မြေငလျင်ကြီးကြောင့် နေပြည်တော်၊ ပျဉ်းမနားတွင် သေဆုံးသူ၈၀ဦးကျော်လာပြီဖြစ်ကြောင်း ယနေ့ည ၉ နာရီအထိ အခြေအနေကိုဒေသခံများနှင့် လူမှုရေးအဖွဲ့များထံမှသတင်းရရှိသည်။
ပျဉ်းမနားမြို့၊ ဗိုလ်ချုပ်လမ်းတလျှောက်တွင် အပျက်အစီးအလွန်များပြားပြီး အဆောက်အဦးများစွာပြိုကျပျက်စီးနေကြောင်း မြို့ခံများကပြောသည်။
“ပြိုသွားတဲ့အိမ်တွေထဲမှာ လူတွေပိတ်မိနေတုန်းပဲ။ သေဆုံးသူတွေအရမ်းများပါတယ်။ ရေခဲတိုက်မှာ တန်းစီနေတာပဲ။ လမ်းပေါ်တွေမှာလည်း ရှိတယ်”ဟု ဒေသခံတစ်ဦးကပြောသည်။
Public Service Announcement
မတ် ၂၈ ရက်ည ၉နာရီအထိစာရင်းအရ ပျဉ်းမနားမြို့တွင် အင်အားကြီးငလျင်ကြီး လှုပ်ခတ်မှုကြောင့်သေဆုံးသူ ၈၀ကျော်ရှိပြီဟုကယ်ဆယ်ရေးလုပ်နေသူတစ်ဦးကပြောသည်။ ပျဥ်းမနားတစ်ခုတည်းတွင်ပင် သေဆုံးသူအရေအတွက်များ၍ နေပြည်တော်ကောင်စီနယ်မြေတစ်ခုလုံးဆိုပါက သေဆုံး သူများစွာတိုးလာနိုင်ကြောင်း ကယ်ဆယ်ရေးလုပ်ကိုင်နေသူအချို့ကပြောသည်။
နေပြည်တော်ရှိ စစ်ကောင်စီဝန်ထမ်းအိမ်ယာများလည်း ပြိုကျခဲ့သည်။
“ကန်ထရိုက်တိုက်တွေမခိုင်တော့တော်တော်လေးကိုအပျက်အစီးများတယ်။သေဆုံးတဲ့ကိန်းဂဏန်း ဖုန်းမနိုင်ဖိမရဖြစ်လာလိမ့်မယ်ထင်တယ်။ အခုညလည်း ဝန်ထမ်းတွေ လမ်းပေါ်တွေမှာနေကြရတယ်”ဟု ခရေဆောင်မှ ဝန်ထမ်းတစ်ဦးကပြောသည်။
ထို့အပြင်နေပြည်တော်လေဆိပ်ရှိလေကြောင်းထိန်သိမ်းရေးတာဝါကျိုးကျပြီး အမျိုးသမီးအချို့အပါအဝင် ၇ ဦးသေဆုံးကြောင်းလည်း လေဆိပ်နှင့်နီးစပ်သူတဦးကပြောသည်။ ငလျင်ကြောင့် ပြိုကျသွားသည့် နေအိမ်နှင့် အဆောက်အဦးများအတွင်း လူများပိတ်မိနေဆဲဖြစ်ပြီး ကယ်ဆယ်ရေးများ လုပ်ဆောင်နေဆဲဖြစ်သည်။
ထိုအပြင် ပျဉ်းမနားစိုက်ပျိုးရေးသိပ္ပံတွင် ကျောင်းအုပ်ကြီး ရုံးခန်းပြိုကျပြီး အောက်ထပ်တွင် စာစစ်နေသော ဆရာ ၊ဆရာမ များအပါအဝင် ၆ ဦးသေဆုံးပြီး ဒဏ်ရာရသူများရှိခဲ့သည်။ အပေါ်ထပ် ရုံးခန်းမှ ဒေါ်စန္ဒာဝင်းက ဦးခေါင်းပေါက်ဒဏ်ရာရခဲ့သည်။သေဆုံးသူများတွင် အဆောင်မှုးဒေါ်ခင်ဝင်းမြိုင်၊ ဦးသန်းလွင်၊ ဒေါ်နေခြည်လင်း တို့အပါအဝင် ၆ ဦးဖြစ်သည်။
ငလျင်ကြောင့် သေဆုံးသူ ၁၄၄ ဦးရှိပြီး၊ ထိခိုက်ဒဏ်ရာရသူ ၇၃၀ ကျော်ရှိ မြန်မာစစ်ခေါင်းဆောင်ရဲ့ မတ် ၂၈ ရက် ညပိုင်း ၈ နာရီ အချိန် မြန်မာငလျင်နဲ့ ပတ်သက်ပြီး ပြောကြားတဲ့ မိန့်ခွန်းအရ မြေငလျင်ကြောင့် နေပြည်တော်တွင် ၉၆ ယောက် ၊ စစ်ကိုင်းမြို့တွက် ၁၈ ယောက်နှင့် ကျောက်ဆည်မြို့မှာ ၃၀ ယောက် စုစုပေါင်း ၁၄၄ ယောက် သေဆုံးပြီး ၊၇၃၂ ဦး ဒဏ်ရာရခဲ့သည်ဟု အာဏာသိမ်းခေါင်းဆောင်က မတ် ၂၈ ရက်ညတွင် ပြောကြားခဲ့သည်။သို့သော် အာဏာသိမ်းခေါင်းဆောင်ပြောသောစာရင်းတွင် မြေငလျင်ကြီးကြောင့် သေဆုံးမှု ၊ပျက်စီးဆုံးရှုံးမှု အများဆုံးဖြစ်သော မန္တလေမြို့အပါအဝင် အခြားဒေသများမပါဝင်ပေ။ထိုအပြင် စစ်ကောင်စီက မြေငလျင်ပျက်စီးမှုကြောင့် မန္တလေး ၊စစ်ကိုင်း ၊နေပြည်တော် ၊ပဲခူး၊မကွေး ၊ ရှမ်းပြည်နယ် မြောက်ပိုင်းကို စစ်ကောင်စီက အရေးပေါ်အခြေအနေကြေညာပြီး ငလျင်လှုပ်ပြီးမှ ထိုဒေသများထဲမှ သုံးဒေသကို လေကြောင်းမှဗုံးကြဲခဲ့သည်။
