ထိုင်းက မြန်မာအတွက် ကာလဝမ်းရောဂါ ဆေးဝါးတွေ ထောက်ပံ့ပေးပို့

ထိုင်းပြည်သူ့ကျန်းမာရေး ဝန်ကြီးဌာနဟာ အိမ်နီးချင်း မြန်မာနိုင်ငံဆီ ကာလဝမ်းရောဂါဆိုင်ရာ ဆေးဝါးတွေ ထောက်ပံ့ ပေးပို့ခဲ့ကြောင်း အတည်ပြု ထုတ်ပြန်ခဲ့ပါတယ်။

ထိုင်းနဲ့ နယ်စပ်ထိစပ်ရာ မြဝတီ မြို့နယ်ထဲမှာရှိတဲ့ ရွှေကုက္ကိုမြို့မှာ ကာလဝမ်းရောဂါ ဖြစ်ပွားသူ ၃၀၀ ထက်မနည်း တွေ့ရှိထားပြီး ထိုင်းဖက်ခြမ်းမှာလည်း ဒီဇင်ဘာ ၂၅ ရက်နေ့ထိ အခြေအနေအရ ပိုးတွေ့လူနာ ၄ ဦးထိ စိစစ် အတည်ပြုထားနိုင်ပါတယ်။ ၄ ယောက်စလုံးဟာ မဲဆောက်မှာဖြစ်ပြီး မြန်မာ ၂ ဦးနဲ့ ထိုင်း၂ ဦးပါ။

မြန်မာရဲ့ ရန်ကုန်၊ မန္တလေးလို မြို့ကြီးတွေနဲ့ ရခိုင်ပြည်နယ်ထဲမှာလည်း ကာလဝမ်းရောဂါ ဖြစ်ပွားမှုတွေ ရှိနေတယ်လို့ ထိုင်းပြည်သူ့ ကျန်းမာရေး ဝန်ကြီးဌာနက ဆိုပါတယ်။

အခုသီတင်းပတ်မှာတော့ ထိုင်းဟာ ကာလဝမ်းရောဂါ လူနာ ၂၄၀၀ လောက်ကို ကုသနိုင်ဖို့ လုံလောက်မယ့် ဆေးပြား ၂၄၀၀၀၊ လူ ၁၅၀၀ နီးပါး အတွက် ကာလဝမ်းရောဂါ ကာကွယ်ဆေးတွေကို မြန်မာနိုင်ငံဆီ ပေးပို့ခဲ့ကြောင်း သိရပါတယ်။ ဒါ့အပြင် ကာကွယ်ဆေး ယူနစ် နောက်ထပ် ၃၅၀၀ ကိုလည်း လာမယ့်သီတင်းပတ်မှာ ပေးပို့ဖို့ စီစဉ်ထားပါတယ်။ အဲဒီ ကာကွယ်ဆေးတွေဟာ ကာလဝမ်းရောဂါ ကူးစက်မှုကို ဟန့်တားနိုင်တဲ့ ကိုယ်ခံစွမ်းအားမျိုး ၆ လစာလောက် ရရှိစေမှာ ဖြစ်ပါတယ်။

Public Service Announcement

မြန်မာနိုင်ငံရဲ့ ဒေသအနှံ့မှာတော့ စုစုပေါင်း ကာလဝမ်းရောဂါ ခံစားရသူ ၇၀၀၀ လောက်ထိ ရှိနှင့်ခဲ့ပြီးပြီလို့လည်း ထိုင်းပြည်သူ့ကျန်းမာရေး ဝန်ကြီးဌာနက ခန့်မှန်းခဲ့ပါတယ်။

ထိုင်းအစိုးရက မြန်မာဖက်ခြမ်းကနေ ကာလဝမ်းရောဂါ ပျံ့နှံ့လာမယ့် အခြေအနေတွေကို လျှော့ချဖို့အတွက် နယ်စပ်မှာ အစစ်အဆေး အစီအမံတချို့ ပိုတင်းကျပ်ခဲ့ပြီး ပြည်သူတွေ အနေနဲ့လည်း သားငါး သီးနှံတွေကို သေချာကျက်အောက် ချက်ပြုတ် စားသောက်ကြဖို့ နှိုးဆော်ထားပါတယ်။

ထိုင်းစစ်တပ်ကလည်း နယ်စပ်တလျှောက် တောလမ်းတွေမှာ မြန်မာဖက်က ရွှေ့ပြောင်း ဝင်ရောက်မှုတွေကို ပိုပြီး အလေးထား စောင့်ကြည့်နေတယ်လို့ ပြောပါတယ်။

ရွှေကုက္ကိုနဲ့ ထိစပ်ရာ တက်ခ်ပြည်နယ်ထဲမှာတော့ ကာလဝမ်းရောဂါ တားဆီးရေး ပညာပေး လုပ်ငန်းတွေ အကောင်အထည်ဖော် ဆောင်ရွက်နေသလို လက်ဆေးဖို့၊ အစားအသောက်တွေကို လက်နဲ့ စားမယ့်အစား သန့်ရှင်းတဲ့ ဇွန်း၊ ခက်ရင်းတွေ အသုံးပြုဖို့ တာဝန်ရှိသူတွေက လိုက်လံ ဆော်ဩနေတယ်လို့ သိရပါတယ်။

ကိုးကား: Bangkok Post