လူပျောက်တိုင်ကြားထားတဲ့ ကိစ္စတွေနဲ့ ဆက်စပ်ပြီး သံသယရှိသူ ၁၂ ဦးကို ထိုင်းနဲ့ တရုတ် ရဲတပ်ဖွဲ့တွေ ပူးပေါင်းပြီး ဖမ်းဆီးခဲ့တယ်လို့ သိရပါတယ်။
ကျားဖြန့် ငွေလိမ်ဂိုဏ်းတွေနဲ့ ဆက်စပ်တဲ့ လူကုန်ကူးမှုတွေမှာ သားကောင်ဖြစ်ခဲ့တယ်လို့ ယုံကြည်ရတဲ့ တရုတ် နိုင်ငံသားတွေ အရေးကိုထိုင်းနဲ့ ပူးပေါင်း စုံစမ်းမှုတွေ ပြုလုပ်နေကြောင်း၊ အဲဒီ အမှုတွေနဲ့ ဆက်နွှယ်ပြီး သံသယရှိသူ နိုင်ငံသားနဲ့ နိုင်ငံခြားသား ၁၂ ဦးကို နှစ်နိုင်ငံ ရဲတပ်ဖွဲ့တွေ ပူးပေါင်း ဖမ်းဆီးထားကြောင်း တရုတ် ပြည်တွင်းလုံခြုံရေး ဝန်ကြီးဌာနက ဇန်နဝါရီ ၁၇ ရက်နေ့မှာ ထုတ်ပြန်ခဲ့ပါတယ်။
ကျားဖြန့်ဂိုဏ်းတွေနဲ့ လူမှောင်ခိုဂိုဏ်းတွေရဲ့ နယ်စပ်ဖြတ်ကျော် ရာဇဝတ်မှုတွေကို ထိထိရောက်ရောက် ချိုးနှိမ်နိုင်ရေးအတွက် အပြင်းအထန် ဖိအားပေး လုပ်ဆောင်ဖို့ တရုတ်က သံန္နိဋ္ဌာန် ချထားပြီး ဖြစ်တယ်လို့လည်း ဝန်ကြီးဌာန ကြေညာချက်မှာ ဖော်ပြထားခဲ့ပါတယ်။
နှစ်နိုင်ငံ ရဲတပ်ဖွဲ့ ပူးပေါင်းပြီး ဖမ်းဆီးမှုတွေကို ဘယ်အချိန်၊ ဘယ်နေရာတွေမှာ လုပ်ဆောင်ခဲ့သလဲ ဆိုတာနဲ့ အဖမ်းခံရသူတွေ ဘယ်သူလဲ ဆိုတာကိုတော့ တရုတ်က လတ်တလော အတိအကျ မထုတ်ပြန်သေးပါဘူး။
Public Service Announcement
ထိုင်းနဲ့ နယ်စပ်နားက မြန်မာပိုင်နက်ထဲမှာ အခြေချ လှုပ်ရှားနေတဲ့ ကျားဖြန့်ဂိုဏ်းတွေဟာ တရုတ်နိုင်ငံသားတွေကို ကောင်းမွန်တဲ့ အလုပ်အကိုင် အခွင့်အလမ်းတွေနဲ့ မက်လုံးပေး ခေါ်ယူပြီး လူကုန်ကူးတဲ့ ဖြစ်စဉ်တွေ အရင်ကတည်းက ရှိနှင့်ခဲ့ပြီးသားပါ။
ဒါပေမဲ့လည်း အခုလ အစောပိုင်းမှာ တရုတ်နိုင်ငံသား သရုပ်ဆောင် ဝမ်ကျင်က ထိုင်းနိုင်ငံကနေတဆင့် နယ်စပ်ဖြတ်ကျော်ပြီး မြန်မာနိုင်ငံဖက်ကို လူမှောင်ခို ကူးခံခဲ့ရတဲ့ ဖြစ်စဉ်အပြီး အဲဒီ မှုခင်းတွေအပေါ် နိုင်ငံတကာ အာရုံစိုက်မှု ပိုမိုမြင့်တက်လာပါတယ်။
ထိုင်းရဲတွေရဲ့ ညှိနှိုင်းကူညီပေးမှုကြောင့် ဝမ်ကျင်ဟာ ရက်ပိုင်းအကြာမှာ ပြန်လည် လွတ်မြောက်လာခဲ့ပေမယ့် သူ့လိုပဲ လူကုန်ကူး ခံရတယ်လို့ ယူဆရတဲ့ အခြေအနေကြောင့် ပျောက်ဆုံးနေတဲ့ နောက်ထပ် တရုတ်နိုင်ငံသားတွေအကြောင်း သတင်းတွေ ထွက်ပေါ်လာခဲ့ပါတယ်။
ဇန်နဝါရီ ၁၆ ရက်နေ့မှာတော့ တရုတ် နိုင်ငံခြားရေး ဝန်ကြီး ဝမ်ယိက ကျားဖြန့်တွေ အပါအဝင် နယ်စပ်ဖြတ်ကျော် ဒုစရိုက်မှုတွေကို တိုက်ဖျက်ရေးမှာ ထဲထဲဝင်ဝင် အားထုတ်ကြဖို့ အရှေ့တောင်အာရှ နိုင်ငံများ အစည်းအရုံး (အာဆီယံ) နိုင်ငံတွေကို တိုက်တွန်း တောင်းဆိုခဲ့ပြီး အဲဒီ ဒုစရိုက်ဂိုဏ်းတွေဟာ တရုတ်သာ မကဘဲ တခြားနိုင်ငံသားတွေကိုပါ ခြိမ်းခြောက်နေတယ်လို့ သတိပေး ပြောကြားသွားခဲ့ပါတယ်။
ကိုးကား- Reuters
