အင်ကြင်း/People’s Spring
မန္တလေးတိုင်း၊ မြင်းခြံမြို့နယ်၊ ကျောက်ကန်ပျူစောထီးရွာစခန်းအား တော်လှန်ရေးပူးပေါင်းတပ်များက အပြီးသတ်သိမ်းယူခဲ့ကြောင်း ပြည်သူ့လွတ်မြောက်ရေးတပ်မတော်က သတင်းထုတ်ပြန်သည်။
အောက်တိုဘာ ၇ရက် နံနက် ၅ နာရီခွဲခန့်ကစ၍ မြင်းခြံမြို့နယ်၊ ကျောက်ကန်ပျူစောထီး ကျေးရွာအား တော်လှန်ရေးပူးပေါင်းတပ်ဖွဲ့များမှ ဝင်ရောက်တိုက်ခိုက်ခဲ့ရာ တိုက်ပွဲပြင်းထန်ခဲ့သည်။
Public Service Announcement
နံနက် ၁၁နာရီခန့်တွင် အပြီးသတ် သိမ်းယူနိုင်ခဲ့ပြီး ခဲယမ်းအမြောက်အများ သိမ်းဆည်းရရှိခဲ့ကြောင်း ပြည်သူ့လွတ်မြောက်ရေးတပ်မတော်-အနောက်မြောက်စစ်ဒေသ(အမှတ် ၈၁၅ တပ်ဖွဲ့)က အောက်တိုဘာ၈ရက်တွင် အသိပေးသည်။
တိုက်ပွဲဖြစ်စဥ်နှင့်ပတ်သက်၍ ကာကွယ်ရေးအဖွဲ့များက အသေးစိတ်ထုတ်ပြန်ခြင်းမရှိသေးပေ။
“တိုက်ပွဲက သိရသလောက် အခြေအနေကောင်းတယ်။”ဟု မြင်းခြံခရိုင်အခြေစိုက် တော်လှန်ရေးရဲဘော်တစ်ဦးက ပြောသည်။
တိုက်ပွဲတွင် စစ်အုပ်စု ထိခိုက်သေဆုံးမှုရှိပြီး စစ်ကောင်စီက လေကြောင်း ပစ်ခတ်မှုကြောင့် ဒေသခံ ပြည်သူနှစ်ဦး သေဆုံးခဲ့ကြောင်း ကာကွယ်ရေးတပ်ဖွဲ့များက ပြောသည်။
ထို့အပြင် ကျောက်ကန်ပျူရွာသို့ စစ်ကူလာသည့် ခြေလျင်စစ်ကြောင်းနှင့် ကျောက်ပြုတ်ကျေးရွာမြောက်ဘက်အထွက် ဘုရားကုန်းမှ လက်နက်ကြီးပစ်ကူပေးနေသော စစ်ကောင်စီတပ်အား တိုက်ခိုက်ခဲ့ရာ ထိခိုက်သေဆုံးမှုရှိကြောင်း ကာကွယ်ရေးတပ်ဖွဲ့များက ပြောသည်။
“စစ်ကူစစ်ကြောင်းက မြင်းခြံကလာတဲ့ စစ်ကြောင်းပါ။ အထူးသဖြင့် သီတာယုမွန်တပည့်တွေပါပါတယ်။ အင်အားကတော့တစ်ရာလောက်တော့ရှိမယ်။”ဟု Myingyan Black Tiger(MBT)တပ်ဖွဲ့ခေါင်းဆောင် ဗိုလ်မိုက်ခဲက ပြောသည်။
အောက်တိုဘာ ၆ ရက် ညကလည်း မြင်းခြံမြို့အထွေထွေအုပ်ချုပ်ရေးမှူးရုံးရှိ စစ်ကောင်စီ တပ်သားများအား လက်ပစ်ဗုံးဖြင့် ပစ်ခတ် တိုက်ခိုက်ခဲ့ရာ စစ်သား၂ဦး ဒဏ်ရာရရှိခဲ့ကြောင်း ဗိုလ်မိုက်ခဲက ပြောသည်။
စစ်ကောင်စီတပ်သည် တော်လှန်ရေးအားကောင်းသည့် မြင်းခြံခရိုင်၌ စစ်ကြောင်းထိုးသတ်ဖြတ်မှုများ ပြုလုပ်နေပြီး စက်တင်ဘာအတွင်းက မြင်းခြံခရိုင်ပကဖဒုခေါင်းဆောင် ကိုအီးတီအပါအဝင် ၈ ဦးကို သတ်ဖြတ်ခဲ့သည်။
ထို့အပြင် စစ်ကောင်စီတပ်က စက်တင်ဘာ ၂၂ ရက် နံနက်ပိုင်းက မြင်းခြံမြို့နယ်၊ ခြေဆေးရွာအား လေကြောင်းမှ နှစ်ကြိမ် ဗုံးကြဲတိုက်ခိုက်ခဲ့ရာ အမျိုးသမီးတစ်ဦးသေဆုံးပြီး ၄ ဦး ဒဏ်ရာရရှိခဲ့သည်။
သြဂုတ်၁၀ရက်က မြင်းခြံခရိုင်အထူးစစ်ဆင်ရေးစတင်ပြီးနောက်ပိုင်း မြင်းခြံ၊ နွားထိုးကြီး၊ တောင်သာမြို့နယ်များရှိ စစ်ကောင်စီတပ်စွဲရာနေရာအများအပြား တိုက်ခိုက်ခံရပြီး စစ်ကောင်စီအုပ်ချုပ်ရေးယန္တရားပါ ပြိုလဲခဲ့သည်။ စစ်ကောင်စီလည်း ကျေးရွာအများအပြားအား လေကြောင်းတိုက်ခိုက်မှုများ ပြုလုပ်ခဲ့၍ ဒေသခံပြည်သူထိခိုက်သေဆုံးမှုများရှိနေသည်။
