အိမ်သွင်/People’s Spring
ကလေးမြို့ အမြောက်တပ်မှချင်းတောင်ခြေဘက်သို့ ပစ်ခတ်နေသည့် အမြောက်များမှ မီးပွားများ ကလေးမြို့ပေါ်ရပ်ကွက်များအတွင်းကျရောက်နေ၍ မီးဘေးသတိပြုကြရန် ပြည်သူ့ကာကွယ်ရေးတပ်ဖွဲ့ဝင်များက သတိပေးနေသည်။
စစ်ကောင်စီသည် ယခုရက်ပိုင်းအတွင်း ချင်းတောင်ခြေဘက်သို့ လက်နက်ကြီးများပစ်ခတ်နေပြီး ယနေ့(နိုဝင်ဘာ ၁၀ရက်နေ့)တွင်လည်း မစ်ဇိုင်းများ သုံး၍ ပစ်ခတ်နေသည်ဟုပြည်သူ့ ကာကွယ်ရေးတပ်ဖွဲ့ဝင်တဦးက ပြောသည်။
“လမ်းပေါ် ရှိနေချိန် ဒုံးကျည်က ပစ်တာ။ အိမ်ကိုမပြန်ရဲတော့အထိ ကြောက်ရတာ။ ခြေတွေလက်တွေတုန်ပြီး လန့်နေရတာ။ ဒုံးကျည်နဲ့အတူမီးပွါးတွေကျနေတယ် အိမ်တွေပေါ်ကို” ဟု မြို့ခံတဦးကလည်းပြောသည်။
Public Service Announcement
ကလေးမြို့အနီး ချင်းတောင်ခြေတွင် ထူးခြားသည့် စစ်ရေးလှုပ်ရှားမှုမရှိဘဲ စစ်ကောင်စီက ပစ်ခတ်နေခြင်းဖြစ်သည်ဟု ဒေသခံအချို့က ပြောသည်။
စစ်ကောင်စီတပ်ကလက်နက်ကြီးပစ်ခတ်စဥ် လွင့်စင်ကျလာသော အစအနများသည်မီးလောင်လွယ်ပြီး ကလေးမြို့ပေါ်နေရယအချို့တွင် ယမ်းနံ့များ ပျံ့နေကြောင်း သိရသည်။ နိုဝင်ဘာ၁၀ ရက်တွင် နံနက် ၈နာရီခွဲခန့်မှစတင်၍ ည ၈နာရီခွဲခန့်အထိ ၂၅ လုံးထက်မနည်း ပစ်ခတ်ခဲ့ကြောင်း ဒေသခံများကပြောသည်။
” အခုထိကို ပစ်နေတုန်းပါ။ စိတ် ရော လူပါ လုံးဝမလုံခြုံတော့ဘူး” ဟု မြို့ခံတစ်ဦးကပြောသည်။
