ဆိုင်းမင်း/People’s Spring
စစ်ကိုင်းတိုင်းအထက်ပိုင်း အင်တော်မြို့ရဲ့ တစ်မိုင်ခန့်အကွာမှာရှိတဲ့ နဘားရွာစျေး ဖေဖော်ဝါ ရီ ၁၂ ရက် နေ့လယ် ၁၂ နာရီအချိန်က မီးလောင်ပြီး စျေး ရဲ့ သုံးပုံ နှစ်ပုံ မီးထဲပါသွားတယ်လို့ အင်းတော်ဒေသခံအချို့ဆီကသိရပါတယ်။
စျေးမီးလောင်တာက မီးကြွင်းမီးကျန်ကြောင့် ဖြစ်နိုင်တယ်လို့ အင်းတော်ဒေသခံက ပြောပါတယ်။အင်းတော်မြို့မှာတိုက်ပွဲ တွေ ဖြစ်ပွားချိန်ကတည်းက နဘားရွာကို မီးဖြတ်ထားတာကြောင့် လျှပ်စစ်မီး ကြောင့်မဖြစ်နိုင်ဘူးလို့ အဲဒီဒေသခံကဆိုပါတယ်။
စျေးရဲ့ သုံးပုံနှစ်ပုံ မီးလောင်သွားပြီး ကုန်စုံဆိုင်၊ လျှပ်စစ်ပစ္စည်းဆိုင်၊ ဆိုင်ကယ်အပိုပစ္စည်းဆိုင်၊ အထွေထွေလူသုံးကုန်ပစ္စည်းအရောင်းဆိုင်တွေအများစု မီးထဲပါသွားပြီလို့သိရပါတယ်။ နဘားရွာစျေးမှာ ဆိုင်ခန်း ၁၀၀ ခန့် ရှိတယ်လို့လည်းသိရပါတယ်။
Public Service Announcement
စျေးမီးလောင်ချိန် အချိန်မီ မီးငြိမ်းသတ်ဖို့ အမျိုးသားတွေရှိမနေတဲ့အတွက် မီးလောင်တဲ့ပမာဏများသွားတယ်လို့ ဒေသခံအချို့က ပြောပြပါတယ်။
နဘားရွာက အမျိုးသားလူငယ်အများစုဟာ နယ်မြေအခြေအနေအရ လုံခြုံမှုမရှိတော့တဲ့အတွက် ရွာကိုစွန့်ခွာသွားကြတယ်လို့ သိရပါတယ် ။
နဘားကျေးရွာနဲ့ တစ်မိုင်ခန့်သာဝေးတဲ့ အင်းတော်မြို့မှာလည်း မြို့သိမ်းတိုက်ပွဲဖြစ်ပွားနေပြီး မြို့အစွန်ရှိ ဂျပန်လှိုင်ဂူကုန်းကိုသာ တော်လှန်ရေးတပ်ဖွဲ့တွေက သိမ်းပိုက်ဖို့ ကျန်ရှိနေတာဖြစ်ပါတယ်။
