ဆိုင်းမင်း/People’s Spring
မန္တလေးတိုင်း ၊ မိတ္ထီလာမြို့ လေတပ်စခန်းကနေ မိုင် ၅၀ ပတ်လည်အတွင်းမှာရှိတဲ့တောင်သာမြို့နယ်ထဲက ကျေးရွာတွေကို စစ်ကောင်စီ တပ်က လူလိုက်ပါတဲ့ စက်တပ်လေထီး ( Paramotor) နဲ့ တိုက်ခိုက်ရာမှာ ၂၇ ရက်အတွင်း အရပ်သား ၅ ဦးသေဆုံးခဲ့ရတယ်လို့ နယ်မြေခံ တော်လှန်ရေးအင်အားစုတွေထံကသိရပါတယ်။
တိုက်ခိုက်မှုတွေကို ပြီးခဲ့တဲ့ ဒီဇင်ဘာလ ၂၅ ရက်ကနေ ဒီနေ့ ဇန်နဝါရီလ ၂၁ ရက်အထိ ပြုလုပ်ထားတာဖြစ်ပြီး အမျိုးသား ၂ဦး ၊အမျိုးသမီး ၃ ဦးသေဆုံးထားတာပါ။
အဲဒီစက်တပ်လေထီးတွေဟာ မိတ္ထီလာ လေယာဥ်မောင်းသင်တန်းကျောင်း ကနေ တက်လာတာလို့ သိရပါတယ်။
Public Service Announcement
ဒီနေ့ မနက် ၅ နာရီ မိနစ် ၄၀ ခန့်က တောင်သာမြို့ ၊ ကျွန်းရွာလေးအရှေ့ဘက် နဲ့ ညောင်တိုရွာ ဘုန်းကြီးကျောင်း တဝိုက် စက်တပ်လေထီးနဲ့ ဗုံးချခံရလို့ နေအိမ် ၂ လုံးပျက်စီးခဲ့ရပါသေးတယ်။
တောင်သာမှာ စက်တပ်လေထီးနဲ့တိုက်ခိုက်တာတွေကို ဇန်နဝါရီလ အစောပိုင်းကစတင်ပြုလုပ်လာတာပါ ။
ဇန်နဝါရီလ ၅ ရက် ရုံးဇင်လေး ရွာကို စက်တပ်လေထီးနဲ့ဗုံးချခဲ့ရာ ၅၇နှစ်အရွယ်အမျိုးသမီးနေရာမှာတင်သေဆုံးပြီး ၁၂နှစ်သားအရွယ်ကလေး ထိခိုက်ဒဏ်ရာရရှိခဲ့ပါတယ်။
ဇန်နဝါရီလ ၁၈ ရက် မနက် အစောပိုင်း ၁ နာရီခွဲခန့်မှာလည်း တောင်သာမြို့ ၊ ညောင်ကုန်းရွာကို စက်တပ်လေထီးနဲ့ ဗုံး ချရာမှာ အမျိုးသမီးကြီး ၂ ဦး ၊ အမျိုးသား ၁ဦး သေဆုံးခဲ့ရပါတယ်။
အမျိုးသား တစ်ဦးလည်း နောက်ရက်မှာ ထပ်မံ သေဆုံးခဲ့ရတယ်လို့သိရပါတယ်။
လူလိုက်ပါတဲ့ စက်တပ်လေထီးနဲ့တိုက်ခိုက်မှုတွေကို အလင်းရောင်မပွင့်မှီ အချိန်တွေမှာ ပြုလုပ်တာလို့ သိရပါတယ်။
” နေ့ခင်းကျ တော်လှန်ရေးအဖွဲ့တွေဘက်က ပြန်တိုက်ခိုက်မှာကြောက်တာလည်းပါတယ်”လို့ တောင်သာမြို့အခြေစိုက်တော်လှန်ရေး တပ်ဖွဲ့ဝင်တစ်ဦးကပြောပါတယ်။
ညအချိန် လူအများအိပ်မောကျနေချိန်မှာ နေအိမ်တွေပေါ်ဗုံးသီးချခံနေရတဲ့အတွက် တောင်သာမြို့နယ်အတွင်းက ကျေးရွာအချို့မှာ ဒေသခံတွေ တိမ်းရှောင်နေရတာတွေလည်းရှိလာပါတယ်။
အချို့လည်း ဗုံးခိုကျင်းတူးတာတွေပါလုပ်ဆောင်နေကြရတယ်လို့ သိရပါတယ်။
စစ်ကောင်စီတပ် ဘက်က ပြည်သူကို အချိန်မရွေး ပစ်မှတ်ထားတိုက်ခိုက်လာနိုင်တဲ့အတွက် ပြည်သူတွေအနေနဲ့လည်း ခိုင်ခံ့တဲ့ဗုံးခိုကျင်းတွေတူးထားကြဖို့ တော်လှန်ရေးအဖွဲ့တွေက အသိပေးနှိုးဆော်ထားပါတယ်။
