ဒီးဒီ၊ဟန်နွေ/People’s Spring
ရှမ်းပြည်နယ်မြောက်ပိုင်း၊ နောင်ချိုမြို့ရှိ ပါရမီလက်ဖက်ရည်ဆိုင်အား စစ်ကောင်စီလေကြောင်းတိုက်ခိုက်ရာ ဒေသခံပြည်သူ သေဆုံးသူ ရှစ်ဦးထက်မနည်းရှိကြောင်း အဆိုပါမြို့ခံများက ပြောသည်။
ယနေ့ (ဇန်နဝါရီ ၂၂ရက်) နံနက် ၁၁နာရီအချိန်တွင် စစ်ကောင်စီက ဂျက်ဖိုက်တာဖြင့် ဗုံးကြဲတိုက်ခိုက်ခဲ့ခြင်းဟု ဆိုသည်။ စစ်ကောင်စီသည် နောင်ချိုမြို့အား လေကြောင်းမှ နှစ်ရက်ဆက် ဗုံးကြဲတိုက်ခိုက်ခဲ့ခြင်း ဖြစ်သည်။
“လောလောဆယ် ရုပ်အလောင်း ရှစ်လောင်းရထားတယ်ကြားတယ်။ ဒဏ်ရာရသူတွေလည်း ရှိတယ်။ လက်ဖက်ဆိုင်မှာ မိသားစုတွေ ဆိုင်သန့်ရှင်းရေးလုပ်နေတုန်း ထိုင်သောက်နေတဲ့သူတွေလည်း ရှိတယ်ပြောတယ်”ဟု နောင်ချိုမြို့ခံ အမျိုးသမီးတစ်ဦးက ပြောသည်။
Public Service Announcement
ဒဏ်ရာရသူများပြားပြီး စိုးရိမ်ရကြောင်းလည်း အဆိုပါ အမျိုးသမီးက ဆက်ပြောသည်။ သို့သော် သေဆုံးသူအရေအတွက်နှင့် ဒဏ်ရာရသူများအား လူထုနွေဦးက ဆက်လက်စုံစမ်းနေဆဲဖြစ်ပါသည်။
နောင်ချိုမြိုနယ်တွင် စစ်ကောင်စီတပ်မှ ဂျက်ဖိုက်တာဖြင့် ဗုံး(၂)လုံး ထပ်မံလာရောက်ကြဲချခဲ့ကြောင်း တအာင်းတပ်မတော်(TNLA)က အသိပေးထုတ်ပြန်သည်။
ဗုံးကြဲတိုက်ခိုက်ခံရသည့် ပါရမီလက်ဖက်ရည်ဆိုင်သည် နောင်ချိုမြို့ ရဲစခန်းဘေးတွင် တည်ရှိသည်။
ယမန်နေ့ ဇန်နဝါရီ ၂၁ရက်ကလည်း နောင်ချိုမြို့ရှိ မြို့နယ်အထွေထွေအုပ်ချုပ်ရေးမှူးရုံးနှင့် စည်ပင်ရုံးကို စစ်ကောင်စီက လေကြောင်းမှ ဗုံးကြဲတိုက်ခိုက်ရာ ဒေသခံပြည်သူ တစ်ဦးသေဆုံးပြီး နှစ်ဦးဒဏ်ရာရရှိကြောင်း တအာင်းတပ်မတော်(TNLA)က အသိပေးထုတ်ပြန်ထားသည်။
စစ်ကောင်စီသည် ဗုံး(၂)လုံး ကြဲချတိုက်ခိုက်မှုကြောင့် နေအိမ်တစ်လုံးမီးလောင်ပြီး စည်ပင်ရုံးလည်း ပျက်စီးခဲ့သည်ဟု ဆိုသည်။
ပြီးခဲ့သည့် ဇန်နဝါရီ ၁၃ ရက်ကလည်း ကျောက်မဲမြို့နယ် ပန်ပေါက်ရွာ တိုးဂိတ်အနီး တိုက်ပွဲဖြစ်ပွားခြင်းမရှိဘဲ စစ်ကောင်စီက ဂျက်ဖိုက်တာဖြင့် ဗုံးကြဲတိုက်ခိုက်ခဲ့သည်ဟု အသိပေးသည်။
ပြီးခဲ့သည့် ၂၀၂၄ နိုဝင်ဘာ ၁၂ရက်ကလည်း နောင်ချိုမြို့လယ်ရှိ လန်းဆန်းလက်ဖက်ရည်ဆိုင်ကိုဗုံးကြဲတိုက်ခိုက်ရာ ပြည်သူ ၁၁ဦး သေဆုံးပြီး ၁၁ဦး ဒဏ်ရာရှိခဲ့သည်။
စစ်ကောင်စီတပ်နှင့် တအာင်းအမျိုးသားလွတ်မြောက်ရေးတပ်မတော်(TNLA)သည် အမြောက်တပ်များရှိရာ နောင်ချိုမြို့နယ်၊ တောင်းခမ်းကျေးရွာတွင် တိုက်ပွဲပြင်းထန်နေပြီး မြို့ပေါ်ကို TNLAက ထိန်းချုပ်ထားသည်။
တစ်နိုင်ငံလုံးရှိ တော်လှန်ရေးအင်အားစုများနှင့် ဟန်ချက်ညီညီလက်တွဲပူးပေါင်းကာ စစ်ကောင်စီကို အပြီးတိုင်ချေမှုန်းတော်လှန်သွားမည်ဟု (၆၂)နှစ်မြောက် တအာင်းအမျိုးသားတော်လှန်ရေးနေ့အထိမ်းအမှတ်နေ့တွင် TNLAက ထုတ်ပြန်ထားသည်။
TNLAနှင့် မဟာမိတ်ဖြစ်ပြီး ၁၀၂၇ စစ်ဆင်ရေးကို အတူတူဖော်ဆောင်ခဲ့သည့် အမျိုးသားဒီမိုကရက်တစ်မဟာမိတ်တပ်မတော်(MNDAA)ကမူ တရုတ်နိုင်ငံ၏ကြားဝင်ညှိနှိုင်းမှုဖြင့် စစ်ကောင်စီနှင့် အပစ်ရပ်ထားသည်။
သို့သော် ညီနောင်မဟာမိတ်များ၏ အခက်အခဲ၊ အတားအဆီးများကို ဝိုင်းဝန်းဖြေရှင်းမည်ဖြစ်ကြောင်း MNDAAနှင့် အာရက္ခတပ်တော်(AA)က တအာင်းအမျိုးသားတော်လှန်ရေးနေ့သို့ ပေးပို့သည့် သဝဏ်လွှာ၌ ဖော်ပြခဲ့သည်။
ထို့အပြင် ၂၀၂၄ နိုဝင်ဘာ ၂၄ရက်ကလည်း နောင်ချိုမြို့နယ် အင်းဝိုင်းကျေးရွာတွင် စစ်ကောင်စီတပ်မှ ပစ်ခတ်လိုက်သည့် လက်နက်ကြီးကြောင့် သံဃာတော် တစ်ပါးပျံလွန်တော်မူပြီး ဒေသခံပြည်သူ နှစ်ဦး ထိမှန်ဒဏ်ရာခဲ့သည်ဟု TNLAက နိုတင်ဘာ ၂၆ရက်တွင် ထုတ်ပြန်သည်။
နောင်ချိုမြို့နယ်တွင် ၂၀၂၄ နိုဝင်ဘာ ၁ရက်မှ ၂၅ရက်အထိ စစ်ကောင်စီ၏ လေကြောင်းနှင့် လက်နက်ကြီးကြောင့် ဒေသခံပြည်သူ ၁၈ဦး သေဆုံးပြီး ၃၄ဦး ဒဏ်ရာရရှိခဲ့သည်ဟု TNLAက ထုတ်ပြန်သည်။
