ထီးလင်းမြို့နယ်ကို စစ်ကောင်စီ လေကြောင်းမှ ဗုံးကြဲတိုက်ခိုက်

ဧပြီ ၁၅၊၂၀၂၅။ဟန်နွေ/People’s Spring

မကွေးတိုင်း၊ ယောဒေသ၊ ထီးလင်းမြို့နယ်တနေရာကို စစ်ကောင်စီက ယနေ့(ဧပြီ ၁၅ရက်)နံနက်တွင် လေကြောင်းမှ ဗုံးကြဲတိုက်ခိုက်ခဲ့ကြောင်း မြို့နယ်ပြည်သူ့ကာကွယ်ရေးအဖွဲ့ (ပကဖ) တာဝန်ရှိသူတဦးက ပြောသည်။

ထီးလင်းမြို့နယ်အရှေ့ဘက် တနေရာကို စစ်ကောင်စီက လေကြောင်း တိုက်ခိုက်ခဲ့ခြင်းဖြစ်ပြီး စစ်ကောင်စီက ဖုန်းလိုင်းများ ဖြတ်တောက်ထား၍ ထိခိုက်မှုနှင့် ဖြစ်စဉ်အသေးစိတ် မသိရသေးဟုဆိုသည်။

တိုက်ပွဲဖြစ်ပွားခြင်းမရှိဘဲ လေကြောင်း တိုက်ခိုက်လာခြင်းဖြစ်ကြောင်းလည်း ပကဖ တာဝန်ရှိသူက ပြောသည်။

Public Service Announcement

“ကျေးရွာအနီးအနားတော့ မဟုတ်လောက်ဘူးလို့ ယူဆတယ်ဗျ။ တိုက်ပွဲကတော့ မရှိပါဘူး။ဗျ။ တော်လှန်ရေးအင်အားစုတွေ လှုပ်ရှားမှုကို သတင်းရလို့ပဲ နေမှာပါ”ဟု ပကဖ တာဝန်ရှိသူက ပြောသည်။

စစ်ကောင်စီက ဧပြီ ၂၂ရက်ထိ ယာယီအပစ်ရပ်မည်ဟု ကြေညာထားသော်လည်း လေကြောင်း တိုက်ခိုက်မှုများ နိုင်ငံတဝန်းဆက်လက်ပြုလုပ်လျက်ရှိသည်။

“သူတို့ ကြေညာချက်တော့ အယုံအကြည်မရှိပါဘူးဗျ”ဟု ထီးလင်းမြို့နယ် ပကဖ တာဝန်ရှိသူက ပြောသည်။

စစ်ကောင်စီသည် မကွေးတိုင်းနှင့် နယ်မြေခြင်း ဆက်စပ်နေသည့် ချင်းပြည်နယ် မင်းတပ် ၊ ကန်ပက်လက်မြို့နယ်များကိုလည်း လေကြောင်း ဗုံးကြဲတိုက်ခိုက်မှုများ ဆက်တိုက်ပြုလုပ်လျက်ရှိသည်။

ထို့အပြင် ချင်းပြည်နယ်၊ မင်းတပ်မြို့ကို စစ်ကောင်စီက ပြီးခဲ့သည့် ရက်ပိုင်းအတွင်း လေကြောင်း တိုက်ခိုက်မှုများ ပြုလုပ်ခဲ့ရာ ဧပြီ ၁၃ရက်က လေကြောင်းတိုက်ခိုက်မှုတွင် အလွန်ပြင်းထန်သည့်ဗုံးဖြင့် တိုက်ခိုက်ခဲခြင်းဟု မင်းတပ်မြို့နယ်ပြည်သူ့အုပ်ချုပ်ရေးအဖွဲ့တာဝန်ရှိသူ ဆလိုင်းယောမာန်က လူမှုကွန်ရက်မှတဆင့် ဧပြီ၁၄ရက်တွင် အသိပေးသည်။

တော်လှန်ရေးကာလအတွင်း ဗုံးကြဲတိုက်ခိုက်ခံရသည့် ဖြစ်စဉ်ကို မနီးမဝေးမှ လေးကြိမ် ကြုံဖူးကြောင်း ဆလိုင်းယောမာန်က ပြောသည်။

” မြို့သိမ်းကာလတုန်းကဆိုဗုံးကြဲတာဘာပြောကောင်းမလဲ။ လေကြောင်းတိုက်ခိုက်မှုဆိုတာ နေသားတောင် ကျနေပြီ။အခုထိတော့ အသက်ရှင်နေဆဲငါမသေဘူး ရေကူးတတ်တယ်ပေါ့။ ဒါပေမဲ့မနေ့က ကြဲတဲ့ဗုံးကတော့ မကြုံဖူးအောင်ပြင်းထန်တယ်။ကိုယ်တောင် ဗုံးကွဲတဲ့အရှိန်ဟပ်တာမှာ ယိုင်လဲသွားမတတ်ဘဲ။ဗုံးတည့်တည့်ကျတဲ့အိမ်က အိမ်တိုင်တောင်မကျန်၊ ဘာအစအနမှ မကျန်ဘဲ ပျောက်သွားတယ်။တစ်မိုင်နီးပါးဝေးတဲ့ အိမ်က မှန်တွေတောင် ကွဲကျကုန်တယ်”ဟု ဆလိုင်းယောမန်က ဗုံးကြဲတိုက်ခိုက်ခံရမှု အတွေ့အကြုံကို ပြောသည်။

ဧပြီ ၁၃ရက် သင်္ကြန်အကြိုနေ့ နေ့လည် ၄ နာရီဝန်းကျင်တွင် စစ်ကောင်စီက မင်းတပ်မြို့မနှစ်ခြင်းခရစ်ယာန်ဘုရားကျောင်းဝင်းကို လေကြောင်းဖြင့် ဗုံးကြဲတိုက်ခိုက်ခဲ့ရာ ယင်းဖြစ်စဉ်၌ ထိခိုက်ဒဏ်ရာရသူ၊ သေဆုံးသူ မရှိသော်လည်း ဘုရားကျောင်းဝင်းအတွင်းရှိ အဆောက်အဦများ အကြီးအကျယ်ပျက်စီးကာ ခရိုင်ပညာရေးရုံးနှင့်တကွ တစ်မြို့လုံးရှိ လူနေအိမ်၊ ရုံးနှင့် ဝန်ထမ်းအိမ်ရာ အဆောက်အဦများ အနည်းနှင့်အများ ထိခိုက်ပျက်စီးမှုများ ရှိခဲ့ကြောင်း ဖော်ပြသည်။

ဧပြီ ၉ရက်ညပိုင်းကလည်း မင်းတပ်မြို့နယ်၊ ဖွီကျေးရွာသို့ စစ်ကောင်စီက ၂ ကြိမ်တိုင်တိုင် လေကြောင်းဖြင့် ဗုံးကြဲတိုက်ခိုက်ခဲ့ရာ ဒေသခံ ပြည်သူ ၆ ဦးသေဆုံးကာ ဒဏ်ရာရသူ ၁၀ဦး ရှိခဲ့ဟု အသိပေးသည်။