မေ ၉ ၊၂၀၂၅/People’s Spring
ကရင်အမျိုးသားအစည်းအရုံး(KNU)၊ ကော်သူးလေအုပ်ချုပ်နယ်မြေ၊ ဘားအံခရိုင် ၊ ပိုင်ကျုံမြို့ရှိ စစ်ကောင်စီ၏ အမှတ်(၂၄)ခြေလျင်တပ်ရင်း အခြေချတပ်စွဲထားသော လေးပနာဒီ (ခေါ်)တခေါ်ဘီခွီး တပ်စခန်းအား ကရင်အမျိုးသားလွတ်မြောက်ရေးတပ်မတော် (KNLA)ပူးပေါင်းတပ်များက ယနေ့(မေ ၉ရက်) နံနက်တွင် သိမ်းပိုက်ခဲ့ကြောင်း KNUက ထုတ်ပြန်သည်။
တပ်မဟာ(၇)လက်အောက်ခံ ကရင်အမျိုးသားလွတ်မြောက်ရေးတပ်မတော် (KNLA)နှင့် ကရင်အမျိုးသားကာကွယ်ရေးတပ်ဖွဲ့ (KNDO)တို့က ယနေ့ နံနက် ၉နာရီတွင် အပြီးသတ်တိုက်ခိုက်သိမ်းပိုက်ရှင်းလင်းခဲ့သည်ဟု ဖော်ပြထားသည်။
အဆိုပါတပ်စခန်းအား မေလ ၇ရက်က စတင်တိုက်ခိုက်ခဲ့ပြီး ၂ ရက်အကြာတွင် စစ်ကောင်စီတပ်ဖွဲ့ဝင်များက စခန်းစွန့်ခွာထွက်ပြေးသွားကြကြောင်း ကရင်စစ်ရေးသတင်းရင်းမြစ်က ပြောသည်။
Public Service Announcement
ထို့အပြင် ဒီကနေ့ နံနက်ကလည်း ပဲခူးတိုင်း၊ ရွှေကျင်မြို့နယ်ရှိ စစ်ကောင်စီ၏ အမှတ်(၅၉၈) ခြေမြန်တပ်ရင်း( ခမရ-၅၉၈)အား တော်လှန်ရေးပူးပေါင်းတပ်များက တိုက်ခိုက်သိမ်းပိုက်ခဲ့ရာ စစ်ကောင်စီတပ်ဖွဲ့ဝင်၂ဝထက်မနည်းသေဆုံးကြောင်း ဒေသခံများနှင့် စစ်ရေးသတင်းရင်းမြစ်များကပြောသည်။
ရွှေကျင်မြို့နယ်ရှိ စစ်ကောင်စီတပ်စခန်းအချို့ကို မတ်လတတိယလပတ်အတွင်း စတင်တိုက်ခိုက်ခဲ့ပြီးနောက် ခမရ(၅၉၈)တပ်ရင်းကိုလည်း တိုက်ခိုက်ခဲ့ကြောင်း၊ ယမန်နေ့(မေလ ၈ရက်)ညက စခန်းသိမ်းတိုက်ပွဲအတွက် ထိုးစစ်ဆင်ခဲ့ပြီး ယနေ့ နံနက်ပိုင်းတွင် သိမ်းယူလိုက်ခြင်းဟု စစ်ရေးသတင်းရင်းမြစ်ကပြောသည်။
” စခန်းက ကျသွားပါပြီ။ ရဲဘော်တွေ လက်ထဲရောက်နေပါပြီ။ လေကြောင်းအန္တရာယ်ကြားကနေ လိုက်ရှင်းနေရတာ”ဟု ရွှေကျင်မြို့မှ စစ်ရေးသတင်းရင်းမြစ်က ပြောသည်။
ယမန်နေ့ညက တိုက်ပွဲမှာ အလွန်ပြင်းထန်ခဲ့ပြီး လက်နက်ကြီး၊ လက်နက်ငယ် ပစ်ခတ်သံများကို ဒိုက်ဦးမြို့ပေါ်မှကြားခဲ့ရသလို ပေါက်ကွဲသည့် မီးတောက်များကိုလည်း မြင်တွေ့ခဲ့ရကြောင်း ဒိုက်ဦးမြို့ခံတစ်ဦးက ပြောသည်။
ခမရ(၅၉၈)တပ်ရင်း စခန်းသိမ်းတိုက်ပွဲအတွင်း စစ်ကောင်စီတပ်ဖွဲ့ဝင် ၂၀ကျော်သေဆုံးခဲ့ပြီး ကရင်အမျိုးသားလွတ်မြောက်ရေးတပ်မတော်(KNLA)ဦးဆောင်သည့် ပူးပေါင်းတပ်တွင်လည်း ထိခိုက်ကျဆုံးမှုအချို့ရှိကြောင်း ကာကွယ်ရေးရဲဘော်တစ်ဦးက ပြောသည်။
