ကျော်ဇော/People’s Spring
ပဲခူးတိုင်း၊ အင်းမမြို့တွင် စစ်ကောင်စီက အဓမ္မတပ်သားသစ်စုဆောင်းပြီး ဖမ်းဆီးထိန်းသိမ်းထားသော ပြည်သူနှစ်ဦးကို မဟာမိတ်များနှင့်ပူးပေါင်းပြီး ကယ်ထုတ်နိုင်ခဲ့ကြောင်း သာယာဝတီခရိုင် တပ်ရင်း ၃၈၀၁၊ တပ်ခွဲ(၃)နတ်စစ်သည်တပ်ဖွဲ့မှ တပ်ခွဲမှူးက ပြောသည်။
မတ်လ ၁၅ရက်က ပြည်ခရိုင် အင်းမတပ် ဖြစ်သော တပ်မ (၆၆)မှ စုဆောင်းရေးဌာန၌ ထိန်းသိမ်းထားသော လူငယ်နှစ်ဦးအား ရွှေတောင် ပကဖ အကူအညီဖြင့် ချိတ်ဆက် ကယ်ထုတ်နိုင်ခဲ့ခြင်းဟု တပ်ခွဲမှူးက ပြောသည်။
စစ်ကောင်စီ၏ အတင်းအဓမ္မတပ်သားသစ်စုဆောင်းခံရသူနှစ်ဦးမှာ နတ်တလင်းမြို့နယ်မှဖြစ်ပြီး နတ်စစ်သည်တပ်ဖွဲ့ထံ ဆက်သွယ် အကူအညီတောင်းခံသဖြင့် ရွှေတောင် ပကဖနှင့်ပူးပေါင်းကာ စစ်ကောင်စီလက်မှ လွတ်အောင် ကယ်ထုတ်ခဲ့ရခြင်းဟု ဆိုသည်။
Public Service Announcement
“နတ်တလင်းက စုဆောင်းခံရသူက ကျွန်တော့ဖုန်းနံပါတ် သိပါတယ်။ သူအဆွဲခံရတော့ ဖုန်းဆက်ပါတယ်။ သူလစ်တဲ့အချိန်ပြေးမယ် ကူညီပေးဖို့ပြောပါတယ်။ သူပြေးတော့ အင်းမကဆိုတော့ အနီးဆုံးရှိတဲ့ တော် လှန်ရေးအဖွဲ့ ရွှေတောင် ပကဖ ဆီအကူညီတောင်းပြီး ခေါ်ခိုင်းတာပါ။ ပြီးတော့ ပကဖအဖွဲ့က ပြေးလာတဲ့သူနဲ့ ချိတ်ဆက်ပြီး ခေါ်ပါတယ်။ ပြီးတော့ ကျွန်တော့ဆီကို လမ်းတဝက်ပို့ပေးပါတယ်။ ကျွန်တော်တို့ သွားခေါ်ရပါတယ်”ဟု စစ်သင်တန်းပို့မခံရမီ ကယ်ထုတ်နိုင်ခဲ့သူနှစ်ဦးနှင့် ပတ်သက်ပြီး နတ်စစ်သည် တပ်ခွဲမှူးက လူထုနွေဦးသို့ ပြောသည်။
လက်ရှိတွင် အဆိုပါ တပ်သားသစ်စုဆောင်းခံရသူနှစ်ဦးမှာ တော်လှန်ရေးတပ်ဖွဲ့များ၏ အကူအညီဖြင့် ဘေးလွတ်ရာသို့ ရောက်ရှိနေပြီဖြစ်ပြီး ၎င်းတို့ဆန္ဒအရ တော်လှန်ရေးတွင်ပါဝင်နိုင်ရန် စီစဥ်လုပ်ဆောင်ပေးနေကြောင်း အထက်ပါ တပ်ခွဲမှူးက ဆက်ပြောသည်။
အလားတူ နတ်တလင်းမြို့နယ်ရှိ ပျူစောထီးအင်အားကောင်းသော ပျဥ်ပုံကျေးရွာမှ ပျူစောထီးအဖွဲ့ဝင်တစ်ဦးလည်း သေနတ်ကျည်များယူဆောင်၍ သာယာဝတီခရိုင် တပ်ရင်း ၃၈၀၁၊ တပ်ခွဲ(၃)နတ်စစ်သည်တပ်ဖွဲ့ထံ ယခုရက်ပိုင်းအတွင်း အလင်းဝင်ရောက်ခဲ့သေးသည်။
အဆိုပါ ပျူစောထီးအဖွဲ့ဝင်အဖြစ်မှ ပြည်သူ့ဘက်ပူးပေါင်း၍ အလင်းဝင်လာသော အမျိုး သားသည်လည်း လက်ရှိ စစ်အာဏာရှင်အမြစ်!ဖြတ်ချေမှူန်းရေး တော်လှန်ရေးကဏ္ဍတွင် ပါဝင်ဆောင်ရွက်ရန် ဆန္ဒရှိသဖြင့် ၎င်း ၏ဆန္ဒအတိုင်း ဆောင်ရွက်ခွင့်ရရန် စိစစ်လုပ်ဆောင်လျှက်ရှိကြောင်း နတ်စစ်သည်တပ်ဖွဲ့ထံမှ စုံစမ်းသိရသည်။
