ဧပြီ ၁၀၊၂၀၂၅။ဇော်ရမ်း/People’s Spring
အင်းတော်မြို့ကို ဆုံးရှုံးပြီးနောက် တပ်မမှူးပါအဖမ်းခံထားရသည့် စစ်ကောင်စီတပ်က စစ်ကိုင်းတိုင်း၊ အင်းတော်၊ ကောလင်းနှင့် ဝန်းသိုမြို့နယ်အတွင်း လေကြောင်းတိုက်ခိုက်မှုများဆက်တိုက်ပြုလုပ်နေရာ ယနေ့ (ဧပြီ ၁၀ရက်) နေ့လယ်ပိုင်းတွင် ဝန်းသိုမြို့နယ်ရှိ ကျေးရွာတစ်ရွာနှင့် ကောလင်းမြို့နယ်ရှိ စာသင်ကျောင်းကို ဂျက်ဖိုက်တာဖြင့် ဗုံးကြဲတိုက်ခိုက်ပြန်သည်။
ကောလင်းမြို့နယ်၊ အင်ပင်လှကျေးရွာ စာသင်ကျောင်းနှင့် ဝန်းသိုမြို့နယ် ကျောက်ပါးစပ်ကျေးရွာကို နေ့လယ် ၁နာရီ ၄၀မိနစ်တွင် လေကြောင်းမှ တိုက်ခိုက်သွားခြင်းဖြစ်သည်။
” အင်ပင်လှက စာသင်ကျောင်း ရှိတယ်။ ကျောက်ပါးစပ်က မနေ့က လေကြောင်းတိုက်တဲ့ နမ်းခမ်းရွာနားက။ မနေ့က တိုက်တာကို ကယ်ဆယ်ရေးတောင် အကုန်မလုပ်နိုင်သေးဘူးလာပစ်တာ”ဟု ဒေသခံတစ်ဦးက ပြောသည်။
Public Service Announcement
အင်ပင်လှကျေးရွာ စာသင်ကျောင်းတိုက်ခိုက်ခံရမှုအတွင်း အရပ်သားသုံးဦး ဒဏ်ရာရရှိခဲ့သည်ဟု ဆိုသည်။
အင်းတော်မြို့ကို ဧပြီ ၇ရက်တွင် ကာကွယ်ရေးပူးပေါင်းတပ်များက တိုက်ခိုက်သိမ်းယူခဲ့ပြီး စစ်ကောင်စီ၏ တပ်မ(၇၇)တပ်မမှူး ဗိုလ်မှူးချုပ် အောင်သက်ဦးနှင့် စစ်သုံ့ပန်းအများအပြားကို ဖမ်းဆီးထားသည်။ ထို့နောက် စစ်ကောင်စီက လေကြောင်းမှ လာရောက်တိုက်ခိုက်နေပြီး ယမန်နေ့က ဝန်းသိုမြို့နယ်ရှိ နမ်းခမ်းရွာကို လေကြောင်းမှ ဗုံးကြဲတိုက်ခိုက်ရာ အမျိုးသမီးနှင့် ကလေးငယ်များအပါအဝင် အရပ်သား ၂၄ဦးသေဆုံးပြီး ဒဏ်ရာရသူများလည်းရှိကြောင်း သတင်းရရှိသည်။
စစ်ကောင်စီ၏ လေကြောင်းအန္တရာယ်ကို ကောလင်း၊ ဝန်းသိုနှင့် အင်းတော်တနယ်လုံး ဂရုစိုက်ကြရန် ကာကွယ်ရေးတပ်ဖွဲ့များက သတိပေးထားသည်။
