'/%3E%3C/svg%3E){kind=small}
စစ်ကိုင်းတိုင်း၊ ကနီမြို့နယ်အတွင်း ယနေ့(ဖေဖော်ဝါရီ ၁၈ရက်) နေ့လည်ပိုင်းတွင် စစ်ကောင်စီက ဂျက်ဖိုက်တာဖြင့်ရော၊ စက်တပ်လေထီးဖြင့်ပါ လေကြောင်းမှတိုက်ခိုက်သွားသည်။
ကနီမြို့နယ် နေရာ နှစ်နေရာကို တိုက်ခိုက်သွားခြင်းဖြစ်ပြီး အရပ်သားထိခိုက်မှုရှိသော်လည်း အတိအကျမသိရသေးကြောင်း ယင်းမာပင်ခရိုင်မှ ပြည်သူ့အုပ်ချုပ်ရေးအဖွဲ့ဝင်တစ်ဦးကပြောသည်။
“ဖိုက်တာရော စပ်တပ်လေထီးရော လာပစ်တာ။ ကျမတို့ ကနီမှာ ဘာတိုက်ပွဲမှမရှိဘဲနဲ့ လာပစ်နေတာပါ” ဟု ဒေသခံတစ်ဦးကပြောသည်။
Public Service Announcement
စစ်ကောင်စီ ပစ်မှတ်ထားတိုက်ခိုက်နေသည့် နေရာများသည် ချင်းတွင်းမြစ်ဆ်ိပ်ကမ်းနှင့် ပတ်ဝန်းကျင်ဒေသများဖြစ်သည်။ ဒေသခံများသည် ဗုံးခိုကျင်းများအတွင်း ပုန်းအောင်းနေကြရကြောင်း သတင်းရရှိသည်။
ယမန်နေ့(ဖေဖော်ဝါရီ ၁၇ရက်)နေ့လည်ပိုင်းတွင် မုဌောရွာအနီးချင်းတွင်းမြစ်ဆ်ိပ်ကမ်းတနေရာကို စစ်ကောင်စီက ဂျက်ဖိုက်တာဖြင့် လေကြောင်းမှတိုက်ခိုက်ရာ ခရီးသွားသံဃာတော်တစ်ပါးနှင့် အရပ်သားတစ်ဦး ဒဏ်ရာရရှိခဲ့သည်။ ဆိပ်ကမ်းအနီးရှိ ကားနှင့်မော်တော်အချို့ မီးလောင်ပျက်စီးခဲ့သည်။
ဖေဖော်ဝါရီ ၁၁ရက်နှင့် ဖေဖော်ဝါရီ ၇ရက်ကလည်း ကနီမြို့နယ်အတွင်း စစ်ကောင်စီက စက်တပ်လေထီးနှစ်စီးဖြင့် လေကြောင်းမှတိုက်ခိုက်ရာ အရပ်သား သုံးဦးသေဆုံးပြီး နေအိမ်အချို့ပျက်စီးခဲ့သည်။
ကနီမြို့နယ်သည် မုံရွာမြို့အခြေစိုက် အနောက်မြောက်တိုင်းစစ်ဌာနချုပ်(နမခ)နှင့် မဝေးသောကြောင့် လေကြောင်းအန္တရာယ်နှင့် စက်တပ်လေထီးအသုံးပြုတိုက်ခိုက်နိုင်သည့် ဖြစ်စဉ်မျိုးမကြာခဏကြုံတွေ့လာနိုင်ပြီး ဒေသခံပြည်သူများအနေဖြင့် အထူးသတိပြုနေထိုင်ကြရန် ကနီမြို့နယ်ပြည်သူ့ကာကွယ်ရေးအဖွဲ့က သတိပေးထားသည်။
