ဇော်ရမ်း/People’s Spring
စစ်ကိုင်းတိုင်း၊ ကသာမြို့မှ စစ်ကောင်စီ၏ အမှတ်၃၀၉ ခြေမြန်တပ်ရင်း(ခမရ -၃၀၉)အနီး၌ ပြည်သူ့ကာကွယ်ရေးတပ်ဖွဲ့များနှင့် စစ်ကောင်စီစစ်ကြောင်း အောက်တိုဘာ ၆ ရက်နံနက်ပိုင်းက တိုက်ပွဲဖြစ်ပွားခဲ့သည်။
“ခမရ (၃၀၉)ထဲကနေ စစ်ကြောင်းထွက်လာလို့ တိုက်ပွဲဖြစ်တာ။ ၁နာရီလောက်အထိကြာပါတယ်။ ထိခိုက်မှုအခြေအနေကတော့ စုံစမ်းဆဲဖြစ်ပါတယ်ဟု ကသာမြို့မှ ပြည်သူ့ကာကွယ်ရေးတပ်ဖွဲ့ဝင်တဦးကပြောသည်။
Public Service Announcement
တိုက်ပွဲဖြစ်ပွားသည့်နေရာသည် (ခမရ ၃၀၉)နှင့်နီးသလို အင်းတော်-ကသာလမ်းပိုင်းမှ အောင်ဘုံကျေးရွာနှင့် တံတားဦးကျေးရွာကြား၌ ဖြစ်သည်။ နံနက် ၁၁နာရီခန့်၌ တိုက်ပွဲစတင်ခဲ့ပြီး နေ့လယ် ၁၂နာရီခန့်တွင် စစ်ကောင်စီစစ်ကြောင်းပြန်လည်ဆုတ်ခွာသွားသည်ဟု သိရသည်။
ကသာမြို့တွင် ပြီးခဲ့သည့် ဇွန်လက တိုက်ပွဲနောက်ဆုံးဖြစ်ခဲ့ပြီး ယခုတစ်ကြိမ် ထပ်မံဖြစ်ပွားခြင်းဖြစ်သည်။ကသာနှင့်ထီးချိုင့်မြို့ကြား ဝဲကြီးကျေးရွာအနီးတွင်ဇွန်လ ၁၃ရက်က တိုက်ပွဲအပြင်းအထန်ဖြစ်ပွားခဲ့ပြီး စစ်ကောင်စီတပ်ဖွဲ့ဝင်ငါးဦးသေဆုံးကာ စစ်ကောင်စီလေကြောင်းတိုက်ခိုက်မှုကြောင့် အရပ်သားသုံးဦးဒဏ်ရာရခဲ့သည်။
အောက်တိုဘာ ၆ ရက်တိုက်ပွဲနှင့်ပတ်သက်၍ စစ်ကောင်စီဘက်မှ ထိခိုက်မှုအခြေအနေကို အသေးစိတ်မသိရှိရသေးပေ။ ပြည်သူ့ကာကွယ်ရေးတပ်ဖွဲ့ဝင်များထိခိုက်မှုမရှိခဲ့ဟုသိရသည်။
ကသာမြို့နှင့် ထိစပ်မြို့နယ်များဖြစ်သော အင်းတော်နှင့် ထီးချိုင့်မြို့တွင်လည်း စစ်ကောင်စီနှင့်ပြည်သူ့ကာကွယ်ရေးတပ်ဖွဲ့များ စစ်ရေးတင်းမာနေသည်။
ထိုအတောအတွင်း ကသာ ခမရ (၃၀၉)မှ ဗိုလ်ကြီးတစ်ဦးသည်စက်တင်ဘာလ ၃၀ရက်က ဘုတလင်မြို့နယ်၌ဖြစ်ပွားခဲ့သည့်တိုက်ပွဲအတွင်း ပြည်သူ့ကာကွယ်ရေးတပ်ဖွဲ့များ၏ဖမ်းဆီးခြင်းကို ခန့်ထားရသည်။ ထိုတိုက်ပွဲတွင်စစ်သား ၃၀ ကျော်သေဆုံးပြီး စုစုပေါင်း စစ်သုံ့ပန်း ၄၃ဦးကို ပြည်သူ့ကာကွယ်ရေးတပ်ဖွဲ့များကဖမ်းမိခဲ့ခြင်းဖြစ်သည်။
