ရဲခေါင်/People’s Spring
ရှမ်း – ကရင်နီနယ်စပ်စစ်ဆင်ရေး တစ်ပတ် အတွင်း စစ်ကောင်စီတပ်သား ၃၀သေဆုံးပြီး သုံးဦး အရှင်ဖမ်းမိကာ လက်နက်အများအပြားသိမ်းဆည်းရရှိကြောင်း Loikaw Local PDF လွိုင်ကော် ဒေသခံပြည်သူ့ကာကွယ်ရေးတပ်က ယနေ့ ထုတ်ပြန်သည်။
လွိုင်ကော်ဒေသခံပြည်သူ့ကာကွယ်ရေးတပ်(Loikaw Local Pdf)၊Loikaw PDF ၊ KNDF ၊ KNPLFနှင့် ရှမ်းတောင်အခြေစိုက်တပ် အသီးသီး တို့ ပူးပေါင်းပြီး ရှမ်း-ကရင်နီနယ်စပ်စစ်ဆင်ရေးကို စက်တင်ဘာ ၅ရက်တွင် စတင်ခဲ့သည်ဟု ဆိုသည်။
Public Service Announcement
“လွိုင်လင်လေးဘက် စကစ စခန်းတွေကို ဝင်တိုက် တာလို့သိရတယ်။ပြီးတော့ အဲဒီဘက်မှာ ခမရ (၅၃၀)အခြေစိုက်ထားတယ်။ရှမ်းတောင် ဆီဆိုင် နဲ့ လွိုင်ကော်လမ်းကြောင်းပေါ်မှာရှိတယ်”ဟု ကရင်နီစစ်ရေးသတင်းရင်းမြစ်က လူထုနွေဦးသို့ပြောသည်။
စစ်ဆင်ရေးအတွင်း စစ်ကောင်စီတပ်များ စိုးမိုးထားသော တပ် ၊ ရဲစခန်း ၊စခန်းကုန်းများအား တိုက်ခိုက်ခဲ့ပြီး စစ်ကောင်စီတပ်များမှ ထိခိုက်သေဆုံးသူ ၃၀ဦးရှိပြီး ၃ဦးအရှင်ဖမ်းမိနိုင်ခဲ့ကာ လက်နက်အများအပြား သိမ်းဆည်းထားနိုင်ခဲ့ကြောင်း အသိပေးသည်။
တိုက်ပွဲအတွင်း စစ်ကောင်စီတပ်များမှ နယ်မြေ မပေးနိုင်ရန် လေကြောင်း၊ဒရုန်း ၊ လက်နက်ကြီး အမြောက်အများသုံးစွဲခဲ့ရာတွင် လွိုင်ကော် ဒေသခံ ပြည်သူ့ကာကွယ်ရေးတပ်မှ ရဲဘော် ၃ ဦး ထိခိုက် ဒဏ်ရာရရှိခဲ့ပြီး တစ်ဦးစိုးရိမ်ရကာ ၊ KNDF ၊KNPLF၊ ရှမ်းတောင်အခြေစိုက်တပ်များ မှလည်း ထိခိုက်ကျဆုံးမှုရှိခဲ့ကြောင်း သိရသည်။
စစ်ကောင်စီသည် ကရင်နီဒေသတွင်း ဆုံးရှုံးခဲ့ရသောနယ်မြေများကို ပြန်လည်ရရှိရန် ယခုနှစ်လည်ပိုင်းကစ၍ ပြန်လည်ထိုးစစ်ဆင်နေပြီး လွိုင်ကော်မြို့နှင့် ဒီးမော့ဆိုမြို့နယ်တို့တွင် တိုက်ပွဲများ နေ့စဥ်နီးပါး ဖြစ်ပွားနေသည်။
