အလင်းဝင်လာသည့် စစ်ကောင်စီတပ်သား ခုနစ်ဦးကယ်ထုတ်စဥ် တိုက်ခိုက်ခံရပြီး ရဲဘော်တစ်ဦးနှင့်အလင်းဝင်တပ်သားသုံးဦး ကျဆုံး

ရဲခေါင်/People’s Spring

အလင်းဝင်လာသည့် စစ်ကောင်စီတပ်သား ခုနစ်ဦးကယ်ထုတ်စဥ် တိုက်ခိုက်ခံရပြီး ရဲဘော်တစ်ဦးနှင့် ဘက်ပြောင်းသည့် စစ်သားသုံးဦး ကျဆုံးခဲ့ရကြောင်း နေပြည်တော် ပြည်သူ့ကာကွယ်အဖွဲ့(ပကဖ) တာဝန်ရှိသူ ဗိုလ်တေဇက လူထုနွေဦးသို့ ပြောသည်။

စစ်မှုထမ်းရန်စုဆောင်းခံခဲ့ရသည့် တပ်စိပ်မှူး၊ ဒုတပ်စိတ်မှူး အပါအဝင်တပ်သား ခုနစ်ဦးမှ လက်နက်နှင့်အတူ အလင်းဝင်ခိုလှုံရန်ဆက် သွယ်လာခဲ့ရာမှ ဇန်နဝါရီ ၁၇ရက်တွင် သွားရောက်ခေါ်ထုတ်ခဲ့သည် ဟု ဆိုသည်။

“ရဲဘော် တစ်ယောက်ကျဆုံးတယ်။နှစ်ယောက်ဒဏ်ရာရတယ်။အလင်းဝင်လာသူထဲက သုံးယောက်ကျတယ်”ဟု ဗိုလ်တေဇက ပြောသည်။

Public Service Announcement

စစ်ကောင်စီဘက်မှ ဒရုန်းဖြင့် တိုက်ခိုက်ခဲ့ခြင်းဖြစ်ပြီး နေပြည်တော်ပြည်သူ့ကာကွယ်ရေးအဖွဲ့ တိုင်း- တိုက်ခိုက်ရေးတပ်ဖွဲ့မှ ရဲဘော်ဆင်ကြီး ကျဆုံးခဲ့ပြီး၊ ဇေယျာသီရိမြို့နယ် ပကဖ တာဝန်ခံ ရဲဘော်ယက္ခနှင့် လယ်ဝေးမြို့နယ် ပကဖမှ ရဲဘော်သူရတို့ ထိခိုက်ဒဏ်ရာ ပြင်းထန်စွာရရှိခဲ့ကြောင်း အသိပေးသည်။

ထို့အပြင် ဘက်ပြောင်းခိုလှုံလာသည့် စစ်ကောင်စီ တပ်သား ခုနစ်ဦးအနက် သုံးဦးကျဆုံးခဲ့ကြောင်း သိရသည်။

ကျဆုံးခဲ့သည့် ရဲဘော်နှင့် အလင်းဝင်စစ်ကောင်စီတပ်သား သုံးဦးကို ဇန်နဝါရီ ၁၉ရက်ကအာဇာနည်ကုန်းတွင် ဂုဏ်ပြုတပ်ဖွဲ့မှ အလေးပြု၍ အခမ်းအနားဖြင့် သင်္ဂြိုလ်ခဲ့သည်ဟု ထုတ်ပြန်ထားသည်။

ကျဆုံးရဲဘော်များ၏ နောက်ဆုံးခရီးသို့ လိုက်ပါပို့ ဆောင်ပေးသော၊ လိုအပ်ချက်များအား ကူညီဆောင်ရွက်ပေးခဲ့သည့် EROsခေါင်းဆောင်များ၊ မဟာမိတ်တပ်ရင်းတပ်ဖွဲ့ အသီးသီးမှ ခေါင်းဆောင်များနှင့် ရဲဘော်ရဲဘက်များအား လေးနက်စွာဖြင့် မှတ်တမ်းတင်ကြောင်လည်း နေပြည်တော်ပကဖက အသိပေးသည်။