ဟန်နွေ/People’s Spring
အာဏာသိမ်းစစ်ကောင်စီတပ်သား ၄ဦး ကရင်အမျိုးသားအစည်းအရုံး(KNU) ထံ ထပ်မံ အလင်းဝင်လာကြောင်း ကရင်သတင်းရင်းမြစ်က ပြောသည်။
ဖေဖော်ဝါရီ ၄ရက်တွင် စစ်ကောင်စီတပ်သားများသည် KNU တပ်မဟာ(၃) တပ်ရင်း(၉) နယ်မြေ တနေရာ၌ လက်နက်ခဲယမ်းများ ယူလာပြီး အလင်းဝင်လာခြင်းဖြစ်သည်ဟု သတင်းရင်းမြစ်က ပြောပြသည်။
Public Service Announcement
အလင်းဝင်လာသည့် စစ်ကောင်စီတပ်သား များသည် ခမရ(၅၈၄) ကော့သောင်းအခြေစိုက် တပ်ရင်းမှ ဖြစ်သည်ဟု သတင်းရင်းမြစ်က ပြောသည်။
ယခု စစ်ကောင်စီတပ်သားများ အလင်းဝင်လာသည့် KNU တပ်မဟာ(၃) တပ်ရင်း(၉)သည် KNU ညောင်လေးပင်ခရိုင် ကျောက်ကြီးမြို့နယ်အတွင်း ရှိသည့် တပ်ဖွဲ့ဖြစ်သည်။
အလင်းဝင်လာသည့်ဓာတ်ပုံမှတ်တမ်းအရစစ်ကောင်စီတပ်သား၄ဦး နှင့်အတူ လက်နက် ၃လက်နှင့်ကျည်များ ပါဝင်လာသည်ကိုတွေ့ရသည်။
အဆိုပါဖြစ်စဉ်နှင့်ပတ်သက်၍ KNU ဘက်က တရားဝင် သတင်းထုတ်ပြန်ခြင်းမရှိသေးဘဲ ဆက်လက်စုံစမ်းနေဆဲဖြစ်သည်။
KNU နယ်မြေများတွင် ရှေ့တန်းစစ်မြေပြင်ရောက် စစ်ကောင်စီတပ်သားများ အလင်းဝင်ရောက်မှုများ မကြာခဏ ဖြစ်ပေါ်လျက်ရှိပြီး KNU ဘက်ကလည်းလက်နက်ချ သည့် စစ်ကောင်စီတပ်သားများအတွက် လုံခြုံရေးအာမခံချက်ပေးထားသည့်အပြင် ထောက်ပံ့မှု၊ လက်နက်ပါလာမှုအပေါ်မူတည်၍ ဆုငွေပေးအပ်မှုများ ပြုလုပ်နေသည်။
KNUသည် ပြည်သူ့ကာကွယ်ရေးတပ်(PDF)များအပါအဝင် တော်လှန်ရေးအင်အားစုများနှင့်ပူးပေါင်းပြီး စစ်ကောင်စီ တပ်စခန်းများ တိုက်ခိုက်သိမ်းပိုက်မှုများ ပြုလုပ်ခဲ့ပြီးယခု ၂၀၂၅တွင် စစ်ရှိန်မြှင့်မည်ဟု အသိပေးထားသည်။ ထို့ကြောင့် စစ်ကောင်စီတပ်ဖွဲ့ဝင်များ ပြည်သူ့ဘက် ပူးပေါင်းရန် KNU ခေါင်းဆောင်များက တိုက်တွန်းနှိုးဆော်ထားသည်။
KNU လက်အောက်ရှိ ကော်ဘရာစစ်ကြောင်းက ဒေါနတောင်တွင် အောင်ဇေယျ စစ်ကြောင်းကိုဖြတ်တောက်ပိတ်ဆို့တိုက်ခိုက်နေရာ ၈ လအတွင်းအလင်းဝင်လာသော စစ်သား ၆၀ ခန့်ရှိပြီဖြစ်ကြောင်းကော်ဘရာစစ်ကြောင်း စစ်ဆင်ရေးမှူး ဗိုလ်မှူးစောဒါဘောက လူထုနွေဦးနှင့် သီးသန့်တွေ့ဆုံမေးမြန်းမှုတွင် ပြောကြားခဲ့သည်။
