အွန်လိုင်းကနေ တိုက်ရိုက် အရောင်းအဝယ်လုပ်တဲ့ Live Sale အစီအစဉ်တွေမှာ မြန်မာ နိုင်ငံသား ဝန်ထမ်းတွေကို တရားမဝင် ခန့်အပ်မှုအတွက် ထိုင်းမှာ တစ်ပတ်ရစ် ကားအရောင်းဆိုင် ပိုင်ရှင် အမျိုးသမီးတစ်ဦး ဖမ်းဆီး ခံခဲ့ရပါတယ်။
ဇန်နဝါရီ ၂၂ ရက်နေ့တုန်းက ကန်ချနာဘူရီမှာရှိတဲ့ ကားအရောင်းဆိုင် တစ်ခုမှာ အဲဒီဖမ်းဆီးမှုကို လုပ်ဆောင်ခဲ့တယ်လို့ ဒေသခံ ရဲတပ်ဖွဲ့က ဆိုပါတယ်။ သာမာကာ ခရိုင်၊ ဝိုင်နီယို ခရိုင်ခွဲမှာရှိတဲ့ တစ်ပတ်ရစ် ကားအရောင်းဆိုင်ဟာ Facebookကနေ Live Sale ကားရောင်းချမှုတွေ ပြုလုပ်ရာမှာ မြန်မာနိုင်ငံသား ဝယ်လက်တွေကို ဆွဲဆောင်ဖို့အတွက် မြန်မာဝန်ထမ်း ၅ ယောက်ကို ကော်မရှင်စားအဖြစ် ခန့်အပ်ခဲ့တာလို့ သိရပါတယ်။
ရဲတွေက အဲဒီ Live Sale အစီအစဉ်မှာ ခန့်အပ်ထားတဲ့ မြန်မာ ဝန်ထမ်းတွေရဲ့ တရားဝင်မှုအပေါ် သံသယ ရှိခဲ့တဲ့အတွက် ရဲမှူးကြီး ခွန်ဆွမ်ခါနေး ဦးဆောင်ပြီး ဒေသခံ ရဲတပ်ဖွဲ့နဲ့အတူ ကားအရောင်းဆိုင်ကို စီးနင်း စစ်ဆေးခဲ့တာလို့ ဆိုပါတယ်။
အဲဒီ ရှာဖွေ ဖမ်းဆီးမှုအတွင်း Live Sale အစီအစဉ်တွေမှာ ပါဝင်ဖူးသူ ဝန်ထမ်းတစ်ဦးကိုပါ ရဲတွေက ရှာတွေ့ခဲ့ပါတယ်။ ရဲတပ်ဖွဲ့က နီလို့သာ နာမည်ဖော်ပြတဲ့ ဆိုင်ပိုင်ရှင် အမျိုးသမီးက သူဟာ အသက် ၂၅ နှစ်နဲ့ ၃၅ နှစ်ကြား အထောက်အထားမဲ့ မြန်မာလုပ်သားတွေကို ငှားရမ်း အသုံးပြုခဲ့ကြောင်း ဝန်ခံခဲ့ပါတယ်။
Public Service Announcement
သူ့ရဲ့ လုပ်ငန်းဟာ ထိုင်းဖောက်သည်တွေကို ဆွဲဆောင်နိုင်ဖို့ ခက်ခဲလာတဲ့အတွက် မြန်မာနိုင်ငံသား ဝယ်လက်တွေကို လူမှုကွန်ရက်ကနေတဆင့် စည်းရုံးနိုင်ဖို့ ဗျူဟာပြောင်းပြီး မြန်မာဝန်ထမ်းတွေ ငှားရမ်းခဲ့တာလို့ နီက ပြောပါတယ်။
နီဟာ အဲဒီ မြန်မာဝန်ထမ်းတွေကို ပုံမှန် လစာအပြင် ကားတစ်စီး ရောင်းရတိုင်း ဘတ် ၂၀၀၀ ကနေ ၃၀၀၀ ကြား ကော်မရှင် ပေးလေ့ရှိတယ်လို့ ဆိုပါတယ်။ အဲဒီ ဝန်ထမ်းတွေဟာ ကိုယ်ပိုင် မိုဘိုင်းဖုန်းတွေ အသုံးပြုပြီး Live Sale အစီအစဉ်တွေမှာ ပါဝင်ကြသလို မြန်မာနိုင်ငံသား ဝယ်လက်တွေ ရရှိနိုင်အောင် အဓိက ကူညီဆွဲဆောင်ပေးကြတယ်လို့ နီက ဆိုပါတယ်။
နီဟာ အထောက်အထားမဲ့ မြန်မာလုပ်သားတွေကို ခန့်အပ်ခဲ့မှုအတွက် နိုင်ငံခြား လုပ်သားများ စီမံခန့်ခွဲမှု အရေးပေါ် ဥပဒေအရ တရားစွဲဆိုခြင်း ခံရဖွယ် ရှိနေပါတယ်။ မြန်မာဝန်ထမ်း ၅ ယောက်ဟာလည်း ခွင့်ပြုချက်ထက် ကျော်လွန်တဲ့ အလုပ်အကိုင်တွေမှာ ပါဝင်လုပ်ကိုင်မှုအတွက် တရားစွဲဆို ခံထားရကြောင်း သိရပါတယ်။
ကိုးကား: Khaosod
