TTC ကျောင်းအနီး၌ စစ်ကောင်စီတပ် ရမ်းသမ်းပစ်ခတ်၍ ပြည်သူသုံးဦးသေဆုံး
စစ်ကိုင်းတိုင်း၊ မုံရွာမြို့နယ် သာစည်ကျေးရွာအနီးတွင် စစ်ကောင်စီတပ်သား သုံးဦးအား ပစ်ခတ်တိုက်ခိုက်ရာ တစ်ဦးသေဆုံးပြီး လက်နက်ခဲယမ်းအချို့ သိမ်းဆည်းရမိကြောင်း မုံရွာခရိုင် PDFတပ်ရင်း(၂၇) တပ်ခွဲ(၂) – သလ္လာဝတီကာကွယ်ရေးတပ်က သတင်းထုတ်ပြန်သည်။
ယနေ့ (အောက်တိုဘာ ၂၃ရက်) နံနက် ၇နာရီခန့်က မုံရွာမြို့နယ်၊ ကျောက်ဆစ်ပုံကျေးရွာ အခြေစိုက် အမတ(၅၀၈)အမြောက်တပ်မှ ထွက်လာသော စစ်ကြောင်းမှ နောက်ချန် စစ်သား သုံးဦးအား ခြုံခိုတိုက်ခိုက်ခဲ့ရာ ထိတွေ့မှုဖြစ်ပွားခဲ့ကြောင်း သလ္လာဝတီကာကွယ်ရေးတပ်က အသိပေးသည်။
“စစ်ကြောင်းအင်အားလာဖြည့်ရင်းနဲ့ နောက်မှာ သုံးယောက်ကျန်နေခဲ့ရင်းနဲ့ ဖြစ်သွားတာ။ သူတို့တပ်သား သုံးယောက်ကို မေ့ကျန်ခဲ့တာ။ မဟာမိတ်တွေနဲ့အတူ ကင်းပုန်းဝပ်ရင်း တိုက်ခိုက်ခဲ့တာပါ။ ကျန်တဲ့နှစ်ယောက်ကတော့ ပြန်လည်ပစ်ခတ်ရင်း လွတ်မြောက်သွားပါတယ်။ ကျန်တဲ့တစ်ယောက်ကိုတော့ အရှင်ဖမ်းမိပါတယ်။အဲတစ်ယောက်က ပြန်လည်ခုခံဖို့လုပ်တာနဲ့ သေဆုံးသွားတာပါ”ဟု မုံရွာခရိုင် PDFတပ်ရင်း (၂၇)တပ်ခွဲ – ၂ တပ်ခွဲမှူး ကိုဝင်းက ပြောသည်။
၎င်းထံမှ (MA-1) တစ်လက်၊ ကျည်(၂၀၀)ကျော်၊ ရိုင်ဖယ်တပ် ဗုံးသီးတစ်လုံး၊ (၆၀) မမတစ်လုံး၊ ကျည်ဘောက်ပို နှစ်ခု၊ ကျည်ကာပြား ဝတ်ဆုံတစ်ထည်၊ ဖုန်းတစ်လုံး သိမ်းဆည်းရခဲ့ကြောင်း သလ္လာဝတီကာကွယ်ရေးတပ်က ဆိုသည်။
Public Service Announcement
ရဲဘော်များမှာ အထိအခိုက်မရှိ ဆုတ်ခွာနိုင်ခဲ့ပြီး သေဆုံး စစ်ကောင်စီတပ်သား ရုပ်အလောင်းအား စစ်စည်းကမ်းနှင့်အညီ ကောင်းမွန်စွာ သဂြိုလ်ပေးခဲ့ကြောင်း သလ္လာဝတီကာကွယ်ရေးတပ်က အသိပေးသည်။
အဆိုပါတိုက်ခိုက်မှုကို သလ္လာဝတီကာကွယ်ရေးတပ်၊ တိုက်တန်း ကာကွယ်ရေးတပ်နှင့် မိုးဟိန်း ကာကွယ်ရေးတပ်တို့ ပူးပေါင်း တိုက်ခိုက်ခဲ့ခြင်းဖြစ်သည်။
ထို့အပြင် နံနက် ၉နာရီခန့်က မုံရွာမြို့ ပညာရေးတက္ကသိုလ် လေ့ကျင့်ရေးကျောင်း (TTC)အနီးရှိ စစ်ကောင်စီတပ်အား ဒေသတွင်းတော်လှန်ရေးအဖွဲ့တစ်ဖွဲ့မှ သွားရောက်တိုက်ခိုက်ခဲ့သည်။ စစ်ကောင်စီတပ်က ရမ်းသမ်း ပစ်ခတ်ခဲ့၍ အမျိုးသားနှစ်ဦးနှင့် အမျိုးသမီးတစ်ဦးတို့ သေဆုံးခဲ့ကြောင်း ဒေသခံများက ပြောသည်။
