▪︎ကလေး၃ဦးလည်း အသက်အန္တရာယ်စိုးရိမ်နေရ
စစ်ကိုင်းတိုင်း၊ ဒီပဲယင်းမြို့နယ်၊ လက်ယက်ကုန်းကျေးရွာတွင် ယမန်နေ့က စစ်တပ်၏ ပစ်ခတ်မှုကြောင့် ထိခိုက်ဒဏ်ရာရထားသည့် အမျိုးသမီးတစ်ဦး ထပ်မံသေဆုံးခဲ့ပြီး ထိခိုက်ဒဏ်ရာရထားသည့် ကလေး ၃ ဦးလည်း အသက်အန္တရာယ်စိုးရိမ်နေရကြောင်း ဒေသခံများက ပြောသည်။
နိုဝင်ဘာလ ၁ ရက် ညနေပိုင်းက စစ်ကောင်စီတပ်၏ လက်နက်ကြီးဖြင့် ပစ်ခတ်တိုက်ခိုက်မှုကြောင့် ဒီပဲယင်းနယ်အရှေ့ခြမ်းရှိ လက်ယက်ကုန်းကျေးရွာသို့ လက်နက်ကြီး ၂ လုံးကျရောက်ပေါက်ကွဲခဲ့သည်။
ထိုလက်နက်ကြီးကြောင့် လက်ယက်ကုန်းရွာနေ အသက်၄၂ အရွယ် မချယ်ရီအေးသေဆုံးခဲ့ပြီး ထိခိုက်ဒဏ်ရာရထားသူများအနက် ယနေ့(နိုဝင်ဘာလ ၂ ရက်နေ့)တွင် အသက် ၄၆ နှစ်အရွယ် မခင်ဝေဦး ထပ်မံသေဆုံးခဲ့ကြောင်း ဒေသခံများက ပြောသည်။
“မချယ်ရီအေးက မနေ့ညကဆုံးတာ။ မခင်ဝေဦးက ဒီနေ့ဆေးကုနေရင်း နေ့ခင်း ၂နာရီလောက်မှာဆုံးတာ။”ဟု ဒေသခံတစ်ဦးက ပြောသည်။
Public Service Announcement
ထို့အပြင် အသက် ၅နှစ်အရွယ်ရှိ မောင်ဖြိုးခန့်ဇော်၊မောင်ပြည့်ဖြိုးစုံနှင့် မောင်ကောင်းစည်သူတို့ ဒဏ်ရာရရှိထားပြီး ဆေးကုသမှုခံယူနေရကာ အသက်အန္တရာယ် စိုးရိမ်နေရသည်ဟု ဒေသတွင်းသတင်းများဖော်ပြပေးနေသောသတင်းပေချ်အချို့ကဖော်ပြသည်။
လက်ယက်ကုန်းရွာအား ရေဦးမြို့၊ ကြာဖူးအဝိုင်းမှ စစ်အုပ်စုက ရမ်းသမ်းပစ်ခတ်ခဲ့ခြင်းဖြစ်ကြောင်း ဒေသခံများကပြောသည်။
လက်ယက်ကုန်းရွာရှိဘုန်ကြီးကျောင်းတွင်စာသင်နေသောကျောင်းသားငယ်များကို ၂၀၂၂ ခုနှစ် စက်တင်ဘာလ၁၆ ရက်နေ့ကလည်း စစ်တပ်က လေကြောင်းမှ ပစ်ခတ် တိုက်ခိုက်ခဲ့၍ ဘုန်းတော်ကြီးကျောင်းနှင့် စာသင်ကျောင်းရှိ ကလေးငယ် ၆ ဦးအပါအဝင် ပြည်သူ၁၁ဦးသေဆုံးခဲ့ပြီး ဆယ်နှင့်ချီ ဒဏ်ရာရရှိခဲ့သည်။
