တာရာ/People’s Spring
စစ်ကောင်စီ၏ ပြည်ပဆန်တင်ပို့မှု လေးလဆက်ကျဆင်းလာပြီး ဇန်နဝါရီလအတွင်းပြည်ပသို့ ဆန်တန်ချိန် ၂ သိန်းကျော်တင်ပို့နိုင်ခဲ့ကြောင်း မြန်မာနိုင်ငံဆန်စပါးအသင်းချုပ်ထံမှသိရသည်။
ထိုပမာဏာသည် ၂၀၂၄ခုနှစ် စက်တင်ဘာလမှစတင်ပြီး ခြောက်အတွင်း အနိမ့်ဆုံးတင်ပို့မှုဖြစ်ကြောင်း ပြည်ပဆန်တင်ပို့သည့် ကုန်သည်အချို့ကပြောသည်။
စစ်ကောင်စီသည် ၂၀၂၄ခုနှစ် အောက်တိုဘာလတွင် ပြည်ပသို့ ဆန်တန် ၄၂၀,၀၀၀ ကျော်တင်ပို့ခဲ့ပြီးနောက်ပိုင်းလစဥ် ဆန်တင်ပို့မှု ဆက်တိုက်ကျဆင်းလာခြင်းဖြစ်သည်။
Public Service Announcement
၂၀၂၄ ခုနှစ်ဒီဇင်ဘာလတွင် ဆန်တန်ချိန် ၃၃၀,၀၀၀ကျော် ၊ ၂၀၂၅ ဇန်နဝါရီလတွင် ဆန်တန်ချိန် ၂ သိန်းကျော်တင်ပို့နိုင်ခဲ့ခြင်းဖြစ်သည်။
ဇန်နဝါရီလတွင် ဆန်တင်ပို့မှုကြောင့်ဒေါ်လာ ၈၈ သန်းကျော်ရရှိခဲ့သည်ဟုလည်း ဆန်စပါးအသင်းချုပ်ကထုတ်ပြန်ထားသည်။ ထိုပမာဏသည် ၆လအတွင်း ဆန်တင်ပို့မှုမှ ရရှိငွေ အနည်းဆုံးပမာဏဖြစ်သည်။
“ဆန်ဈေးက ဈေးတက်ပြီး စပါးဈေးက ထိုးကျနေတာဆိုတော့ နောက်နှစ် စပါးစိုက်မယ့်သူရှိမယ် မထင်ဘူး။ ဒီကြားထဲပြည်ပကို ဒေါ်လာရဖို့ အခုလို ဆန်တွေလှိမ့်ပို့နေတာ ပြည်တွင်းမှ စားနပ်ရိက္ခာ အခက်အခဲဖြစ်လာနိုင်တယ်”ဟု ဆန်ကုန်သည်တစ်ဦးကပြောသည်။
ဒေါ်လာရရန်စစ်ကောင်စီ နှင့် ဆန်အသင်းကပြည်ပသို့ ရသမျှတင်ပို့ရောင်းချနေသော်လည်း
စပါးဈေးမှာ ယခင်နှစ်ကထက် ပိုမို ကျဆင်းလာသည်။ထို့အပြင် နိုင်ငံအနှံ တိုက်ပွဲများဖြစ်ပွားနေခြင်းကြောင့် နွေစပါးစိုက်ပျိုးသူများ လျော့နည်းသွားသည်ဟုလည်း ဆန်ကုန်သည်အချို့ကပြောသည်။
ပြည်တွင်း၌ စိုက်ပျိုးမှုလျော့ကျနေသော်လည်းစစ်ကောင်စီထိန်းချုပ်ထားသည့် မြန်မာနိုင်ငံဆန်စပါးအသင်းချုပ်က ၂၀၂၄ -၂၅ ဘဏ္ဍာနှစ်တွင် ပြည်ပသို့ ဆန်တန်ချိန် ၂ သန်းခွဲတင်ပို့ရန် စီစဉ်ထားပြီး လက်ရှိ ၂၀၂၄ ဧပြီ ၁ရက်မှ ၂၀၂၅ ဇန်နဝါရီလအထိ ၁၀ လအတွင်း ပြည်ပကို ဆန်တင်ပို့မှု တန်ချိန် ၂ ဒသမ ၄ သန်းတင်ပို့ထားသည်။
