စစ်သားအချို့သေဆုံးပြီး လက်နက်များသိမ်းရဟု KNDFပြော
စစ်သားအချို့သေဆုံးပြီး လက်နက်များသိမ်းရဟု KNDFပြောရဲခေါင်/People’s Spring
ကရင်နီပြည်နယ်၊ လွိုင်ကော်မြို့အဝင်၊အထွက်ရှိ ကင်းပုန်းအချို့ကို တိုက်ခိုက်ရာ စစ်ကောင်စီတပ်သားအချို့ သေဆုံးပြီး လက်နက်များရရှိကြောင်း ကရင်နီအမျိုးသားကာကွယ်ရေးတပ်(KNDF)မှ တာဝန်ရှိသူက လူထုနွေဦးသို့ ပြောသည်။
လွိုင်ကော်မြို့ကို စစ်ကောင်စီက ထိန်းချုပ်ပြီးနောက် တော်လှန်ရေးတပ်များ ပြန်လည်ထိုးစစ်ဆင်မှုကိုစောင့်ကြည်ရန် အပါအဝင် ရှမ်းပြည်နယ်တောင်ပိုင်းအစပ်ရှိ ဆီဆိုင်နှင့် မိုးဗြဲမြို့များမှ စစ်ကောင်စီတပ်က မြေပြင်အင်အား ဖြည့်တင်းရန် လွိုင်ကော်မြို့အဝင်၊အထွက် နေရာများတွင် ကင်းပုန်းများနှင့် ဝပ်ကင်းများချထားသည်ဟု ဆိုသည်။
“လွိုင်ကော်မြို့ အဝင်၊အထွက်မှာရှိတဲ့ စစ်ကောင်စီရဲ့တပ်စွဲထားတဲ့ ကင်းပုန်းတွေ၊ဝပ်ကင်းတွေ တော် လှန်ရေးတပ်ဖွဲ့ဘက်က ခြုံခိုတိုက်ခိုက်နေပါတယ်။စစ်ကောင်စီဘက်က သေဆုံးတာတွေရှိနေသလို လက်နက်တွေရတာတွေ ရှိပါတယ်”ဟု အထက်ပါတာဝန်ရှိသူက ပြောသည်။
Public Service Announcement
စစ်ကောင်စီကင်းပုန်းနှင့် ဝပ်ကင်းများ တိုက်ခိုက်ခံရမှုသည် လင်းဖုံလေးနှင့် ကုန်းဆွတ်ကျေးရွာတို့တွင်ဖြစ်ကြောင်း ကရင်နီစစ်ရေးသတင်းရင်းမြစ်အချို့က အသိပေးသည်။
“လင်းဖုံလေးက မိုးဗြဲ- လွိုင်ကော်လမ်းပိုင်းမှာရှိတယ်။ ကုန်းဆွတ်ရွာက ဆီဆိုင်-လွိုင်ကော်လမ်းပိုင်း ပေါ်မှာရှိတယ်။တိုက်ပွဲကတော့ ကြီးကြီးမားမားရယ် မရှိသေးဘူး။သက်ဆိုင်ရာလမ်းပိုင်းတွေကိုတော့ သူရှင်း ကိုယ်ရှင်း အနေအထားမျိုးပဲ”ဟု ကရင်နီအခြေစိုက် ပြည်သူ့ကာကွယ်ရေးတပ်ဖွဲ့ဝင်တစ်ဦးက ပြောသည်။
စစ်ကောင်စီသည် ကရင်နီပြည်နယ်ကို ထိန်းချုပ်ရေး ယခုနှစ်လယ်ပိုင်းကစ၍ ဆီဆိုင်-လွိုင်ကော်နှင့် ပင်လောင်း-ဖယ်ခုံ-မိုးဗြဲ -လွိုင်ကော် လမ်းပိုင်းများမှ မြေပြင်စစ်အင်အား ၃,၀၀၀ခန့် ဖြည့်တင်းထားသည်။
နိုဝင်ဘာ ၂၆ ရက်က မိုးဗြဲနှင့် လွိုင်ကော်လမ်းပိုင်းထိန်းချုပ်ရန် ကြိုးပမ်းသည့် စစ်ကောင်စီ၏ တပ်မ (၆၆)လက်အောက်ခံ ခလရ(၈၀)တပ်ရင်းကို ကရင်နီပူးပေါင်းတပ်က တိုက်ခိုက်ရာ စစ်ကောင်စီတပ်သား ၁၆ ဦးထက်မနည်းသေဆုံးပြီး ငါးဦး အရှင်ဖမ်းမိခဲ့သည်။ ထို့အပြင် လက်နက် ၂၀ ကျော်သိမ်းဆည်းရရှိခဲ့သေးသည်။
စစ်ကောင်စီ၏ ကရင်နီပြည်ကို ပြန်လည်ထိုး စစ်ဆင်မှုကို နှစ်ဆင့်တွေ့ရသည်။ယခုနှစ် မေနှင့် ဇွန်လ တို့တွင် ရှမ်းပြည်တောင်ပိုင်း ဆီဆိုင်မြို့မှ ကရင်နီပြည် လွိုင်ကော်မြို့သို့ မြေပြင်နှင့် ဝေဟင် ပူးတွဲ စစ်ကြောင်းစထိုးခဲ့သည်။ထိုစစ်ကြောင်းသည် လွိုင်ကော် အခြေစိုက်တပ်များနှင့် ဇူလိုင်အတွင်းပေါင်းစပ်နိုင်ခဲ့ပြီး ကရင်နီတပ်ပေါင်းစုများ၏ ထိန်းချုပ်နေရာအချို့ကို ပြန်လည်ရယူနိုင်ခဲ့သလို လွိုင်ကော်မြို့ကိုပါ စစ်အုပ်ချုပ်ရေးယန္တရားများ လည်ပတ်ရန် ကြိုပမ်းနေသည်။
ထို့နောက် စက်တင်ဘာလဆန်းပိုင်းတွင် ရှမ်းပြည်တောင်ပိုင်း ပင်လောင်းမြို့နယ်ကတဆင့် ဖယ်ခုံနှင့် မိုးဗြဲ မြို့မှ ၎င်းတို့ဆုံးရှုံးထားသည့် တပ်စခန်းနေရာများနှင့် မြို့ကို ပြန်လည်ထိန်းချုပ်နိုင်ရန်ထိုးစစ်ဆင်ခဲ့သည်။
စစ်ကောင်စီ၏ ဖယ်ခုံနှင့် မိုးဗြဲ မြို့ကိုတိုက်ခိုက်မှုသည် “မြေလှန် လှုပ်ရှားမှု”ဟု ကရင်နီစစ်ရေးလေ့လာသူများက သုံးသပ်သည်။မြေလှန်လှုပ်ရှားမှုဆိုသည်မှာ အရပ်သားပြည်သူနှင့် အိုးအိမ်များပါမချန် ရှင်းလင်းခြင်းဟု ၎င်းတို့က သတ်မှတ်သည်။
