■PNAသည်ဆုံးရှုံးထားသောနယ်မြေများကို ပြည်သူများခက်ခဲနေချိန်အခွင့်ကောင်းယူ၍ ထိုးစစ်ဆင်ရန် ကြေညာခြင်းဟု တော်လှန်ရေးတပ်များပြော
ဧပြီ ၆၊ ၂၀၂၅၊ ရဲခေါင်/People’s Spring
ရှမ်းပြည်တောင်ပိုင်း၊ ညောင်ရွှေမြို့နယ်ကို စစ်တပ်နှင့်ပူးပေါင်းပြီး စစ်ကြောင်းထိုးမည်ဟု စစ်ကောင်စီလက်အောက်ခံ PNA ပြည်သူ့စစ်က ယနေ့(ဧပြီ ၆ရက်)တွင် ကြေညာသည်။
ညောင်ရွှေမြို့နယ်သည် ငလျင်ဒဏ်ခံစားခဲ့ရသော ဒေသတစ်ခုဖြစ်ပြီး သေဆုံးသည့်ဒေသခံ လူဦးရေ ၁၀၀ ထက်မနည်းရှိသော်လည်း PNAပြည်သူ့စစ်သည် ၎င်းတို့ဆုံးရှုံးထားသော နယ်မြေများကို ပြည်သူများခက်ခဲနေချိန်အခွင့်ကောင်းယူ၍ ထိုးစစ်ဆင်ရန် ကြေညာခြင်းဟု တော်လှန်ရေးတပ်ဖွဲ့အချို့က ပြောသည်။
Public Service Announcement
စစ်ကောင်စီတပ်နှင့် PNAပြည်သူ့စစ် စစ်ကြောင်းထိုးမည့် ကျေးရွာများမှာ ညောင်ရွှေမြို့နယ်တောင်ပိုင်း၊ အင်းလေးဒေသအောက်ဘက်ခြမ်းရှိ စံကားကျေးရွာအုပ်စု၊ ထီခိုးရွာ၊ ရေပူရွာ၊ တောင်ပို့ကွဲရွာနှင့် ညောင်လေးပင်ကျေးရွာ တို့ပါဝင်သည်။
” စကစနဲ့PNO/PNAပူးပေါင်းအဖွဲ့တွေကို ကျနော်တို့တော်လှန်ရေးပူးပေါင်းအဖွဲ့တွေ တိုက်ထုတ်ခဲ့တဲ့ညောင်လေးပင်တိုက်ပွဲ ပြီးသည်အထိ ရွာအားလုံးမှာ ပြည်သူတွေ အေးအေး ဆေးဆေးကျနော်တို့နဲ့တသားတည်း နေခဲ့ကြတာပါ”ဟု အင်းလေးပြည်သူ့ကာကွယ်ရေးတပ်မတော်( အင်းလေး PDF) ၏ ပြောရေးဆိုခွင့်ရှိသူ ကိုအင်းသွေးနီက လူထုနွေဦးသို့ ပြောသည်။
PNAပြည်သူ့စစ်သည် ရေပူ၊အိမ်မူ၊နန်းတုပ်၊ ညောင်လေးပင်၊တောင်ပို့ကွဲ၊ကုန်းသာ၊ဟိုပန်၊ဘုရားတောင် စသည့်ကျေးရွာများအား တိုက်ပွဲဖြစ်ပွားခြင်းမရှိပဲ လေယာဉ်၊ လက်နက်ကြီးများဖြင့် အရပ်သားပစ်မှတ်ထား ရည်ရွယ်ချက်ရှိရှိ နေ့စဉ်ရက်ဆက်တိုက်ခိုက်နေသည်ဟု ၎င်းက ဆက်ပြောသည်။
ယခုနှစ် လဆန်းပိုင်းကစ၍ PNO၏ တပ်ရင်း (၁)နှင့်တပ်ရင်း (၇)တို့သည် ညောင်ရွှေမြို့နယ်၊ အင်းလေးဒေသ ရေပူကျေးရွာအနီးသို့ ထိုးစစ်ဆင်ရာတွင် ထိခိုက်သေဆုံးမှုများဖြင့် ပြန်လည်ဆုတ်ခွာခဲ့ရသည်။
“အခုလိုမျိုးကျနော်တို့ တော်လှန်ရေးတပ်ဖွဲ့တွေကို သောင်းကျန်းသူတွေကြောင့် ရွာသားတွေမနေရပါဘူးလို့ပြောနေလုပ်နေတာက သူတို့ရဲ့လုပ်ရိုးလုပ်စဉ်တွေပါပဲ”ဟု ရှမ်းပြည်တောင်ပိုင်းမှ ကာကွယ်ရေးတပ်ဖွဲ့ဝင်တစ်ဦးက PNA ပြည်သူ့စစ်၏ ကြေညာချက်ကို ရှင်းပြသည်။
PNA ပြည်သူ့စစ်သည် အင်းလေးဒေသရှိ အရပ်သားပြည်သူများအား တိုက်ခိုက်ခဲ့သတ်ဖြတ်ခဲ့မှုများကို စနစ်တကျမှတ်တမ်းတင်ပြုစုထားကြောင်းလည်း အင်းလေးလူထုလှုပ်ရှားမှုအဖွဲ့ တာဝန်ရှိသူက အသိပေးသည်။
” ဒီကိစ္စနဲ့ပတ်သက်ပြီး တစ်နေသူတို့တာဝန်ရှိသူတွေ ကျူးလွန်သူအနေနဲ့တာဝန်ယူရမှာပဲ ကျနော်တို့လည်း အရေးယူဆောင်ရွက်မှုတွေလုပ်မှာပါ”ဟု ၎င်းက ပြောသည်။
၂၀၂၂ ခုနှစ်ကစ၍ PNO/PNAပြည်သူ့စစ် သည် အာဏာသိမ်းစစ်တပ်နှင့် ပူးပေါင်းခဲ့ပြီး ၎င်း၏ နယ်မြေဖြစ်သည့် အထူးဒေသ(၆)မှ လူငယ်များကို အတင်းအဓမ္မပြည်သူ့စစ်အဖြစ်သွပ်သွင်းပြီး လူထုထံမှ ဆက်ကြေးများ ကောက်ယူလျက်ရှိသည်။
