အိမ်သွင်/People’s Spring
မြန်မာနိုင်ငံအထက်ပိုင်းဒေသများတွင် ဒီဇင်ဘာလ ပထမလပတ်အတွင်း အအေးပိုလာနိုင်ကြောင်း အမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)ထုတ်ပြန်သည်။
ဒီဇင်ဘာလ ၂ရက်မှ ၈ရက်အတွင်း မြန်မာနိုင်ငံ၌ အအေးပိုလာနိုင်ကြောင်း MOHADMက နိုဝင်ဘာ၂ ရက်တွင် ခန့်မှန်းသတိပေးထားသည်။
မြန်မာနိုင်ငံအထက်ပိုင်းနှင့် အလယ်ပိုင်းတို့တွင် မြောက် – အရှေ့မြောက်ဘက်မှလေများပြောင်းလဲတိုက်ခတ်လာနိုင်ပြီး အထက်ပိုင်းဒေသများတွင် အပူချိန်များလျော့ကျလာကာ ပြန်အေးလာနိုင်သည်ဟု သိရသည်။
Public Service Announcement
မြန်မာနိုင်ငံအထက်ပိုင်းဒေသများတွင် ကချင်ပြည်နယ်၊ စစ်ကိုင်းတိုင်းအထက်ပိုင်းဒေသများ၊ ယင်းဒေသနှင့်ဆက်စပ်နေသည့် ချင်းပြည်နယ်မှမြို့နယ်အချို့၊ ကချင်ပြည်နယ်နှင့်ဆက်စပ်နေသော ရှမ်းပြည်နယ်မှ မြို့နယ်အချို့ပါဝင်သည်။
အဆိုပါ ဒေသများသည် လက်ရှ်ိ စစ်အာဏာရှင်တော်လှန်ရေးတိုက်ပွဲများကြောင့် နေရပ်စွန့်ခွာထွက်ပြေးနေရသည့် စစ်ဘေးရှောင်အများအပြားရှိနေသည်။
အအေးပိုလာသည့်အခြေအနေကြောင့် စစ်ဘေးရှောင်များအား အကူအညီများပိုမိုပေးအပ်ကြရန် အရပ်ဖက်လူမှု့အဖွဲ့အစည်းများက ပြောသည်။
” ဆောင်းရာသီမို့ အရင်ထက် အေးလာမှာကတော့ သိတဲ့အတိုင်းပဲ။ ကိုယ်က လုံလုံခြုံခြုံရှိတဲ့အရပ်မှာ အိပ်စက်ခွင့်ရနေတယ်ဆိုရင် စစ်ဘေးသင့်ဒေသတွေမှာ ဘယ်လိုအခြေအနေရှိနေမလဲဆိုတာ သတိရပေပြီး တတ်နိုင်သလောက်အကူအညီတွေပေးစေချင်ပါတယ်” ဟု ကချင်ပြည်နယ်၊ ဗန်းမော်မြို့မှ လူမှုကယ်ဆယ်ရေး လုပ်ဆောင်သူတစ်ဦးကပြောသည်။
မြန်မာနိုင်ငံအထက်ပိုင်းဒေသများမှ မြို့နယ်၄၀ခန့်ကို တော်လှန်ရေးအင်အားစုများကထိန်းချုပ်ထားပြီး အဆိုပါဒေသများတွင် နေရပ်စွန့်ခွာနေရသူဦးရေ သိန်းချီရှိနေသည်။ လက်ရှိတွင် မြို့နယ်အချို့၌တိုက်ပွဲများဆက်ဖြစ်နေသလို စစ်ကောင်စီ စစ်ကြောင်းများကလည်း နေအိမ်များကို မီးရှို့ဖျက်ဆီးမှုနှင့် လေကြောင်းတိုက်ခိုက်မှုများ ရှိနေသည်။
လက်ရှိတွင် ဒေသတွင်းမှထွက်ရှိသည့် သားငါးနှင့်သီးနှံများကြောင့် စားနပ်ရိက္ခာအတွက် အရေးပေါ်အခြေနေမဟုတ်သော်လည်း ဆေးဝါးပြတ်လပ်မှုများကြောင့် စစ်ရှောင်များသည် ကျန်းမာရေးဆိုင်ရာ ပြဿနာများရင်ဆိုင်နေကြရသည်။ဆေးဝါးကိုအမျိုးသားညီညွတ်ရေးအစိုးရ နှင့် တော်လှန်ရေးအင်အားစုများက အထောက်အပံ့များ ပေးနေသော်လည်း လိုအပ်ချက်များကြီးမားနေဆဲဟု စစ်ဘေးရှောင်များကပြောသည်။
” စစ်အာဏာရှင်ကိုနည်းမျိုးစုံတော်လှန်နေကြရာမှာ ကျမတို့ဒေသတွေကတော့ စစ်တလင်းလိုဖြစ်နေတာပေါ့။ဒါကြောင့် ဒေသအသီးသီးကပြည်သူတွေရဲ့အကူအညီတွေကို ကျွန်မတို့မျှော်လင့်ပါတယ်။ အတူတူ ရုန်းကန်ကြရမယ်လို့ ကျွန်မတို့ယုံကြည်ထားတယ်”ဟု စစ်ကိုင်းတိုင်းအထက်ပိုင်း၊ ကလေးမြို့မှဒေသခံတစ်ဦးကပြောသည်။
ကုလသမဂ္ဂလူသားချင်းစာနာမှုဆိုင်ရာရုံး (UNOCHA)က မြန်မာနိုင်ငံတွင်း စစ်ရေးပဋိပက္ခများနှင့် လက်နက်ကြီး၊ လေကြောင်းရန်များကြောင့် နေရပ်စွန့်ခွာထွက်ပြေးနေရသူ စုစုပေါင်း ၃ ဒဿမ ၄ သန်းအထိ တိုးလာပြီး အရေးပေါ်အကူအညီများလိုအပ်နေကြောင်း နိုဝင်ဘာလ ၂၇ ရက်နေ့တွင် ထုတ်ပြန်ထားသည်။
MOHADM၏ သတိပေးချက်တွင် ဒီဇင်ဘာလ ၂ရက်မှ ၇ရက်အတွင်း မြန်မာနိုင်ငံအထက်ပိုင်းဒေသများ၌ အအေးပိုနိုင်ပြီး ဒီဇင်ဘာလ၈ရက်မှစ၍ မြန်မာနိုင်ငံလယ်ပိုင်းဒေသများပါ ပုံမှန်ထက်အေးလာနိုင်သည်ဟု ထုတ်ပြန်ထားသည်။
(အညာဒေသမှ စစ်ဘေးရှောင်ပြည်သူများ။ ဓါတ်ပုံ- ရေဦးမြို့နယ် စစ်ရှောင်ပြည်သူထောက်ပံ့ရေး)
