ဧပြီ ၈၊၂၀၂၅.ဟန်နွေ/People’s Spring
အာဏာသိမ်းစစ်ကောင်စီက ယာယီအပစ်ရပ်ကြေညာသော်လည်း ထိုးစစ်ဆင်မှုများ၊ လေကြောင်း တိုက်ခိုက်မှုများ ဆက်တိုက်ပြုလုပ်နေသည့် လုပ်ရပ်မှာ စက်ဆုပ်စရာကောင်းကြောင်း ချင်းအမျိုးသားတပ်ဦး/ချင်းအမျိုးသားတပ်မတော်(CNF/CNA) ပြောရေးဆို ခွင့်ရှိသူ ဆလိုင်းထက်နီက ပြောသည်။
စစ်ကောင်စီသည် ဧပြီ ၂ရက်မှ ၂၂ရက်အထိ အပစ်ရပ်ကြေညာထားသော်လည်း CNA နှင့် ပူးပေါင်းတပ်များရှိသည့် ကလေး-ဂန့်ဂေါကြား ထိုးစစ်ဆင်နေသည်ဟု ဆလိုင်းထက်နီက ပြောသည်။
ထို့ပြင် နိုင်ငံတဝန်း လေကြောင်းတိုက်ခိုက်မှုများ ဆက်တိုက်ပြုလုပ်နေသည့်လုပ်ရပ်သည် ပြည်သူကို အရေးမစိုက်သည့် လုပ်ရပ်ဖြစ်ဟု ဆလိုင်းထက်နီက ပြောသည်။
Public Service Announcement
“စကစ အကြောင်းပြတာက ကျနော်တို့ အင်အားတည်ဆောက်နေတယ်ဆိုတာ အကြောင်းပြပြီး စစ်ရေး ဆက်လုပ်နေတာ”ဟု ဆလိုင်းထက်နီက ပြောသည်။
ထိုသို့ စစ်ကောင်စီက ထိုးစစ်ဆင်ခြင်း၊ လေကြောင်း တိုက်ခိုက်ခြင်းများသည် ငလျင်ဘေးဖြစ်နေချိန် အပစ်ရပ်ကြေညာထားသည့် တော်လှန်ရေးတပ်ဖွဲ့များအား အလစ်တိုက်ခိုက်ခြင်းဖြစ်နိုင်သကဲ့သို့ တော်လှန်ရေးတပ်ဖွဲ့များ တိုက်ခိုက်မလာနိုင်အောင် ကြိုကာခြင်းလည်းဖြစ်နိုင်သည်ဟု ၎င်းကပြောသည်။
“ဒါက စကစအနေနဲ့ သူတို့ အပစ်ရပ်ကြေညာတာကို သူတို့ ကိုယ်တိုင် ချိုးဖောက်တာပဲ။ ပြည်သူ့လုပ်ခြုံရေးထက် သူတို့ လုံခြုံရေးကို ပိုပြီး အရေးစိုက်တဲ့ အင်မတန် စက်ဆုပ်စရာ လုပ်ရပ်ပါပဲ။” ဟု ဆလိုင်းထက်နီက ပြောသည်။
စစ်ကောင်စီသည် ကချင်ပြည်နယ်၊ ဗန်းမော်၊ ဝိုင်းမော်ဘက်တွင်လည်း လေကြောင်းတိုက်ခိုက်ခြင်း၊ မြေပြင်ထိုးစစ်ဆင်ခြင်းများ ပြုလုပ်ခဲ့၍ တိုက်ပွဲများရှိခဲ့ပြီး စစ်ကောင်စီက အပစ်ရပ်ကြေညာမှုကို စည်းဖောက်သည့် လုပ်ရပ်ဟု ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ပြောကြားထားသည်။
အလားတူ ကရင်ပြည်နယ်၊ ဖာပွန်ခရိုင်အပါအဝင် KNU အုပ်ချုပ်နယ်မြေများသို့ လေကြောင်း တိုက်ခိုက်မှု၊ လက်နက်ကြီး ပစ်ခတ်မှုများ စစ်ကောင်စီက ဆက်လက်လုပ်ဆောင်ခဲ့ရာ စစ်ကောင်စီ၏ အပစ်ရပ်ကြေညာမှုသည် နိုင်ငံတကာ အသိအမှတ်ပြုခံရရေး အတွက်ဖြစ်ပြီး နိုင်ငံရေးစိတ်ဆန္ဒမရှိ၊ လူသားဆန်ခြင်းမရှိ၊ အပြောနှင့် အလုပ် လက်တွေ့ မကိုက်ညီသည်မှာထင်ရှားကြောင်း ကရင်အမျိုးသားအစည်းအရုံး(KNU) ဗဟိုက ထုတ်ပြန်ထားသည်။
အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနကလည်း စစ်ကောင်စီက အပစ်ရပ်ကြေညာပြီးနောက် စဉ့်ကူး၊ ကနီ၊ သပိတ်ကျဉ်း ၊ဟုမ္မလင်း၊ ညောင်ဦးဒေသများသို့ လေကြောင်းတိုက်ခိုက်ခြင်း၊ မြေပြင်ထိုးစစ်ဆင်ခြင်း ဖြစ်ရပ်များကို သတင်းထုတ်ပြန်ကာ စစ်ကောင်စီ၏ အပစ်ရပ်ကြေညာမှု လီဆယ်လှည့်ဖြားမှုသာ ဖြစ်ကြောင်း ထုတ်ပြန်ထားသည်။
