ဧပြီ ၁၊၂၀၂၅။ဒီဒီး/People’s Spring
အင်အားပြင်းငလျင်ဒဏ်ကြောင့် မန္တလေး၊အမရပူရနဲ့ စစ်ကိုင်းမြို့က ဗလီတွေပြိုကျလို့ အစ္စလာမ်ဘာသာဝင်တွေ သေဆုံးသူ ၆၀၀ခန့်အထိ ရှိလာတယ်လို့ အစ္စလာမ်သာသနာရေးရာကောင်စီ(မန္တလေး)က ဦးခင်မောင်သန်းက ပြောပါတယ်။
ငလျင်လှုပ်အပြီး လေးရက်မြောက်နေ့ မတ်လ ၃၁ရက်အထိ ရှာဖွေတွေ့ရှိသော စာရင်းတွေအရ အဲဒီ မြို့သုံးမြို့မှာ ဗလီပြိုကျမှုကြောင့် သေဆုံးသူ ၆၀၀ခန့်အထိ ရှိလာတယ်လို့ အစ္စလာမ်သာသနာရေးရာကောင်စီ(မန္တလေး)က ဦးခင်မောင်သန်းက ပြောပါတယ်။
မန္တလေးမြို့မှာ ဗလီ ၄၀ကျော်ရှိတဲ့အနက် ၃၀ကျော်မှာ ထိခိုက်ပျက်စီးခဲ့ပြီး ၁၀လုံးခန့်မှာ အလုံးစုံပြိုကျခဲ့တယ်လို့ ဦးခင်မောင်သန်းက ပြောပါတယ်။ အဲဒီ ဗလီတွေ ပြိုကျတာကြောင့် သေဆုံးသူ ၃၀၀ခန့်ရှိတယ်လို့လည်း ဦးခင်မောင်သန်းက ပြောပါတယ်။
Public Service Announcement
ဒါ့အပြင် အမရပူရမြို့နယ်က ဗလီပြိုကျမှုကြောင့် သေဆုံးသူ ၂၅၀အထိ ရှိနေတယ်လို့လည်း သူကဆက်ပြောပါတယ်။
စစ်ကိုင်မြို့မှာ ဗလီလေးလုံးရှိတဲ့အနက် သုံးလုံးပြိုကျခဲ့ရာ အဲဒီဗလီတွေ ပြိုကျမှုကြောင့် သေဆုံးသူ ၇၀ ရှိတယ်လို့လည်း ဦးခင်မောင်သန်းက ပြောပါတယ်။
စက်ယန္တရားတွေငှားရမ်းရလို့ ရှာဖွေကယ်ဆယ်ရေးလုပ်နိုင်ခဲ့ပြီး ရုပ်အလောင်းအနည်းငယ်သာ ကျန်ရှိတော့မယ်လို့လည်း ဦးခင်မောင်သန်းက သုံးသပ်ပါတယ်။
ငလျင်ဘေးကြောင့် ဒီနေ့(ဧပြီ ၁ရက်)အထိအတည်ပြုနိုင်တဲ့ သေဆုံးသူဦးရေ ၂,၃၉၅ဦးရှိပြီး လူဦးရေ ၈သန်းကျော်ဟာ ဘေးကြုံတွေ့နေရတယ်လို့ အမျိုးသားညီညွတ်ရေးအစိုးရ(NUG)၊လူသားချင်းစာနာထောက်ထားရေးနဲ့ ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)က ဒီနေ့ နံနက်ပိုင်းမှာ ထုတ်ပြန်ထားပါတယ်။
ငလျင်လှုပ်ပြီး ၄ရက်မြောက်နေ့ MOHADMရဲ့ နောက်ဆုံးထုတ်ပြန်ချက်မှာ ဖော်ပြထားတာဖြစ်ပါတယ်။
ဒါ့အပြင် ငလျင်ကြောင့် တိုက်ရိုက်ထိခိုက်ခံစားကြရတဲ့ လူဦးရေ စုစုပေါင်း ၈,၅၆၂,၅၅၅ ဦးခန့် ရှိတယ်လို့လည်း ထုတ်ပြန်ထားပါတယ်။
