ကချင်နှင့် တအာင်း လူထုအကြားငြိမ်းချမ်းစွာ အတူယှဉ်တွဲနေထိုင်ရေး ဆောင်ရွက်ခဲ့သူဟုဖော်ပြ
မေ ၁၇၊၂၀၂၅။ထားမြတ်/People’s Spring
ကချင်လွတ်လပ်ရေးအဖွဲ(KIO) ဥက္ကဋ္ဌဟောင်း ဦးဇောင်းဟရား ကွယ်လွန်ခြင်းအပေါ် ဝမ်းနည်းကြောင်း တအာင်းတပ်မတော်(PSLF/TNLA)က သဝဏ်လွှာပေးပို့ခဲ့သည်။
အသက်(၈၇)နှစ်အရွယ် ဦးဇောင်းဟရားသည် မေလ (၁၅)ရက်တွင် ကွယ်လွန်ခဲ့ရာ မဟာမိတ် တော်လှန်ရေးတပ်များက ဝမ်းနည်းကြောင်း သဝဏ်လွှာပေးပို့ခဲ့ရာ လတ်တလော KIO/KIAနှင့် မြေပြင် ပြဿနာအချို့ ဖြစ်နေသည့် TNLA ကလည်း မဟာမိတ်KIOနှင့် ဥက္ကဌ၏ မိသားစုဝင်များနှင့်ထပ်တူ ဝမ်းနည်းရဟု ဖော်ပြခဲ့သည်။
Public Service Announcement
ဥက္ကဌ၏ ဦးဇောင်းဟရားသည် ကချင်လူမျိုးများအတွက် ပေးဆပ်မှုဖြင့်သာ အလုပ်လုပ်ခဲ့သူတစ်ဦးဖြစ်ပြီး လူငယ်မျိုးဆက်သစ်များအတွက် အတုယူဖွယ် စံပြခေါင်းဆောင်တစ်ဦးလည်း ဖြစ်ကြောင်း၊ ဥက္ကဌသည် ကွယ်လွန်သွားပြီဖြစ်သော တအာင်းခေါင်းဆောင် ဥက္ကဌတားခွန်သောင်းတိုနှင့်အတူ ကချင်လူထုနှင့် တအာင်းလူထုများ ငြိမ်းချမ်းစွာအတူယှဉ်တွဲနေထိုင်ရေး၊ ပူးပေါင်းဆောင်ရွက်ရေး၊ ဘဝတူမဟာမိတ်အဖြစ် အဓွန့်တည်ရှည်စွာ ရပ်တည်သွားရေးတိုအတွက် ဆောင်ရွက်ခဲ့သူတစ်ဦးဖြစ်ဟု ဖော်ပြသည်။
ထို့ပြင် ၁၉၇၆ခု ကချင်နှင့် တအာင်းတို ထာဝရမဟာမိတ်ပြုစာချုပ်တွင် လက်မှတ်ရေးထိုးရာ၌လည်း KIO၏ အထွေထွေအတွင်းရေးမှူးအနေဖြင့် သဘောတူလက်မှတ်ရေးထိုးခဲ့သူလည်းဖြစ်ကြောင်း သဝဏ်လွှာပေးပို့သည်။
ဥက္ကဌ၏ တော်လှန်ရေးအပေါ် သစ္စာရှိမှု၊ စွမ်းဆောင်မှု၊ တည်ကြည်မှုတိုကို မိမိတိုမှ တန်ဖိုးထား ဂုဏ်ယူကာအစဉ်အောက်မေ့သတိရနေမည်ဖြစ်ပြီး ဥက္ကဌမှ ယခုကဲသို လူသားတိုင်း မလွန်ဆန်နိုင်သည့်တမလွန်ခရီးအား စစ်အာဏာရှင်စနစ်အကုန်အစင် မချုပ်ငြိမ်းသေးမီ ထွက်သွားရသည့်အပေါ် ဝမ်းနည်းရပါ ကြောင်း TNLA၏ သဝဏ်လွှာ၌ ပါရှိသည်။
လက်ရှိတွင် KIOနှင့် TNLA ဗဟိုအဆင့်ခေါင်းဆောင်များသည်လည်း ယခုနှစ်ဆန်းပိုင်းက ရှမ်းမြောက်ဒေသ၌ ဖြစ်ပွားခဲ့သည့် နယ်မြေဆိုင်ရာ ပြဿနာအချို့ အပါအဝင် အောက်ခြေတပ်များအကြား ပြဿနာများကို ဆွေးနွေးညှိနှိုင်းအဖြေရှာနိုင်ရေး တွေ့ဆုံဆွေးနွေးရန် ပြင်ဆင်လျက်ရှိသည်ဟု နှစ်ဖက်အဖွဲ့က ထုတ်ပြန် အသိပေးထားသည်။
KIO/KIA ၏ မဟာမိတ်ဖြစ်သကဲ့သို့လက်ရှိစစ်ကောင်စီကို တိုက်ခိုက်သည့် စစ်ဆင်ရေးများ အတူဆင်နွှဲနေသည့် မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ် တပ်ဦး (ABSDF)ကလည်း KIOဥက္ကဋ္ဌဟောင်း ကွယ်လွန်မှုအပေါ် ဝမ်းနည်းကြောင်း သဝဏ်လွှာပေးပို့ခဲ့ရာ စစ်အာဏာရှင်စနစ်အမြစ်ပြတ်ချေမှုန်းရေးအတွက် နွေဦးတော်လှန်ရေးကာလတွင် လူမျိုးပေါင်းစုံ ပြည်သူ တရပ်လုံးတိုက်ပွဲဝင်နေချိန် ယခုကဲ့သို့ကွယ်လွန်ဆုံးပါးသွား၍ နှမျောတသစွာ အလေးအမြတ်ပြုကြောင်း ဖော်ပြသည်။
