ကလေးမြို့ တွင် စစ်ကောင်စီထောင်ထားသည့် မိုင်းပေါက်ကွဲ၍ စစ်ဘေးရှောင်ကလေးငယ်တစ်ဦးအပါအဝင် နှစ်ဦးသေဆုံး

▪︎က​လေးငယ် ၏ မိခင်ဖြစ်သူ ဒဏ်ရာရ

ကလေးမြို့ ဗိုလ်ချုပ်လမ်းမပေါ်တွင် စစ်ကောင်စီတပ်ထောင်ထားသည့် မိုင်းပေါက်ကွဲပြီး စစ်ဘေးရှောင်ကလေးငယ်တစ်ဦးအပါအဝင် နှစ်ဦးသေဆုံးပြီး ကလေးငယ်၏ မိခင်လည်း ဒဏ်ရာအပြင်းအထန်ရရှိခဲ့သည်။

ကလေးမြို့ တာဟန်းရပ်ကွက်မှ ဗိုလ်ချုပ်လမ်းမပေါ်ရှိ စစ်ကောင်စီဂိတ်အနီးတွင် ယမန်‌နေ့(မတ်လ ၁၈ရက်) နံနက်က မိုင်းပေါက်ကွဲခဲ့ခြင်းဖြစ်သည်။

” စစ်ဘေးရှောင်မိသားစုက သူတို့အိမ်ကိုသွားကြည့်ဖို့ သုံးဘီးငှားပြီလာတာ။ စစ်တပ်ဂိတ်ရှေ့ကို ဖြတ်ချိန် မိုင်းပေါက်ကွဲတာ။ စစ်တပ်က သူတို့လုံခြုံရေးအတွက်ထောင်ထားတဲ့မိုင်း။ ကလေးလေးနဲ့ သုံးဘီးသမားသေဆုံးတယ်။ ကလေးအမေက ဒဏ်ရာရတယ်” ဟုကလေးမြို့ခံတစ်ဦးကပြောသည်။

သေဆုံးသူကလေးငယ်သည် အသက် ၅နှစ်အရွယ် ယောင်္ကျားလေးဖြစ်သည်။ မိခင်ဖြစ်သူမှာ ဆေးကုသမှုခံယူနေရသည်။ ကလေးမြို့မြောက်ပိုင်းကျေးရွာတခုတွင် နေထိုင်သူများဖြစ်ပြီး ရွာဘက်တွင်တိုက်ပွဲများဖြစ်​နေ၍ မြို​ပေါ်သို့လာပြီး စစ်ရှောင်နေကြရသူများဖြစ်ကြောင်း သိရသည်။

Public Service Announcement

မိုင်းပေါက်ကွဲသည့်နေရာသည် စစ်တပ်အာဏာသိမ်းပြီး​နောက် မြို့ခံလူငယ်အများစုပါဝင်​သော ပြည်သူများကသပိတ်စခန်းဖွင့်ခဲ့သည့် တာဟန်းခံတပ်နေရာနှင့် နီးပြီး အဆိုပါနေရာတဝိုက်ကို စစ်ကောင်စီကအခိုင်အမာတပ်စွဲထားသည်။

ကလေးမြို့ပေါ်တွင်သာ တပ်စွဲထားနိုင်သည့် စစ်ကောင်စီတပ်သည် အရပ်သားများအားပစ်မှတ်ထား၍ သေနတ်ဖြင့်ပစ်ခတ်ခြင်း၊ လက်နက်ကြီးများဖြင့်ပစ်ခတ်ခြင်း၊ လေကြောင်းမှပစ်ခတ်ခြင်းများမကြာခဏ ပြုလုပ်နေကြောင်း ကာကွယ်ရေးရဲဘော်အချို့ကပြောသည်။