ရဲခေါင်/People’s Spring
စစ်ကောင်စီဘက်က အင်အားအလုံးအရင်းဖြင့် ထိုးစစ် ဆင်နေသော မိုးဗြဲမြို့ကို တော်လှန်ရေးပူးပေါင်းတပ် များ ထိန်းချုပ်ထားနိုင်ဆဲဖြစ်ကြောင်း ကရင်နီအမျိုးသားများ ကာကွယ်ရေးတပ် KNDF က ယနေ့ ထုတ်ပြန်သည်။
ဇန်နဝါရီလအတွင်း လွိုင်ကော်မြို့နယ် ၊ ဘောလခဲမြို့နယ် ၊ ဖားဆောင်းမြို့ နှင့် ကရင်နီ-ရှမ်းတောင်နယ်စပ်ရှိ မိုးဗြဲမြို့ ၊ ဆီဆိုင်မြို့နယ်တို့တွင် KNDF တပ်များနှင့် စစ်ကောင်စီတပ်များအကြားတိုက်ပွဲများ ဖြစ်ပွားခဲ့သည်ဟုအသိပေးထားသည်။ တစ်လတာ တိုက်ပွဲအတွင်း စစ်ကောင်စီတပ်မှ ၃၀ ဦးနှင့်အထက်သေဆုံးခဲ့သည်။
တိုက်ပွဲများအတွင်း KNDF တပ်ဖွဲ့ဝင်(၆)ဦး ကျဆုံးခဲ့ရပြီး၊စစ်ကောင်စီဖက်မှ ဒုအရာခံဗိုလ် တစ်ဦး ၊ တပ်သားကိုးဦး စုစုပေါင်း တပ်ဖွဲ့ဝင် ၁၀ ဦး သေနတ် ခုနှစ်လက်နှင့်အတူ ဘက်ပြောင်းခိုလှုံလာခဲ့ကြောင်းလည်း KNDF က အသိပေးသည်။
Public Service Announcement
ကရင်နီ-ရှမ်းတောင်နယ်စပ်ရှိ မိုးဗြဲမြို့တွင် ဇန်နဝါရီတစ်လတာလုံး နေ့စဉ်နီးပါး ထိတွေ့တိုက်ပွဲများ ဖြစ်ပွားခဲ့ကာ မိုးဗြဲမြို့အခြေစိုက် ခမရ(၄၂၂)တပ်တွင် စုဖွဲ့ရောက်ရှိနေသော စစ်ကောင်စီ၏ စစ်ကြောင်းအချို့မှာ မိုးဗြဲမြို့တွင်းသို့ ဝင်ရောက်နိုင်ရေးအတွက် စစ်ကြောင်းထိုး၍ နေ့စဉ် ထိတွေ့မှုများရှိကြောင်း အသိပေးသည်။
ထို့အပြင် စစ်ကောင်စီတပ်က ဒရုန်း၊ လက်နက်ကြီးများကို အလွန်အကျွံအသုံးပြု၍ တိုက်ခိုက်မှုများကို နေ့စဉ်နီးပါး ပြုလုပ်ပြီး ဇန်နဝါရီ ၁၉ ရက်တွင် မိုးဗြဲမြို့တွင်းသို့ ဦးတည်၍ စစ်ကောင်စီဖက်မှ အင်အားအလုံးအရင်းဖြင့် ထိုးစစ်ဆင်တိုက်ခိုက်လာခဲ့၍ တစ်နေကုန်နီးပါး တိုက်ပွဲပြင်းထန်ခဲ့သည်။ကရင်နီပူးပေါင်းတော် လှန်ရေးတပ်များက ကောင်းမွန်စွာ ခုခံတိုက်ခိုက်နိုင်၍ ယနေ့ချိန်ထိ မိုးဗြဲမြို့အား ထိန်းချုပ်ထားနိုင်ဆဲ ဖြစ်ပြီး တိုက်ပွဲများဆက်၍ ဖြစ်ပွားနေကြောင်းဖော်ပြသည်။
“ဒီနေ့ (ဖေဖော်ဝါရီ ၂ ရက်)နေ့လည်ပိုင်းမှာ လွိုင်ကော် နဲ့ မိုးဗြဲ ကို ပစ်မှတ်ထားတဲ့ စစ်ကောင်စီ လေကြောင်းတိုက်ခိုက်မှုတွေရှိနေတယ်။မိုးဗြဲဘက်ကတော့ နေ့စဥ်နီး ပါးလောက် လေကြောင်းကနေ ဗုံးကြဲ တာပေါ့။ခုခံစစ်ဆိုတော့ရဲဘော်အချို့ အဖိတ်အစင်နည်းနည်းရှိတယ်”ဟု ကရင်နီတော်လှန်ရေးအင်အားစု၏ တာဝန်ရှိသူ တစ်ဦးက လူထုနွေဦးသို့ပြောသည်။
လွိုင်ကော်မြို့နယ်တွင် စစ်ကောင်စီဖက်မှ လက် နက်ကြီးများ ပစ်ခက်တိုက်ခိုက်ခြင်း ၊ ဒရုန်းများဖြင့် ဗုံးကြဲ တိုက်ခိုက်ခြင်းများပြုလုပ်ခဲ့ပြီး ဖားဆောင်းမြို့တွင်လည်း ကြိုကြားထိတွေ့မှုများရှိခဲ့ကြောင်း သိရသည်။
ဘောလခဲမြို့နယ်တွင် ဇန်နဝါရီ ၁၂ ရက်က မိုင်းထမ်းကျေးရွာ နှင့် ဝမ်မလန်းကျေးရွာကြားသို့ စစ်ကြောင်းထွက်လာသော စစ်ကောင်စီတပ်ဖွဲ့များအား KNDF အပါအဝင် ကရင်နီ တော်လှန်ရေးတပ်ဖွဲ့များပူး ပေါင်း၍ မိုင်းဆွဲတိုက်ခိုက်ခဲ့ပြီး စစ်ကောင်စီတပ်ဖွဲ့ဝင် ၁၀ ဦးကျော်သေဆုံးကာ လက်နက် လေးလက် သိမ်း ဆည်းရရှိခဲ့ကြောင်း KNDF ကပြောသည်။
ထို့အတူ ကရင်နီ – ရှမ်းတောင်နယ်စပ်ရှိ ဆီဆိုင်မြို့နယ်၊ ရွှေတဂူကျေးရွာအပြင်ရှိ စေတီကုန်းပေါ်တွင် စစ်ကောင်စီနှင့် PNO တို့ ပူးပေါင်းတပ်စွဲထားသော စခန်းကုန်းအား KNDF အပါအဝင်တော်လှန်ရေးတပ်များ ပူးပေါင်း၍ တိုက်ခိုက်သိမ်းပိုက်ဖျက်ဆီးနိုင်ခဲ့ပြီး ရန်သူ၃၀ ကျော်သေဆုံးကာ လက်နက်ကြီးငယ်အစုံ၂၈ လက် ရရှိခဲ့သည်။
ကရင်နီပြည်နယ် နှင့် ကရင်နီ-ရှမ်းတောင် နယ်စပ်တို့တွင် ယခင်လအတွင်း စစ်ကောင်စီက လေကြောင်းတိုက်ခိုက်မှု (၃၁)ကြိမ်ထက်မနည်းပြုလုပ်ခဲ့ရာ လက်နက်ကြီးဖြင့် ပစ်ခတ်တိုက်ခိုက် မှု အကြိမ် ၃၀နှင့်အထက် ပြုလုပ်ခဲ့ကြောင်း ထုတ်ပြန်ချက်က ဆိုသည်။
အကြောင်းမဲ့လေကြောင်းတိုက်ခိုက်မှုများနှင့် လက် နက်ကြီး ပစ်ခတ်တိုက်ခိုက်မှုများကြောင့် ကလေးငယ် နှစ် ဦးအပါအဝင် စုစုပေါင်းအရပ်သားပြည်သူခုနှစ်ဦးသေဆုံးခဲ့ရပြီး ကလေးငယ် သုံးဦး၊ ကိုယ်ဝန်ဆောင်မိခင် တစ်ဦးအပါအဝင် စုစုပေါင်းအရပ်သားပြည်သူ ၁၄ ဦး ထိခိုက်ဒဏ်ရာများ ရရှိခဲ့ကြောင်း ဖော်ပြ သည်။
ထို့အပြင်ကရင်နီပြည်အတွင်းနှင့် ကရင်နီ-ရှမ်းတောင်နယ်စပ်တို့တွင် စစ်ကောင်စီ၏ လေကြောင်း ၊ လက်နက်ကြီး ၊ဒရုန်းများဖြင့် တိုက်ခိုက်ခဲ့ခြင်းကြောင့် ပြည်သူနေအိမ် (၃၈)လုံးနှင့်အထက် ထိခိုက်ပျက်ဆီးခဲ့ပြီး စာသင်ကျောင်း (၂)ကျောင်း ၊ ဘုန်ကြီးကျောင်း (၅)ကျောင်းထိခိုက်ပျက်ဆီးခဲ့ရသည်။
(ကရင်နီတပ်ပေါင်းစုက စစ်တပ်ထံမှ သိမ်းဆည်းရရှိသောလက်နက်ခဲယမ်းများ နှင့် စစ်တပ်လေကြောင်းတိုက်ခိုက်မှုကြောင့် အပျက်အစီးများကိုတွေ့ရစဥ်။ဓါတ်ပုံ-KNDF)
