ဟန်နွေ/People’s Spring
ကရင်အမျိုးသားအစည်းအရုံး(KNU) ကော်သူးလေအုပ်ချုပ်နယ်မြေများ၌ ၂၀၂၄အတွင်း တိုက်ပွဲများ၌ စစ်ကောင်စီတပ်ဖွဲ့ဝင် သုံးထောင်ကျော် သေဆုံးကာ တော်လှန်ရေးပူးပေါင်းတပ်ဘက်က ၁၀၀ ခန့်ကျဆုံးခဲ့ဟု KNU ဗဟိုက ယနေ့(ဇန်နဝါရီ ၂၄ရက်) သတင်းထုတ်ပြန်သည်။
KNU တပ်များဖြစ်သော ကရင်အမျိုးသားလွတ်မြောက်ရေးတပ်မတော် (K.N.L.A)၊ ကရင်အမျိုးသားကာကွယ်ရေးတပ်ဖွဲ့ (K.N.D.O)တို့၏ ဦးဆောင်မှုအောက်ရှိ တော်လှန်ရေး ပူးပေါင်းတပ်များနှင့် စစ်ကောင်စီအကြား တိုက်ပွဲဖြစ်ပွားမှုကို ဇန်နဝါရီ ၂၄ရက်၌ သတင်းထုတ်ပြန်ခဲ့ခြင်းဖြစ်သည်။

ယမန်နှစ်အတွင်း တိုက်ပွဲကြီး၊တိုက်ပွဲငယ်ပေါင်း (၃၂၂၉) ကြိမ် ထပ်မနည်း ဖြစ်ပွားခဲ့ရာ စစ်ကောင်စီ တပ်ဘက်က အရာရှိများ အပါအဝင် သေဆုံးသူ (၃၁၃၆) ဦး ထပ်မနည်းရှိခဲ့ပြီး (၂၂၂၅) ဦး ခန့် ဒဏန်ရာရခဲ့သည်ဟုဆိုသည်။ စစ်ကောင်စီတပ် သေဆုံးထိခိုက်အခြေအနေများနှင့်ပတ်သက်ပြီး သီးခြား အတည်ပြုနိုင်ခြင်းမရှိပေ။

Public Service Announcement
ထို့ပြင် ဗျူဟာမှူးအဆင့် အပါအဝင် ရာနှင့်ချီသော စစ်ကောင်စီတပ်ဖွဲ့ဝင်များကို ဖမ်းဆီးနိုင်ခဲ့ကြောင်း ထုတ်ပြန်သည်။
အဆိုပါ တိုက်ပွဲများအတွင်း ကရင်အမျိုးသားလွတ်မြောက်ရေးတပ်မတော် (K.N.L.A)၊ ကရင်အမျိုးသားကာကွယ်ရေး တပ်ဖွဲ့ (K.N.D.O) တို့၏ ဦးဆောင်မှုအောက်ရှိ တော်လှန်ရေး ပူးပေါင်းတပ်များဘက်မှ ရဲဘော် ၁၀၀ခန့် ကျဆုံးကာ ၃၂၅ ဦး ဒဏ်ရာရခဲ့သည်ဟု အသိပေးသည်။
KNU အုပ်ချုပ်နယ်မြေ ခရိုင်နှင့် တပ်မဟာ ၇ခုရှိရာ ခရိုင်တပ်မဟာ အလိုက် တိုက်ပွဲဖြစ်ပွားမှု၊ စစ်ကောင်စီတပ်သေဆုံးထိခိုက်မှု အခြေအနေပြဇယားကိုလည်း သတင်းထုတ်ပြန်မှု၌ ဖော်ပြခဲ့သည်။
KNU တပ်မဟာနှင့် ခရိုင်များအနက် တပ်မဟာ(၅) ဖာပွန်ခရိုင်၌ စစ်ကောင်စီနှင့် တိုက်ပွဲအကြိမ်ပေါင်း ၉၀၀ ကျော်ဖြင့် အများဆုံးဖြစ်ပွားခဲ့သည်ကို တွေ့ရသည်။ တပ်မဟာ(၅)၌ တိုက်ပွဲ ၉၄၇ ကြိမ်ဖြစ်ခဲ့ရာ စစ်ကောင်စီတပ်ဖွဲ့ဝင် ၅၉၀ကျော်သေဆုံးခဲ့ဟု အသိပေးထားသည်။
တပ်မဟာ(၃) ညောင်လေးပင်ခရိုင်၌ တိုက်ပွဲ ၇၅၀ ကျော်ဖြစ်ခဲ့ရာ စစ်ကောင်စီတပ်ဖွဲ့ဝင် ၉၉၀ကျော် သေဆုံးခဲ့ကြောင်း၊ တပ်မဟာ(၆) ဒူးပလာယာခရိုင်၌ တိုက်ပွဲ ၃၈၀ ကြိမ်ဖြစ်ခဲ့ပြီး စစ်ကောင်စီတပ်မှ ၄၉၀ ကျော်သေဆုံးခဲ့ကြောင်း ထုတ်ပြန်သည်။

တပ်မဟာ(၂) တောင်ငူခရိုင်၌ တိုက်ပွဲ ၃၆၀ ကျော်ဖြစ်ခဲ့ပြီး စစ်ကောင်စီတပ်ဖွဲ့ဝင် ၄၄၀ ကျော်သေဆုံး ခဲ့ကြောင်း၊ တပ်မဟာ(၇) ဘားအံခရိုင်၌ တိုက်ပွဲ ၃၅၀ ကျော်ဖြစ်ခဲ့ပြီး စစ်ကောင်စီတပ်ဖွဲ့ဝင် ၈၀ ကျော်သေဆုံးခဲ့ကြောင်း ဖော်ပြထားသည်။ ထို့ပြင် တပ်မဟာ(၁) သထုံခရိုင်၌ တိုက်ပွဲ ၂၆၀ကျော်ဖြစ်ခဲ့ပြီး စစ်ကောင်စီတပ်က ၂၃၀ ကျော်သေဆုံးခဲ့ကြောင်း၊ တပ်မဟာ(၄)နယ်မြေတွင် တိုက်ပွဲ ၁၆၉ကြိမ် ဖြစ်ခဲ့ပြီး စစ်ကောင်စီတပ်ဖွဲ့ဝင် ၂၈၀ ကျော်သေဆုံးခဲ့ကြောင်း ထုတ်ပြန်သည်။
KNU အနေဖြင့် ၂၀၂၁ စစ်တပ်အာဏာသိမ်းပြီးကတည်းက စစ်ကောင်စီကို တိုက်ခိုက်ခဲ့ခြင်းဖြစ်ပြီး တိုက်ပွဲ သောင်းချီဖြစ်ခဲ့ပြီး စစ်ကောင်စီတပ်အင်အား သောင်းချီ ပြုန်းတီးအောင် တိုက်ခိုက်နိုင်ခဲ့ဟု KNU ဘက်က အသိပေးထားသည်။ စစ်တပ်အာဏာသိမ်းပြီးနောက် စစ်ကောင်စီ ဗျူဟာ၊ တပ်ရင်းဌာနချုပ်များအပါအဝင် တပ်စခန်းကြီးငယ် ၁၄၀ ကျော်ကို KNU ပူးပေါင်းတပ်များက သိမ်းပိုက်ထားပြီး မြို့အချို့ကို ထိန်းချုပ်ထားသည်။
ထို့ပြင် ယခု ၂၀၂၅ တွင် စစ်ရေးအရှိန်မြှင့်တင်ဆောင်ရွက်သွားမည်ဖြစ်ကြောင်း KNU ပြောရေးဆိုခွင့်ရှိသူ ပဒိုစောတောနီးက အသိပေးထားသည်။
KNU ဥက္ကဋ္ဌ ပဒိုစောကွယ်ထူဝင်းကလည်း စစ်အာဏာရှင်စနစ်၏ အသွင်သဏ္ဍန်အမျိုးမျိုးကို အပြီးတိုင်ချုပ်ငြိမ်းရေး တိုက်ဖျက်သွားရန် မျှော်မှန်းထားကြောင်း နှင့် စစ်တပ်၏ ကြီးစိုးမှုနှင့် အာဏာသိမ်းအုပ်ချုပ်မှုများ အမြစ်ပြတ်ချေမှုန်းသွားရန် တခုတည်းသော နည်းလမ်းမှာ စစ်ရေးအရ ဖိအားပေး အနိုင်ယူခြင်းဖြစ်ကြောင်း ၂၀၂၄ ဒီဇင်ဘာ ၄၀ရက်က ကျရောက်သည့် ကရင်နှစ်သစ်ကူးနေ့ မိန့်ခွန်း၌ အသိပေးပြောကြားထားသည်။
