒါကတော့ အမှတ်(၈) ပြည်ထောင်စုကားလမ်းဆိုကျနော်တို့တပ်ဖွဲ့တွေ ကိုယ်တိုင်လမ်းမပေါ် တက်ပြီးစစ်ဆေးရေးတွေ လုပ်နေတာ အကြိမ်ပေါင်း အရေအတွက် မဖော်ပြနိုင်လောက်အောင်ပဲ”ဟု ပဒိုစောတောနီးက ပြောသည်။
ထိုသို့ဆောင်ရွကနိုင်ခြင်းသည် စစ်ကောင်စီတပ် နယ်မြေစွှန့်လွှတ်လိုက်ရမှုကို မကြေညာရုံ အနေအထားဖြစ်ပြီး အားလုံးသိရှိကြသည်ဟု ၎င်းက ပြောသည်။
