ဟန်နွေ/People’s Spring
ပဲခူးတိုင်းအရှေ့ခြမ်း၊ညောင်လေးပင်မြို့နယ်၊ ရေဖြူကန်ကျေးရွာတွင် တပ်စွဲထားသော စစ်ကောင်စီစစ်ကြောင်းအား ကရင်မျိုးသားလွတ်မြောက်ရေးတပ်မတော်(KNLA)ပူးပေါင်းတပ်က တိုက်ခိုက်ခဲ့ရာ စစ်ကောင်စီတပ်ဘက်က စစ်ကြောင်းမှူး အပါအဝင် သေဆုံးထိခိုက်မှုများ ရှိခဲ့ကြောင်း ပြည်သူ့ကာကွယ်ရေး တပ်မတော် (PDF) တောင်ပိုင်းစစ်ဒေသ အမှတ်(၂) စစ်ဒေသခွဲက သတင်းထုတ်ပြန်သည်။
ဩဂုတ် ၆ရက်တွင် ရေဖြူကန်ရွာရှိ စစ်ကောင်စီတပ်ကို KNLAတပ်ရင်း(၉)ဒရုန်းတပ်ဖွဲ့၊ပဲခူးခရိုင်PDFတပ်ရင်း(၃၇၀၂)ဒရုန်းတပ်ဖွဲ့၊PDFတပ်ရင်းတောကျီးကန်းဒရုန်းတပ်ဖွဲ့တို့ပူးပေါင်း တိုက်ခိုက်ခဲ့ခြင်းဖြစ်သည်ဟု ဆိုသည်။
Public Service Announcement
အဆိုပါတိုက်ပွဲအတွင်း စစ်ကောင်စီတပ်၏ စစ်ကြောင်းမှူး ခမရ(၃၄၉)ဒုရင်းမှူး(ယာယီတပ်ရင်းမှူး)နှင့် တပ်ခွဲမှူးတို့သေဆုံးခဲ့ပြီး တပ်သား သုံးဦး ထိခိုက်ဒဏ်ရာရခဲ့ကြောင်း ဖော်ပြသည်။
ညောင်လေးပင်မြို့နယ် ရေဖြူကန်ကျေးရွာတွင် တပ်စွဲထားသော စစ်ကောင်စီတပ်သည် အဆိုပါဒေသရှိပြည်သူများအား ပေါ်တာဆွဲခြင်း၊ ဓားစာခံအဖြစ်ဖမ်းဆီးချူပ်နှောင်ခြင်းနှင့် ပြည်သူလူထု၏လွတ်လပ်စွာသွားလာနေထိုင်ခွင့်ကိုနှောက်ယှက်ခြင်း တို့ကိုပြုလုပ်လျက်ရှိသည့် တပ်များဖြစ်ကြောင်း ထုတ်ပြန်သည်။
ရေဖြူကန်ကျေးရွာတွင် တပ်စွဲထားသော အဆိုပါစစ်ကောင်စီတပ်၏ လက်နက်ကြီးနှင့်ဒရုန်းပစ်ခတ်မှုများကြောင့် ဇွန်လနှင့်ဇူလိုင်အတွင်း အပစ်မဲ့ပြည်သူ ခုနစ်ဦးသေဆုံးခဲ့ရကြောင်းလည်း ထုတ်ပြန်ထားသည်။
KNUအနေဖြင့် တပ်မဟာ(၁)၊ တပ်မဟာ(၃)နှင့် တပ်မဟာ(၅) ပူးပေါင်းပြီး စစ်တောင်းမြစ်ဝှမ်းဒေသ၌တိုက်ပွဲဖော်ဆောင်မည်ဟု သတင်းရကြောင်း စစ်ခေါင်းဆောင်မင်းအောင်လှိုင်က ယခုဩဂုတ်ပထမပတ်တွင်ပြောကြားထားရာ KNU ပြောရေးဆိုခွင့်ရှိသူ ပဒိုစောတောနီးက တပ်မဟာ သုံးခုသာ ကွက်ပြီး စစ်ရေးဖော်ဆောင်မည် မဟုတ်ဘဲ KNU၌ ရှိနေသည့် တပ်မဟာ ခုနစ်ခုစလုံးက စစ်အာဏာရှင်စနစ် အပြီးတိုင် ချုပ်ငြိမ်းရေးတိုက်ဖျက်သွားမည်ဟု အသိပေးထားသည်။
