ဆိုင်းမင်း/People’s Spring
မန္တလေးမြို့မှာ စစ်တပ်လက်အောက်ခံ ပြည်သူ့စစ် ခေါ် ပျုစောထီးတွေ က လမ်းသွားလမ်းလာ အရပ်သားပြည်သူတွေကို ခြိမ်းခြောက်ပြီး လုယက်တာတွေ ပြီးခဲ့တဲ့ ရက်ပိုင်းအတွင်း ဖြစ်ပွားခဲ့တယ်လို့ ကြုံ့တွေ့ခဲ့ရသူတွေ ဆီကသိရပါတယ်။
မနက်အစောပိုင်းနဲ့ ညပိုင်းအချိန် မှာ အရပ်သားတွေကို ပြောက်ကျား ယူနီဖောင်းဝတ် အမျိုးသား ၅ ဦးခန့်ပါတဲ့ အဖွဲ့က လုံခြုံရေးအကြောင်းပြ တားဆီး စစ်ဆေးပြီး ဖုန်း ၊ ပိုက်ဆံ အတင်းအဓမ္မ တောင်းယူ ၊ လုယက်တာ လို့သိရပါတယ်။
မတ်လ ၁ ရက်က ချမ်းမြသာစည်မြို့နယ်ထဲမှာ သုံးဘီးယာဉ် စီးနင်းလာတဲ့ အမျိုးသမီး ငယ်တွေကို တားဆီးပြီး တယ်လီဖုန်း စစ်မယ်ဆိုကာ ဖုန်းတွေကို လုယူသွားတယ်လို့ ကြုံတွေ့ခဲ့ရတဲ့ အမျိုးသမီးငယ်က ပြောပြပါတယ်။
Public Service Announcement
” ဖုန်းတွေ တန်းစီထုတ်ခိုင်းပြီး ဟိုဘက်လှည့်နေဆိုပြီး ဖုန်းတွေ အကုန်သိမ်းပြီးပြေးသွားတာ”လို့ အဲဒီ အမျိုးသမီးငယ်က ပြောပါတယ်။
ဖေဖော်ဝါရီလကုန်ပိုင်းကလည်း ချမ်းမြသာစည်မြို့နယ်၊ အောင်ပင်လယ်ရပ်ကွက်မှာ မနက် ၆နာရီ ခန့်က ဆိုင်ကယ်စီး လူငယ် ၃ ဦးကို တားဆီးပြီး ဖုန်းတွေ တောင်းကာ လုယူမှု ဖြစ်ခဲ့ပါသေးတယ်။
” သူတို့က မတ်တူးကား ( Toyota Mark II)နဲ့ရောက်လာတာပဲ၊ ကားထဲမှာ ပြည်သူ့စစ်အကျီချိတ်ထားတာမြင်လိုက်တယ်” လို့ ကိုယ်တွေ့ကြုံခဲ့ရတဲ့ အသက် ၁၈ နှစ်အရွယ် လူငယ် က ပြောပါတယ်။
စစ်ကောင်စီရဲ့အလယ်ပိုင်းတိုင်းစစ်ဌာနချုပ်အခြေစိုက်ရာ မန္တလေးမြို့မှာ ပျုစောထီးလို့ လူသိများတဲ့ ပြည်သူ့စစ်တွေကို စစ်ကောင်စီကမွေးထုတ်နေပြီး လက်နက်တပ်ဆင်ပေးထားတာပါ။
ပျုစောထီးတွေကို ရပ်ရွာ ထဲ ကင်းပတ်စေတာ ၊ ရပ်ကွက်ရုံးတွေမှာ လုံခြုံရေးယူတာ ၊ လမ်းသွားလမ်းလာ အရပ်သားတွေကို စစ်ဆေးတာတွေ အထိ စစ်ကောင်စီက ခွင့်ပြုထားသလို မန္တလေးတိုင်း ၊မတ္တရာနယ်က တိုက်ပွဲတွေမှာလည်း အသုံးချတာရှိပါတယ်။
တဖက်မှာလည်းမန္တလေးမြို့ပေါ်က ဓားပြမှုတွေ မှာ ပျုစောထီးတွေ ပါဝင်နေတယ်ဆိုပြီး စစ်ကောင်စီ လက်အောက်ခံ ရဲတပ်ဖွဲ့က ပြန်လည်ဖမ်းဆီးရတဲ့ ဖြစ်စဉ်လည်းရှိနေပါတယ်။
ပြီးခဲ့တဲ့ ရက်သတ္တပတ်က ပုသိမ်ကြီးမြို့နယ် ၊ မဲကင်းကုန်ကျေးရွာရပ်ကွက်ရုံး က ပျုစောထီး ဒုခေါင်းဆောင် မှန်ကြီးဆိုသူကို ဓားပြမှုနဲ့ ရဲက ဖမ်းဆီးစစ်ဆေးခဲ့တာရှိပါတယ်။
