ဟန်နွေ/People’s Spring
ကချင်လွတ်လပ်ရေးတပ်မတော်(KIA)နှင့် မဟာမိတ်တပ်များက ကချင်ပြည်နယ် ဗန်းမော်မြို့သိမ်းတိုက်ပွဲထိုးစစ်ဆင်လျက်ရှိရာ စစ်ဆင်ရေး ၇ရက်မြောက်နေ့ဖြစ်သည့် ဒီဇင်ဘာ ၁၀ရက်တွင် တိုက်ပွဲဆက်လက်ပြင်းထန်နေကြောင်း စစ်ရေးသတင်းရင်းမြစ် အချို့က ပြောသည်။
ဒီဇင်ဘာ ၄ရက်နေ့မှစတင်ခဲ့သည့် ဗန်းမော်မြို့သိမ်းတိုက်ပွဲတွင် ဒီဝင်ဘာ ၁၀ ရက်အထိ့တိုက်ပွဲပြင်းထန်နေသလို မြို့နေရာအတော်များများ၌ မီးလောင်နေကြောင်း စစ်ရေးသတင်းရင်းမြစ်တစ်ဦးက ပြောပြသည်။
“ဗန်းမော်မြို့ ပတ်လည် ၅နေရာလောက် တိုက်ပွဲဖြစ်နေတယ်။ လေယာဥ်ဗုံးကြဲတာ အိမ်တစ်အိမ်ကို ထိမှန်လို့ မိသားစု တစ်ခုလုံး သေဆုံးသွားတယ်လို့ ကြားရတယ်” ဟု သတင်းရင်းမြစ်က ပြောသည်။
Public Service Announcement
တိုက်ပွဲကြောင့် မြို့ခံသောင်းနှင့်ချီ၍ စစ်ဘေးတိမ်းရှောင်နေကြပြီး စစ်မရှောင်နိုင်သည့် ပြည်သူအချို့ ကျန်နေသည်။
အခြားသတင်းရင်းမြစ်တစ်ဦးကလည်း “မြို့ပြင် တပ်(စစ်ကောင်စီတပ်)ဘက် တိုက်နေတယ်” ဟု ဒီဇင်ဘာ ၁၀ရက် တိုက်ပွဲ အခြေအနေကို ပြောပြသည်။
ဒီဇင်ဘာ ၁၀ရက် တိုက်ပွဲတွင် စစ်ကောင်စီတိုက်လေယာဉ် တစ်စီးကို KIAက ပစ်ခတ်ခဲ့ရာ လေယာဉ်နောက်ပိုင်း ထိမှန် မီးခိုးအူပြီး မြစ်ကြီးနား လေတပ်သို့ ဆင်းသက်သွားဟု ကချင်စစ်ရေးသတင်းရင်းမြစ်က လူမှုကွန်ရက်တွင် ရေးသားထားသည်။ မြစ်ကြီးနားလေတပ်ဆင်းသော YAK-130 တိုက်လေယာဉ်ကို ဗန်းမော်ဘက် ရှေကတန်းရောက် KIA ရဲဘော်များက ပွိုင့်ဖိုက်ဖြင့် ပစ်ခတ်ရာ နောက်မှီး ထိမှန်ပြိး လေတပ်အတွင်း မီးခိုးအူ ဆင်းသက်သွားသည်ဟုရေးသားထားခြင်းဖြစ်သည်။
YAK-130 တိုက်လေယာဥ် ကျည်ထိမှန်ခဲ့ခြင်းနှင့်ပတ်သက်ပြီး သတင်းရင်းမြစ် ၂ဦးအား မေးမြန်းရာ တစ်ဦးက ဖြစ်နိုင်သည်ဟု ပြောသည်။
အခြား ကချင်စစ်ရေးသတင်းရင်းမြစ်တစ်ဦးကလည်း ” အဲဒီလို့ပဲကြား။ ဒီနေ့” ဟု လေယာဉ် ကျည်ထိမှန်ဆင်းသက်မှု ဖြစ်စဉ် မေးမြန်းချက်အား ပြောပြသည်။
KIA အနေဖြင့် ယခုနှစ် ဇန်နဝါရီလ ရှမ်းမြောက် ကွတ်ခိုင်မြို့နယ် နမ့်ဖက်ကာ တိုက်ပွဲတွင် စစ်ကောင်စီတိုက်လေယာဉ် တစ်စီးကို ပျက်ကျအောင် ပစ်ချနိုင်ခဲ့သည်။ ထို့ပြင် စစ်ကောင်စီ ရဟတ်ယာဉ်ကိုလည်း ယခုနှစ် ဇန်နဝါရီတွင် ပစ်ချထားနိုင်ခဲ့သည်။
ဒီဇင်ဘာ ၉ရက် တိုက်ပွဲတွင် ဗန်းမော် တက္ကသိုလ်နယ်မြေ ရှိ စစ်ကောင်စီ တပ်စွဲရာနေရာကို ထပ်မံ သိမ်းပိုက်ခဲ့ပြီး မိုးမောက်-ဗန်းမော်ကြား ၆မိုင်နေရာမှ ခဲယမ်းများ သိမ်းရခဲ့ကြောင်း၊ KIA ပူးပေါင်းတပ်များက ဗန်းမော်မြို့တွင်း ရှင်းလင်းရေး ဆက်လက်လုပ်ဆောင်နေကြောင်း စစ်ရေးသတင်းရင်းမြစ်တစ်ဦးက အသိပေးထားသည်။ စစ်ကောင်စီဘက်ကလည်း လေကြောင်း ပစ်ကူ၊ လေကြောင်းမှ ထောက်ပံ့မှုများ ဆက်လက်ပြုလုပ်လျက်ရှိသည်ဟုသိရသည်။
KIA ပူးပေါင်းတပ်သည် မံစီရှိ စစ်ကောင်စီ လက်ကျန်စခန်း အချို့ကိုလည်း ထိုးစစ်ဆင်လျက်ရှိရာ ပိတ်ဆို့ထိန်းချုပ်ထားနိုင်သည့် အခြေအနေဟုလည်း သတင်းရင်းမြစ်က ပြောသည်။ မံစီမြို့ကို ယခုနှစ် မေလကတည်းက KIAက ထိန်းချုပ်ထားခြင်းဖြစ်သော်လည်း လက်ကျန် စစ်ကောင်စီ တပ်ရင်းများကို ဗန်းမော်မြို့သိမ်းတိုက်ပွဲနှင့်အတူ တပြိုင်တည်း ထိုးစစ်ဆင်နေခြင်းဖြစ်သည်။
