ဧပြီ ၂၃၊၂၀၂၅။မိထက်/People’s Spring
မန္တလေးတိုင်း၊ ညောင်ဦးမြို့တွင် ယနေ့(ဧပြီ ၂၃ရက်) နေခင်း ၁၂နာရီခန့်က ဧရာဝတီမြစ်အတွင်း ရေဆင်းချိုးသည့် ကလေးလေးဦး ရေနစ်သေဆုံးခဲ့မှုဖြစ်ပွားခဲ့သည်။
ညောင်ဦးမြို့၊ အမှတ်(၁)ရပ်ကွက်၊ ရုံးညောင်ပင်စက်လှေဆိပ်တွင် အဆိုပါဖြစ်စဉ်ဖြစ်ပွားခြင်းဖြစ်သည်။
” ပူတော့ မြစ်ထဲဆင်းပြီးရေကူးတာ။ လေးဦးစလုံးရေနစ်သွားတာ။ ဘေးပတ်ဝန်းကျင်ကလည်း ချက်ချင်းမသိလိုက်ဘူး။ နစ်ပြီးတော့မှ သိတာ။ ကလေးတွေက လူပျိုပေါက်တွေ”ဟု ညောင်ဦးဒေသခံတစ်ဦးက ပြောသည်။
Public Service Announcement
ရေနစ်သည့်နေရာသို့ ဒေသခံလူမှုကူညီရေးအဖွဲ့များနှင့် ညောင်ဦးမြို့နယ်မီးသတ်တပ်ဖွဲ့မှ လာရောက်၍လုပ်ဆောင်ခဲ့ပြီး နေ့လယ် ၁၂နာရီ၄၀မိနစ်မှ မွန်းလွဲ ၂နာရီ ၄မိနစ်အတွင်း ရုပ်လောင်းလေးခုစလုံး ဆယ်ယူနိုင်ခဲ့ကြောင်း မီးသတ်တပ်ဖွဲ့ကထုတ်ပြန်ထားသည်။ သေဆုံးသူလေးဦးမှာ အသက်(၁၃)နှစ်မှ (၁၇)နှစ်အရွယ်ကြားဖြစ်သည်။
ဒေသတချို့တွင် ယခုရက်ပိုင်း နေရာကွက်မိုးကြီးမှုနှင့်အတူ မြစ်ရေချောင်းရေများ ရုတ်တရက်မြင့်တက်လာနိုင်၍ မြစ်ဆိပ်များတွင် ရေကူးခြင်း၊ အဝတ်လျှော်ခြင်းတို့ကို ဂရုစိုက်ကြရန် ညောင်ဦးမြို့ခံတစ်ဦးက ပြောသည်။
