ဇော်ရမ်း/People’s Spring
အမ်းမြို့နယ်ရှိ စစ်ကောင်စီစခန်းများအား ထိုးစစ်ဆင်တိုက်ခိုက်နေသည့်တိုက်ပွဲအတွင်း အာရက္ခတပ်တော်(AA)နှင့် အတူတိုက်ပွဲဝင်နေသည့် ပြည်သူ့လွတ်လပ်ရေးတပ်တော်(PIA)ရဲဘော်တစ်ဦး ကျဆုံးခဲ့ကြောင်း သတင်းရရှိသည်။
PIA ရဲဘော်သွင်ထူးအောင် (ခ)ဘိုင်အိုသည် ဧပြီ ၂၅ရက်က တိုက်ပွဲအတွင်း ကျဆုံးခဲ့ခြင်းဖြစ်ကြောင်း PIA က ယနေ့(ဧပြီ၂၈ရက်) သတင်းထုတ်ပြန်သည်။
ရဲဘော်သွင်ထူးအောင်သည် ပြည်သူ့လွတ်လပ်ရေးတပ်တော်(PIA)အပတ်စဥ် (၃) အခြေခံ စစ်သင်တန်းဆင်းဖြစ်သည်။
Public Service Announcement
ဧပြီ၂၅ရက်က အနောက်ပိုင်းတိုင်းစစ်ဌာနချုပ်အနီး တောဟိန်းတောင်စစ်ကောင်စီဗျူဟာကုန်းကို အာရက္ခတပ်တော်(AA )က သိမ်းပိုက်ခဲ့ပြီး တိုက်ပွဲအလွန်ပြင်းထန်ခဲ့ကြောင်း AAနှင့် နီးစပ် သည့်စစ်ရေးသတင်းမြစ်တစ်ဦးက ပြောသည်။
ထိုနေ့တိုက်ပွဲအတွင်း စစ်ကောင်စီတပ်ဖွဲ့ဝင် အများအပြား သေဆုံးကာ စစ်သုံ့ပန်းများလည်း ဖမ်းမိကြောင်း သတင်းရရှိသည်။
ရဲဘော်သွင်ထူးအောင်သည် လူမျိုးပေါင်းစုံ ပြည်သူလူထုဘဝ လွတ်မြောက်ရေးအတွက် တပ်တော်ကပေးအပ်သည့် တော်လှန်ရေးတာဝန်များ ထမ်းဆောင်ခဲ့သည့်အပေါ် အလေးအနက်ဂုဏ်ယူကြောင်းလည်း PIA က ထုတ်ပြန်ထားသည်။
PIA သည် ၁၀၂၇ စစ်ဆင်ရေးအတွင်း မြောက် ပိုင်းညီနောင်သုံးဖွဲ့နှင့်အတူ မြို့သိမ်းတိုက်ပွဲအချို့ပူးတွဲတိုက်ခိုက်ခဲ့သည်။
ထို့အပြင် စစ်ကိုင်းတိုင်းအပါအဝင် ဒေသအနှံ့ရှိ စစ်ကောင်စီတော်လှန်ရေးတိုက်ပွဲများတွင်လည်း PIA ရဲဘော်များပါဝင် တိုက်ခိုက်နေသည်။
AAသည်လည်း ကချင်၊ စစ်ကိုင်း၊ မကွေး၊ ရှမ်းစသည့် ဒေသများ၌ စစ်ကောင်စီတော်လှန်ရေးတိုက်ပွဲများအတွင်း ပြည်သူ့ကာကွယ်ရေးတပ်ဖွဲ့များနှင့်ပူးပေါင်းတိုက်ခိုက်နေသလို ရခိုင်ဒေသတိုက်ပွဲများတွင်လည်း ပြည်သူ့ကာကွယ်ရေးတပ်ဖွဲ့များက ပူးပေါင်းတိုက်ခိုက်ပေးနေသည်။
ယခုအခါ စစ်ကောင်စီနှင့် AAသည် အမ်းမြို့နယ်အပြင် သံတွဲ၊ တောင်ကုတ်၊ ဘူးသီးတောင်၊မောင်တောမြို့နယ်တို့၌လည်းတိုက်ပွဲများ နေ့စဉ် ရက်ဆက် ဖြစ်ပွားနေကြောင်း AAက သတင်းထုတ်ပြန်ထားသည်။
ထိုအတောအတွင်း ဘူးသီးတောင်မြို့နယ်နှင့် မောင်တောမြို့နယ်တို့တွင် ဧပြီ ၂၆ရက် မှစ၍ ည ၇နာရီ မှ နံနက် ၆နာရီ အချိန်အတွင်း ညမထွက်ရ အမိန့်ကို AAက ထုတ်ပြန်ထားသည်။
