စောနွေဦး/People’s Spring
စစ်ကောင်စီတပ်သားများနှင့် လက်နက်များသယ်ယူပို့ဆောင်ရာတွင် ဂျာမန်ကုမ္ပဏီ Traton SE ရင်းနှီးမြှပ်နှံထားသည့် တရုတ်အစိုးရပိုင် Sinotrukက ပံ့ပိုးကူညီနေကြောင်း Justice For Myanmar-JFMက အသိပေးထုတ်ပြန်သည်။
အဆိုပါကုမ္ပဏီက ပံ့ပိုးကူညီမှုကို စစ်ကောင်စီက ရယူပြီး မြန်မာပြည်သူများအပေါ် ဖိနှိပ်အကြမ်းဖက်မှုလုပ်ဆောင်ရန် နိုင်ငံတဝန်း စစ်ကောင်စီတပ်သားများနှင့် လက်နက်များသယ်ယူပို့ဆောင်မှုကို အဆိုပါ စစ်သုံးထရပ်ကားများအပေါ် မှီခိုရခြင်းဖြစ်သည်ဟုလည်း ဆိုသည်။
သို့သော် Sinotrukက စစ်ကောင်စီနှင့် စီးပွားရေးလုပ်ဆောင်ခဲ့ခြင်းမရှိကြောင်းနှင့် စစ်ကောင်စီထံ ထရပ်ကားများ ရောင်းချခဲ့ခြင်းမဖြစ်ကြောင်းလည်း ငြင်းဆိုထားသည်။
Public Service Announcement
“လက်ရှိအချိန်တွင် မြန်မာနိုင်ငံရှိ စီးပွားရေးလုပ်ငန်း အားလုံး ရပ်ဆိုင်းထားပြီး ဖြစ်ပါသည်”ဟု Sinotruk က ဆိုသည်။
သို့သော် လက်ရှိရရှိထားသော အချက်အလက်များအရ Sinotrukထုတ် ယာဥ်များကို စစ်ကောင်စီ၏ စစ်ဆင်ရေးတွင် တွင်ကျယ်စွာအသုံးပြုနေ၍ ကုမ္ပဏီအနေဖြင့် စစ်ကောင်စီနှင့် စီးပွားရေးလုပ်ဆောင်နေမှုကို ရပ်တန့်သင့်သည်ဟု JFMက အသိပေးသည်။
ထိုသို့မလုပ်ဆောင်ပါက စစ်ရာဇဝတ်မှုနှင့်လူသားမျိုးနွယ်အပေါ်ကျူးလွန်သည့် ရာဇဝတ်မှုများကို အားပေးကူညီနေခြင်းအပေါ် တာဝန်ခံရမည်ဟုလည်း JFMက ဆိုသည်။
ဂျာမန်ကုမ္ပဏီ Traton SE၏ လက်အောက်ခံကုမ္ပဏီ MAN SEသည် Sinotruk ကုမ္ပဏီ၏ လက်အောက်ခံကုမ္ပဏီ Sinotruk (Hongkong)တွင် ရှယ်ယာ ၂၅ ရာခိုင်နှုန်းပိုင်ဆိုင်ထားသည်။
ကရင်နီတော်လှန်ရေးတပ်များနှင့် စစ်ကောင်စီတပ်အကြား နေ့စဉ်ရက်ဆက် ပြင်းထန်စွာ တိုက်ပွဲများ ဖြစ်ပွားနေသည့် ၂၀၂၂ မေလက ကရင်နီပြည်နယ်တွင် စစ်ကောင်စီ ယာဉ်တန်းအား တော်လှန်ရေးရဲဘော်များက တိုက်ခိုက်မှုတွင် Sinotruk စစ်သုံးယာဉ်လေးစီးကို သိမ်းဆည်းရရှိပြီး အဆိုပါယာဥ်များကို မီးရှို့ ဖျက်ဆီးခဲ့သည်။
