ဧပြီ ၇၊၂၀၂၅။ရောင်နီ/People’s Spring
သင်္ကြန်မတိုင်ခင်တစ်လအလိုကတည်းက ပြင်ဆင်ခဲ့တဲ့ ရန်ကုန်မြို့တော်ဝန်သင်္ကြန်မဏ္ဍပ်ကို ဧပြီ ၆ ရက်မှာ စဖျက်နေတယ်လို့ ဒေသခံတွေက ပြောပါတယ်။
“ မနေ့က နေ့လည်လောက်က ကရိန်းကားတွေ ရောက်လာပြီး စဖျက်တာ” လို့ ဆူးလေဘုရားနားမှာ နေထိုင်သူတစ်ဦးက ပြောပါတယ်။
စစ်ကောင်စီက ရန်ကုန်မြို့တော်ဝန်သင်္ကြန်မဏ္ဍပ်ကို မတ်လဆန်းကတည်းက ဆောက်လုပ်ခဲ့တာဖြစ်ပြီး ငလျင်လှုပ်ပြီးပြည်သူတွေ ထောင်နဲ့ချီသေဆုံးချိန်မှာတောင် ဆက်ဆောက်နေခဲ့တာပါ။
Public Service Announcement
စစ်ကောင်စီက တစ်နိုင်ငံလုံး ဝမ်းနည်းကြေကွဲနေရချိန်ဖြစ်တာကြောင့် သင်္ကြန်ပွဲကိုအပျော်အပါးများမပါပဲ ရိုးရာယဉ်ကျေးမှုနှင့်အညီ ကျင်းပမယ်လို့ ဧပြီ ၁ရက်မှာ ထုတ်ပြန်ခဲ့ပေမယ့် နောက်ရက်မှာ မြို့တော်ဝန်မဏ္ဍပ်ဘေးက လမ်းလျှောက်သင်္ကြန်အတွက်ပါ ပြင်ဆင်မှုတွေပြုလုပ်ခဲ့တာပါ။
အခုမဏ္ဍပ်တွေဖျက်ခဲ့တာက စစ်ခေါင်းဆောင် ထိုင်းနိုင်ငံက ပြန်လာပြီး နောက်တစ်ရက်မှာမှ ဖျက်တာပါ။ ရန်ကုန်မြို့တော်ဝန်မဏ္ဍပ်နဲ့ လမ်းလျှောက်သင်္ကြန်အတွက် ပြင်ဆင်ထားတာတွေကိုပါ ဖျက်နေတာတွေ့ရပါတယ်။
ရန်ကုန်မြို့တော်ဝန်မဏ္ဍပ်ကို ဖျက်လိုက်ပေမယ့် ပြည်သူ့ရင်ပြင်ထဲက ဖျော်ဖြေရေးမဏ္ဍပ်ကြီးနဲ့ ရေကစားမဏ္ဍပ်တွေကိုတော့ ဒီကနေ့ ဧပြီ ၇ရက်အထိ မဖျက်သေးပါဘူး။
စစ်ကောင်စီက တိုင်းပြည်ပုံမှန်အခြေအနေရောက်ရှိနေတယ်လို့ ပြသချင်တာကြောင့် သင်္ကြန်အပါအဝင် လအလိုက်ပွဲတော်တွေကို စည်ကားအောင်ပြုလုပ်လေ့ရှိပါတယ်။
