“ကျွန်တော်အလေးပေးပြောချင်တာက အကြမ်းဖက်စစ်ကောင်စီရဲ့ ကျဆုံးခြင်းကို ဘယ်အရာကမျှ ရပ်တန့်နိုင်မှာမဟုတ်ပါဘူး” – သမ္မတရုံးပြောခွင့်ရ ဦးကျော်ဇော်
အီယိုရီ/People’s Spring
အမျိုးသားညီညွတ်ရေးအစိုးရ NUG ကြားကာလပြည်သူ့တရားစီရင်ရေးကော်မတီသည် အချို့မြို့နယ်များ၌ မိမိသဘောမိမိဆောင်၍ ကြေညာချက်များထုတ်ပြန်နေခြင်းအပေါ် ထိန်းကျောင်းနိုင်ရန် ပြင်ဆင်နေကြောင်း သမ္မတရုံးပြောရေးဆိုခွင့်ရှီသူ ဦးကျော်ဇော်က ယနေ့(ဒီဇင်ဘာ ၂၄ရက်)ပြောကြားလိုက်သည်။
ပြည်သူလူထုနှင့် နိုင်ငံတကာသို့ သတင်းစကားပြောကြားခြင်း(Press Briefing)အစီအစဥ်မှတဆင့် အချို့မြို့နယ်များ၌ မိမိသဘောမိမိဆောင်၍ ကြေညာချက်များထုတ်ပြန်နေခြင်းအပေါ် ထိန်းကျောင်းနိုင်ရန်အတွက် လိုအပ်သော မူဝါဒထုတ်ခြင်း၊ လမ်းညွှန်ချက်များ ချမှတ်ခြင်းတို့ကို ပြင်ဆင်ဆောင်ရွက်နေကြောင်း NUG သမ္မတရုံးပြောခွင့်ရက အသိပေးသည်။
မကြာသေးမီက မကွေးတိုင်းအတွင်း၌ ‘သေဒဏ်အထိချမှတ်နိုင်သော’အရေးယူမှုဆောင်ရွက်မည်ဆိုသော ကြေညာချက်အပါအဝင် NUG ၏ ပြည်သူ့အုပ်ချုပ်ရေးအဖွဲ့အချို့က အများပြည်သူဝေဖန်ထောက်ပြစရာ အမိန့်ကြေညာချက်များအား ထုတ်ပြန်ခဲ့သည်။ ဝေဖန်မှုများထွက်ပေါ်အပြီးတွင် အဆိုပါအမိန့်ကြေညာချက်များအား ရုတ်သိမ်းခြင်း၊ ပြင်ဆင်ခြင်းများ ပြုလုပ်ခဲ့ကြသည်။
Public Service Announcement
“တရားမဲ့မှုကို အဆုံးသတ်၊ တရားဥပဒေစိုးမိုးရေးကို ထူထောင်နိုင်ရန် အကြမ်းဖက်စစ်အာဏာရှင်စနစ်ကို အမြစ်ဖြုတ်ရမည်ဖြစ်ပါတယ်” ဟု သမ္မတရုံးပြောခွင့်ရ ဦးကျော်ဇော်က ပြောသည်။
NUG ထိန်းချုပ်နယ်မြေများတွင် ကြားကာလစီမံအုပ်ချုပ်မှုများမှာ ပိုမိုစနစ်ကျသော ဦးဆောင်မှု၊ ကြီးကြပ်မှု အချို့နေရာများတွင် လိုအပ်နေဆဲဖြစ်သည်ကို သိရှိပြီး တရားဥပဒေစိုးမိုးရေးဆိုင်ရာ ပြဿနာများကို အလေးအနက်ထား တတ်နိုင်သမျှ စုံစမ်းစစ်ဆေးနေကြောင်းနှင့် သက်ဆိုင်ရာဝန်ကြီးဌာနများမှ ပြစ်မှုကျူးလွန်သူများကို တာဝန်ခံမှု ရှိစေရန် ကြိုးပမ်းလုပ်ဆောင်နေကြောင်း ဦးကျော်ဇော်က အသိပေးသည်။
NUG တရားရေးဝန်ကြီးဌာနသည် အမှုပေါင်း ၁၈၀၀ ကျော်ကို လက်ခံရရှိပြီး အမှုပေါင်း ၁၀၂၀ ကို ကြားနာစစ်ဆေးကာ သက်ဆိုင်ရာတရားရုံးများမှ တရားဥပဒေနှင့်အညီ အပြစ်ရှိသူများအား ထိရောက်ပြစ်ဒဏ်များချမှတ်ခဲ့ပြီးဖြစ်ကြောင်း ဦးကျော်ဇော်က ဆိုသည်။ စုစုပေါင်း အမှုပြီးပြတ်မှုရာခိုင်နှုန်းမှာ ၅၅ရာခိုင်နှုန်းဖြစ်သည်ဟု ဆက်ပြောသည်။
NUG သည် NUCC(အမျိုးသားညီညွတ်ရေးအတိုင်ပင်ခံကောင်စီ)နှင့် လက်တွဲဆောင်ရွက်ပြီး အသွင်ကူးပြောင်းရေးဆိုင်ရာ တရားမျှတမှု မူဝါဒရေးဆွဲရေးနှင့် တရားမျှတမှုရရှိစေရန် ကြိုးပမ်းလျှက်ရှိကြောင်း သိရသည်။
ထို့အပြင် အဖက်ဖက်မှ စစ်ရှုံးနေသော အကြမ်းဖက်စစ်ကောင်စီသည် ကြံရာမရ အစွန်းရောက်လုပ်ဆောင်မှုများကို ပိုမိုလုပ်ဆောင်လာနေကြောင်းနှင့် အသက်မပြည့်သေးသည့် လူငယ်များပါမကျန် အတင်းအဓမ္မစစ်သားစုဆောင်းမှုများ ပြုလုပ်နေကြောင်း NUGသမ္မတရုံးပြောရေးဆိုခွင့်ရှိသူက ပြောသည်။
အတင်းအဓမ္မ စစ်မှုထမ်းခိုင်းခြင်းကို ရှောင်နိုင်ရန် ကြိုးစားနေသော လူငယ်များကို NUG က တတ်နိုင်သမျှ ကူညီပေးနေပြီး NUG ၏ တယ်လီဂရမ်ချန်နယ်ဖြစ်သည့် @nugpublicaffaisbot မှတဆင့် ဆက်သွယ်ကာ အကြံဥာဏ် တောင်းခံခြင်း၊ တိုင်ကြားခြင်းများ လုပ်ဆောင်နိုင်ကြောင်း ဦးကျော်ဇော်က ဆက်ပြောသည်။
“ကျွန်တော်အလေးပေးပြောချင်တာက အကြမ်းဖက်စစ်ကောင်စီရဲ့ ကျဆုံးခြင်းကို ဘယ်အရာကမျှ ရပ်တန့်နိုင်မှာမဟုတ်ပါဘူး” ဟု ဦးကျော်ဇော်က ဆိုသည်။
