မိထက်/People’s Spring
မတူပီမြို့သိမ်းတိုက်ပွဲအတွင်း စခန်းစွန့်ခွာထွက်ပြေးသွားသည့် ဗျူဟာမှူးဦးဆောင်သည့် စစ်ကောင်စီတပ်ဖွဲ့ဝင်များကို ချင်းကာကွယ်ရေးရဲဘော်များက ဖမ်းမိထားကြောင်း သတင်းရရှိသည်။
တူပီမြို့အခြေစိုက် ခလရ (၁၄၀)တပ်ရင်းနှင့် ဗျူဟာကုန်းကာကင်းစခန်းအချို့ကို ချင်းညီနောင်နှင့်မဟာမိတ်တပ်များက ဇွန်လ ၉ရက် တွင် စတင်ခဲ့တိုက်ခိုက်ခဲ့ပြီး ဇွန်လ ၂၅ရက်တွင် သိမ်းယူခဲ့သည်။
Public Service Announcement
စခန်းသိမ်းတိုက်ပွဲအတွင်း ထွက်ပြေးသွားသည့်ဗျူဟာမှူးဦးဆောင်သည့် စစ်ကောင်စီတပ်ဖွဲ့ဝင် ၁၀၀ကျော်ကို ချင်းကာကွယ်ရေးရဲဘော်များက ဇူလိုင်၂၄ရက်တွင် ဖမ်းမိခြင်းဟု ကနဦးသတင်းရရှိထားသည်။
” သတင်းက မှန်ပါတယ်ဗျ။ မထုတ်ပြန်သေးတာပဲရှိပါတယ်။ထွက်ပြေးသွားသူတွေ မိတာအမှန်ပါပဲ”ဟု ချင်းကာကွယ်ရေးရဲဘော်တစ်ဦးက ယနေ့(ဇူလိုင် ၂၈ရက်)ပြောသည်။
အဆိုပါသတင်းကို အရာရှိအဆင့်ရှိ ချင်းကာကွယ်ရေးရဲဘော်တစ်ဦးအပြင် ချင်းပြည်နယ် မှ ပြည်သူ့အုပ်ချုပ်ရေးအဖွဲ့ဝင်တစ်ဦးကလည်း ဟုတ်မှန်ကြောင်း အတည်ပြုသည်။
မတူပီမြို့နယ်ပြည်သူ့ကာကွယ်ရေးအဖွဲ့ကမူ တရားဝင် သတင်းမထုတ်ပြန်သေးပေ။
အဆိုပါ စစ်ကောင်စီအုပ်စုသည် စခန်းများတိုက်ခိုက်ခံရပြီးနောက် ဆုတ်ခွာထွက်ပြေးစဉ် မတူပီမြို့ရဲစခန်းအချုပ်မှ နိုင်ငံရေးအကျဥ်းသားများကို လူသားဒိုင်းအနေဖြင့် ခေါ်ဆောင်သွားခဲ့ဖူးသည်။ ချင်းကာကွယ်ရေးရဲဘော်များက လိုက်လံတိုက်ခိုက်စဉ် တိုက်ပွဲအတွင်း နိုင်ငံရေးအကျဉ်းသား ၁၃ဦးပြန်လည်လွတ်မြောက်လာကြောင်း ချင်းကာကွယ်ရေးတပ်ဖွဲ့ (မတူပီ)က ဇူလိုင် ၁၄ရက်တွင် ထုတ်ပြန်ထားသည်။
ထို့အပြင် နိုင်ငံရေးအကျဉ်းသားအချိူ့ ပျောက်ဆုံးနေဆဲဖြစ်သည်။
မတူပီမြို့ကို ဇွန်လ ၂၉ရက်တွင် တော်လှန်ရေးတပ်ဖွဲ့များက အပြီးသတ်သိမ်းပိုက်ခဲ့ခြင်းဖြစ်သည်။
ချင်းကာကွယ်ရေးရဲဘော်များနှင့် မဟာမိတ်များသည် မြို့သိမ်းတိုက်ပွဲ၌ ဇွန်လ ၁၇ရက်တွင် ခမရ(၃၀၄) တပ်ရင်းကို သိမ်းနိုင်ခဲ့သည်။ ထို့နောက် ဇွန်လ ၂၉ရက်တွင် ခလရ(၁၄၀)ကို တိုက်ခိုက်သိမ်းပိုက်ခဲ့သည်။ စစ်ကောင်စီထံမှ လေယာဥ်ပစ်လက်နက်အပါအဝင် လက်နက်ခဲယမ်းအမြောက်အများသိမ်းပိုက်ရရှိခဲ့သည်။
