မေ/People’s Spring
ရှမ်းပြည်နယ်မြောက်ပိုင်း၊ နောင်ချိုမြို့ပေါ်ကို စစ်ကောင်စီက လေကြောင်းတိုက်ခိုက်မှုလုပ်နေပြီး ဒီကနေ့ မနက်ပိုင်းက လေကြောင်းတိုက်ခိုက်မှုမှာ လက်ဖက်ရည်ဆိုင်ပေါ် ဗုံးကျခဲ့လို့ အမျိုးသမီးတွေအပါအဝင် သေဆုံးသူ ပြည်သူ ၁၀ဦးကျော်ရှိတယ်လို့ ဒေသခံတွေက ပြောပါတယ်။
ဇန်နဝါရီ၂၂ရက် ဒီကနေ့ မနက် ၁၁နာရီခန့်မှာ စစ်ကောင်စီက နောင်ချိုမြို့ရဲစခန်းအနီးကို ဗုံးကြဲတိုက်ခိုက်ခဲ့တာလို့ သိရပါတယ်။
ရဲစခန်းဘေးကပ်လျက်မှာရှိတဲ့ ပါရမီလက်ဖက်ရည်ဆိုင်ကို ဗုံးကျရောက်ပေါက်ကွဲခဲ့ပြီး ဆိုင်ရှင်တွေအပါအဝင် ထိုင်နေတဲ့ပြည်သူတွေပါ သေဆုံးခဲ့တာလို့ မြို့ခံတစ်ဦးက ပြောပါတယ်။
Public Service Announcement
“ဆိုင်မှာ ထိုင်နေတဲ့ဝိုင်း၂ဝိုင်း၊ ၃ဝိုင်းရှိတယ်။ဝန်ထမ်းတွေကလည်း သန့်ရှင်းရေးလုပ်နေကြချိန်တဲ့။အဲဒီဆ်ိုင်ပေါ်တည့်တည့်ချတာ။တယောက်ပဲ လွတ်တယ်”လို့ ဒေသခံတစ်ဦးက ပြောပါတယ်။
နောက်ထပ်ဒေသခံ အမျိုးသမီးတစ်ဦးကလည်း “ကျွန်မအဖေ ပါသွားတယ်။ သာမန်ပြည်သူပါ။အဖေလက်ဖက်ရည်ဆိုင်ကို ထွက်သွားတာခဏလေးပဲရှိသေးတယ် “လို့ ပြောပါတယ်။
လတ်တလောရရှိထားတဲ့သတင်းအရ ပြည်သူ၁၀ဦးရဲ့အလောင်းတွေ့ထားတယ်လို့သိရပြီး ရုပ်တွေမပြီပြင်တဲ့အလောင်းတွေ များတယ်လို့ မိသားစုနဲ့အဆက်အသွယ်ရတဲ့ ဒေသခံတစ်ဦးက ပြောပါတယ်။
“Dead Body က အတည်ပြုလို့ မရသေးဘူး။ တချို့ပြောတာက ၁၀ယောက်။ တချို့က ၁၂ ယောက်ပြောကြတယ်။ လက်ဖက်ရည်ဆိုင်ပိုင်ရှင် မိသားစုဝင်တွေရယ်၊ဆိုင်ဝန်ထမ်းတွေရယ်၊ ဆိုင်လာထိုင်သူတွေရယ် သေကြတာ။ ကျနော့်အသိ အရပ်သား နှစ်ယောက်လည်းပါသွားတယ်။ ဆိုင်ထဲကဆို အကြော်ဆရာပဲ လွတ်တယ်ပြောတယ်”ဟု ဒေသခံအမျိုးသမီးတစ်ဦးက ပြောပါတယ်။
လတ်ရှိမှာ နောင်ချိုမြို့အတွင်း ဖုန်းလိုင်းတွေမရသလို စစ်တပ်ဘက်ကနေ လက်နက်ကြီးတွေနဲ့ ဆက်တိုက်ပစ်ခတ်တာတွေလည်း လုပ်နေပါတယ်။
မနေ့က မနက်ပိုင်းကစပြီး နောင်ချိုမြို့နယ်ကို စစ်ကောင်စီရဲ့ တပ်မ(၃၃) လက်အောက်ခံ တပ်ခွဲတွေဦးစီးပြီး တရစပ်ထိုးစစ်ဆင်နေသလို ပြင်ဦးလွင်မြို့ပေါ်ကနေလည်း လက်နက်ကြီးပစ်ကူတွေ ဆက်တိုက်ပေးနေတယ်လို့ ပြင်ဦးလွင်မြို့ခံတွေက ပြောပါတယ်။
