အိမ်သွင်/People’s Spring
လေကြောင်းတိုက်ခိုက်မှုကြောင့် စစ်ဘေးရှောင်ရှစ်ဦးသေဆုံးခဲ့သည့် ကလေးမြို့နယ် တောင်ပိုင်းကို စစ်ကောင်စီက ယနေ့(ဖေဖော်ဝါရီလ၂ရက်) နံနက်၌ ထပ်မံတိုက်ခိုက်ခဲ့ရာ တစ်ဦးထပ်သေဆုံးပြီး တစ်ဦးဒဏ်ရာရရှိခဲ့သည်။
ကလေးမြို့နယ်၊ ကုက္ကိုလ်ကျေးရွာရှိစစ်ဘေးရှောင်စခန်းနှင့်တင်သားကျေးရွာရှိကျေးလက်ဆေးပေးခန်းကို စစ်ကောင်စီက ဇန်နဝါရီလ ၃၁ ရက်တွင် လေကြောင်းမှတိုက်ခိုက်ခဲ့သည်။ ဖေဖော်ဝါရီလ ၂ ရက်နေ့ နံနက် ၁၁ နာရီ မိနစ် ၂၀ ခန့်တွင်လည်း တင်သား နှင့် ဒိုးနွယ်ရွာကိုပါ လေကြောင်းထပ်မံတိုက်ခိုက်ခြင်းဖြစ်သည်။
ကုက္ကိုလ်ကျေးရွာရှိစစ်ဘေးရှောင်စခန်းအားတိုက်ခိုက်မှု၌ ကလေးငယ် လေးဦးအပါအဝင်ရှစ်ဦးသေဆုံးခဲ့သည်။ တင်သားကျေးရွာရှိ ကျေးလက် ဆေးပေးခန်းအား ဂျက်ဖိုက်တာဖြင့် ဗုံးနှစ်လုံးကြဲချတိုက်ခိုက်မှုတွင် ဒေသခံများ ဗုံးခိုကျင်းအတွင်းပုန်းအောင်းနိုင်ခဲ့၍ ထိခိုက်သူမရှိခဲ့ပေ။
Public Service Announcement
စစ်ရှောင်စခန်း၌ မနေရဲတော့၍ ကြံရာနေရာ၌တဲထိုးနေထိုင်ကြရသောစစ်ရှောင်ပြည်သူအချို့။ ဓါတ်ပုံ-CJ စစ်ရှောင်စခန်း၌ မနေရဲတော့၍ ကြံရာနေရာ၌တဲထိုးနေထိုင်ကြရသောစစ်ရှောင်ပြည်သူအချို့။ ဓါတ်ပုံ-CJ ဇန်နဝါရီ၃၁ရက်တွင်စစ်ကောင်စီကလေကြောင်းမှဗုံးကြဲ၍ ပျက်စီးသွားသည့် ကုက္ကိုယ်ရွာမှ စစ်ဘေးရှောင်တဲများ။ ဓါတ်ပုံ-CJ ဇန်နဝါရီ၃၁ရက်တွင်စစ်ကောင်စီကလေကြောင်းမှဗုံးကြဲ၍ ပျက်စီးသွားသည့် ကုက္ကိုယ်ရွာမှ စစ်ဘေးရှောင်တဲများ။ ဓါတ်ပုံ-CJ
“မြစ်သာမြစ်ရဲ့ ဟိုဘက် သုံးမိုင်ခန့်အကွာကို ဦးတည်ပြီးပစ်သွားတာ။ ကျနော်တို့ကြားထားသလောက် တစ်ဦးသေဆုံးပြီး တစ်ဦးဒဏ်ရာရတယ်။ အရပ်သားတွေချည်းပါပဲဗျာ။ ဟိုနေ့က ပစ်တာလည်း စစ်ဘေးရှောင်စခန်းကိုတည်ပစ်တာပါ” ဟု ဒေသခံတစ်ဦးကပြောသည်။
ဖေဖော်ဝါရီ ၂ ရက်နေ့တိုက်ခိုက်မှုကြောင့် ကလေးမြို့နယ်တွင် သုံးရက်အတွင်း အရပ်သား ကိုးဦးသေဆုံးခဲ့သည်။
ကလေးမြို့နယ်တောင်ပိုင်း၌ PDFများ၏စစ်ရေးလှုပ်ရှားမှုမရှိဘဲ စစ်ကောင်စီက လေကြောင်းမှပစ်မှတ်ထားတိုက်ခိုက်နေခြင်းဖြစ်ပြီးဒေသခံများသည် လေကြောင်းအန္တရာယ်ကို စိုးရိမ်နေကြရသည်။
ဇန်နဝါရီလ၃၁ရက်နေ့ လေကြောင်းတိုက်ခိုက်မှုကြောင့် စစ်ဘေးရှောင်ပြည်သူများ၏နေအိမ်များပျက်စီးသွားသည်။ စစ်ဘေးရှောင်ပြည်သူများမှာစစ်ဘေးရှောင် စခန်းတွင်မနေရဲတော့၍ လမ်းဘေးနေရာအချို့၊ တောင်ယာခင်းအချို့တွင် ယာယီတဲထိုး၍ နေကြရသည်။
စစ်ကောင်စီသည် ပြီးခဲ့သည့်ဇန်နဝါရီလကလည်း ကလေးမြို့နယ်နှင့်ဆက်စပ်နေသောတမူးမြို့နယ်၊ ခါမ်းပါတ်မြို့ကိုလေကြောင်းမှအကြိမ်ပေါင်းများစွာတိုက်ခိုက်ခဲ့သည်။
ခါမ်းပါတ်မြို့ကို ဇန်နဝါရီလ၁၆ရက်ည၊ ဇန်နဝါရီလ၂၀ရက်ည၊ ဇန်နဝါရီလ၂၁ရက်ည နှင့် ဇန်နဝါရီလ ၂၂ရက်နံနက်တွင် တိုက်ခိုက်ခြင်းဖြစ်သည်။ အဆိုပါ လေးကြိမ်တွင် ပေါင်၅၀၀ ဗုံးအပါအဝင် အင်အားပြင်းဗုံး ဆယ်လုံးထက်မနည်း ကြဲချခဲ့ကြောင်းဒေသခံများကပြောသည်။ ဒေသခံ ၄ ဦးသေဆုံးခဲ့ပြီးနေအိမ်အများအပြားပျက်စီးခဲ့သည်။
