ဆိုင်းမင်း/People’s Spring
ပဲခူးတိုင်း ၊ ဒိုက်ဦးအကျဉ်းထောင်မှာ အမျိုးသမီး နိုင်ငံရေးအကျဉ်းသူတွေကို ထောင်ဝန်ထမ်းတွေ က လေးခွ နဲ့ပစ်ခတ်တာကြောင့် ၈ ဦးအပြင်းအထန်ဒဏ်ရာရသွားတယ်လို့ နိုင်ငံရေးအကျဉ်းသားများအရေးဆောင်ရွက်နေတဲ့ အဖွဲ့အစည်း ၆ ဖွဲ့က ထုတ်ပြန်ပါတယ်။
အဲဒီဖြစ်စဉ်ဟာ သြဂုတ်လ ၁၉ ရက်ကဖြစ်ပွားခဲ့တာပါ။
Public Service Announcement
နိုင်ငံရေးအကျဉ်းသူတွေ ရေချိုးရာ နေရာ ဆီ ထောင်ဝန်ထမ်းအမျိုးသားတွေ ဝင်ထွက်တာကို တိုင်ကြားရာကနေ စကားများကြပြီး လေးခွနဲ့ ပစ်ခတ်ခံရတာလို့ သိရပါတယ်။
အဲဒီဖြစ်စဉ်ဖြစ်ပြီး နောက်ရက် သြဂုတ်လ ၂၀ ရက်ည အချိန်မှာ အမျိုးသားထောင်ဝန်ထမ်းတွေ ပါတဲ့ အဖွဲ့က သေနတ် ၊ ရာဘာတုတ်၊ ကျဉ်စက် ၊ လေးခွ စတဲ့ လက်နက်တွေ ကိုင်ဆောင်ပြီး အမျိုးသမီး အဆောင်ကို ဝင်ရောက်ခဲ့တာရှိတယ်လို့ နိုင်ကျဉ်းအရေးဆောင်ရွက်နေတဲ့ အဖွဲ့ ၆ ဖွဲ့က ဆိုပါတယ်။
အခုလို ညအချိန်မှာ လက်နက်အပြည့်အစုံနဲ့ အမျိုးသမီးအဆောင်တွေကို ဝင်ရောက်တာကြောင့်အမျိုးသမီးနိုင်ကျဉ်းတွေရဲ့ အသက်အန္တရာယ် စိုးရိမ်ရတယ်လို့လည်း အသိပေးပါတယ်။
ဒိုက်ဦးထောင်မှာ အမျိုးသမီးနိုင်ကျဉ်းအပေါ် ဖိနှိပ်မှုတွေရှိနေတယ်လို့ နိုင်ကျဉ်းအရေးဆောင်ရွက်နေတဲ့ အဖွဲ့ ၆ ဖွဲ့က တပါတည်းအသိပေးထားပါတယ်။
ပြီးခဲ့တဲ့ ဇွန်လ ၁၅ ရက်က ကျိုက်မရောထောင်ကနေ ဒိုက်ဦးထောင်ဆီ ပြောင်းရွှေ့ခံရတဲ့ အမျိုးသမီး နိုင်ကျဉ်း ၄၀ ဦး ကို မူးယစ်ဆေးဝါးနဲ့ တရားမဝင်ပစ္စည်းတွေ တွေ့ရှိရတယ်ဆိုပြီး အမျိုးသမီးဆောင်ကို သေနတ်ပစ်ဖောက်တာ ပြုလုပ်ခဲ့တယ်လို့သိရပါတယ်။
အဲဒီနောက် ရိုက်နှက်တာ ၊လေးခွ ၊ အုတ်နီခဲတွေ နဲ့ ပစ် ပေါက်တာတွေကြောင့် အမျိုးသမီး နိုင်ကျဉ်း အချို့ ထိခိုက်ဒဏ်ရာရခဲ့ပေမယ့် ဆေးကုသမပေးဘဲ တိုက်ပိတ်ပစ်ခဲ့တယ်လို့ နိုင်ကျဉ်းအရေးဆောင်ရွက်နေတဲ့ အဖွဲ့ ၆ ဖွဲ့ရဲ့ ထုတ်ပြန်ချက်မှာပါရှိပါတယ်။
၂၀၂၁ ခုနှစ်မှာ စစ်တပ်အာဏာသိမ်းပြီးနောက် ဖမ်းခံရသူတွေရဲ့ ၂၀ ရာခိုင်နှုန်းကျော်ဟာ အမျိုးသမီးတွေ ဖြစ်ပြီး လက်ရှိ အချိန်ထိ အမျိုးသမီးဦးရေ ၄ ,၀၀၀ ကျော် ထိန်းသိမ်းခံနေရဆဲဖြစ်တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း(AAPP )ရဲ့စာရင်းအရ သိရပါတယ်။
ဖမ်းခံရသူအမျိုးသမီးတွေဟာ ရန်ကုန်တိုင်း ၊ မန္တလေး ၊ စစ်ကိုင်း ၊ပဲခူး ၊တနသ်ာရီ ၊မကွေးနဲ့ ဧရာဝတီတိုင်းတို့ က အများဆုံး ဖြစ်ကြပါတယ်။
