ဇေအောင်/People’s Spring
စစ်ကိုင်းတိုင်း၊ မုံရွာမြို့တွင် အာဏာသိမ်းအပြီးကာလက ကဗျာဆရာတစ်ဦးအား မီးရှို့သတ်ဖြတ်ခဲ့သူအား ဖမ်းဆီးရမိထားကြောင်း မုံရွာမြို့နယ်ပြည်သူ့လုံခြုံရေးအဖွဲ့က ထုတ်ပြန်သည်။
မုံရွာမြို့တွင် ကဗျာဆရာ ဦးစိန်ဝင်းကို မီးရှို့သတ်ဖြတ်ခဲ့သော စစ်ကောင်စီ သတင်းပေး အောင်ကိုလတ်ဆိုသူအား ပြီးခဲ့သည့် ဒီဇင်ဘာ ၁၄ရက် နံနက်ပိုင်းက ဖမ်းဆီးရမိခဲ့ကြောင်း မုံရွာမြို့နယ် ပြည်သူ့လုံခြုံရေးအဖွဲ့၏ တာဝန်ရှိသူက ပြောသည်။
Public Service Announcement
“မုံရွာမြို့နယ်အတွင်းမှာပဲ ဖမ်းဆီးရမိတာပါ။ အသေးစိတ်ကတော့ စစ်ဆေးနေတုန်းပဲရှိပါသေးတယ်။”ဟု အထက်ပါတာဝန်ရှိသူက ပြောသည်။
ကဗျာဆရာဦးစိန်ဝင်းသည် ၂၀၂၁ မေလ ၁၄ ရက်က မုံရွာမြို့စက်မှုဇုန်၌ မီးရှို့သတ်ဖြတ်ခံခဲ့ရခြင်းဖြစ်သည်။
ဖမ်းဆီးရမိသော အောင်ကိုလတ်အား စစ်ဆေးမှုများပြုလုပ်ပြီးနောက် ပြစ်မှုပေါ်မူတည်၍ အရေးယူမှုများ ပြုလုပ်သွားမည်ဟုလည်း ၎င်းက ဆိုသည်။
မုံရွာမြို့နယ် ပြည်သူ့လုံခြုံရေးအဖွဲ့သည် စက်တင်ဘာအတွင်းကဖြစ်ပွားခဲ့သော ကျပ်သိန်းပေါင်းတစ်သောင်းခွဲခန့် ဓါးပြတိုက်ခံခဲ့ရသည့် နဝရက်ရွှေဆိုင်ဓါးပြမှုပါဝင်သူ ၇ ဦးကိုလည်း ဖမ်းဆီးရမိထားသည်။
ပြီးခဲ့သည့် စက်တင်ဘာအတွင်းကလည်း ပျူစောထီးများ၊ မုဒိမ်းမှုကျူးလွန်သူများနှင့် သန်းခေါင်စာရင်းကောက်ယူရာတွင် ပါဝင်သူတစ်ဦးတို့လည်း ဖမ်းဆီးခဲ့သေးသည်။
