အိမ်သွင်/People’s Spring
အမ်းမြို့တွင် နောက်ဆုံးကျန်သော အနောက်ပိုင်းတိုင်းစစ်ဌာနချုပ် (နပခ) မှ စစ်ကောင်စီတပ်သားများက အလံဖြူထောင်လက်နက်ချသောရုပ်သံမှတ်တမ်းတိုဖြင့် အမ်းနပခ ၏ ပကတိမြေပြင်အခြေအနေကို အာရက္ခတပ်တော်(AA)က ယနေ့ (ဒီဇင်ဘာလ ၁၆ရက်) ညတွင် ထုတ်ပြန်သည်။
“စောစော အလံဖြူထောင်လျှင် စောစော အသက်ရှင်ကျန်ရစ်စေမယ်။ မိသားစု၊ ဆွေမျိုးတို့ နှင့် စောစော တွေ့ဆုံရလိမ့်မယ်”ဟု ရေးသားထားပြီး စက္ကန့် ၅၀ ကျော်ကြာသော ရုပ်သံမှတ်တမ်းဖြင့် ထုတ်ပြန်ခြင်းဖြစ်သည်။
စစ်ကောင်စီတပ်ဖွဲ့ဝင်အများအပြား လက်နက်ချပြီး သုံးပန်းအဖြစ် ဖမ်းဆီးထားသည်ကို ရုပ်သံ၌တွေ့ရသည်။ အများစုသည် ဒဏ်ရာများရရှ်ိထားသလို အားနည်း စိတ်ဓါတ်ကျဆင်းနေသည့် ပုံစံတွေ့ရသည်။
Public Service Announcement
သုံ့ပန်းများ လမ်းလျှောက်နေချိန်၌ လေယာဉ်ပျံတဲနေသံကြားရပြီး သုံးပန်းများကလည်း အပေါ်ဘက်သို့မကြာခဏမော့ကြည့်နေကြသည်။
အမ်းမြို့တွင်နောက်ဆုံးလက်ကျန်ဖြစ်သည့် နပခကို AAက ထိုးစစ်ဆင်တိုက်ခိုက်နေပြီး သိမ်းပိုက်ရရှိပြီဖြစ်ကြောင်း သတင်းများထွက်ပေါ်နေချိန်၌ မြေပြင်အခြေအနေကို AAက ထုတ်ပြန်လာခြင်းဖြစ်သည်။
ထိုအပြင်AAကနပခကိုအပြီးသတ်သိမ်းပိုက်ရန်ထိုးစစ်ဆင်နေသောတိုက်ပွဲအတွင်း ထွက်ပြေးသည့် တိုင်းစစ်ဦးစီးချုပ် ဗိုလ်မှူးချုပ်ကျော်ကျော်သန်း ဦးဆောင်သည့် စစ်ကောင်စီတပ်ဖွဲ့မှာ နပခအနီးတောထဲတွင် AAစစ်ကြောင်းနှင့် ထိပ်တိုက်တိုးပြီး တိုက်ပွဲဖြစ်ပွားစဥ် ဗိုလ်မှူးချုပ်ကျော်ကျော်သန်းသေဆုံးသွားကြောင်း ရခိုင်စစ်ရေးသတင်းရင်းမြစ်က ပြောသည်။
“သူက နပခထဲကနေ ခုခံနေရင်းကနေ ထွက်ပြေးတာ။ နပခကို သိမ်းတာက လက်စမသတ်သေးဘူး။ ချနေရဆဲပဲ။ တိုင်းဦးစီးမှူးကတော့ သေတာ အမှန်ပါ။ သူနဲ့အတူ နောက်ထပ်၂၀ လောက်ပါတယ်”ဟု ၎င်းက ပြောသည်။
AA က အမ်းနပခ ကိုအပြီးသတ်ရန် အပြင်းအထန်ထိုးစစ်ဆင်နေပြီး အမ်းမြို့နယ်ရှိ အခြားသောတပ်ရင်းများ ၊ဌာနချုပ်များ ၊စခန်းများကို သိမ်းပိုက်ပြီးဖြစ်သည်။AA က အမ်းနပခ ကိုသိမ်းပိုက်ပြီးပါကစစ်ကောင်စီတပ်အတွက် ဒုတိယမြောက်တိုင်းစစ်ဌာနချုပ် လက်လွှတ်ဆုံးရှုံးရခြင်းဖြစ်လာမည်ဖြစ်သည်။ ပထမဆုံးတိုင်းစစ်ဌာနချုပ်ဆုံးရှုံးရမှုအဖြစ် ၂၀၂၄ သြဂုတ်လဆန်းတွင် MNDAA နှင့် မဟာမိတ်တပ်များကလားရှိုး ရမခကိုသိမ်းပိုက်ခဲ့ခြင်းဖြစ်သည်။
