မေ ၂၀၊၂၀၂၅။ရဲခေါင်/People’s Spring
မကွေးတိုင်း၊ မြိုင်မြို့နယ်ရှိ ဗဟင်းကျေးရွာကို စစ်ကောင်စီ လေကြောင်းမှ ဗုံးကြဲတိုက်ခိုက်ရာ ဒေသခံပြည်သူနှင့် ရဲဘော် စုစုပေါင်း ခုနစ်ဦးခန့် သေဆုံးကြောင်း သတင်းရရှိသည်။
ယနေ့(မေလ ၂၀ရက်) ညနေ ၅နာရီခွဲခန့်က စစ်ကောင်စီ၏ လေကြောင်းဗုံးကြဲမှုသည် ဗဟင်းရွာရှိ ထမင်းဆိုင် ကို ပစ်မှတ်ထားခဲ့ခြင်းဟု ဒေသတွင်း သတင်းရင်းမြစ်အချို့က ဆိုသည်။
“စကစဟာ လေယာဥ်နဲ့ တိုက်ခိုက်တဲ့နေရာမှာ လူတွေကို လှည့်ဖျားမှုလုပ်ပြီး တိုက်ခိုက်လာနေတာကို တွေ့ရပါတယ်ဗျ။ယနေ့ မြိုင်နယ်ကိုလေကြောင်းတိုက်ခိုက်ခဲ့တဲ့ JF တစ်စီးဟာ တံတားဦးလေတပ်မှ ညနေ ၄နာရီ ၅၅မိနစ်တွင် တက်လာပြီး ချောင်းဦး -ဆားလင်းကြီး-ပုလဲ- ပုံတောင်-ထီးလင်း အထိ ပျံဝဲပြီး ဘယ်မှမချခဲ့ဘဲ ပြန်လာပြီး မြိုင်နယ်ရောက်မှသာ တိုက်ခိုက်မှု ပြုလုပ်တာကို တွေ့ရပါတယ်”ဟု အညာမြေအရပ်ဖက်လူမှုအဖွဲ့အစည်း-မြိုင်က ထုတ်ပြန်ထားသည်။
Public Service Announcement
ဗုံးကြဲခံရသည့်နေရာသည် လူစည်ကားသည့်နေရာဖြစ်သည့်အတွက် လူသေဆုံးမှုများရှိခဲ့ကြောင်းလည်း ဆိုသည်။
“ငါ့ညီတွေရာ ဘယ်လိုဖြစ်ရတာလဲ။ကျန်းမာရေးမကောင်းလို့ ငါ့မှာ ဆေးကုနေရပါတယ်ဆိုမှ မင်းတို့က Air Strikeလုပ်ခံရပြီး ကျသွားတယ်တဲ့ကွာ။ တို့တရင်းတည်းတင် လေးယောက်ကျတာ အတော်ဆိုးရွားတဲ့အဖြစ်အပျက်ပါပဲ။ငါ ဒီနေ့ကိုဘယ်တော့မှမမေ့ဘူး”ဟု ပခုက္ကူခရိုင်တပ်ရင်း(၁၂)မှ တာဝန်ရှိသူ ကိုနှင်းရိပ်နွေက ၎င်း၏ လူမှုကွန်ရက်တွင် ဗဟင်းရွာလေကြောင်းတိုက်ခိုက်ခံရသည့်ဖြစ်စဥ်အပေါ် ရေးသားထားသည်။
ထို့အပြင် ထမင်းဆိုင်ပိုင်ရှင်ဇနီးမောင်နှံနှစ်ဦးလည်း သေဆုံးခဲ့ရကြောင်း ဒေသတွင်း အခြားသတင်းရင်းမြစ်တစ်ဦးက ပြောသည်။ယနေ့ လေကြောင်းတိုက်ခိုက်ခံရမှုသည် စစ်ကောင်စီ၏ မြေပြင်သတင်းပေးကြောင့်ဟုလည်း ၎င်းက သုံးသပ်သည်။
လေကြောင်းတိုက်ခိုက်မှုကြောင့် သေဆုံးခဲ့ရသည့် ရဲဘော်အရေအတွက်နှင့် မည့်သည့်တပ်ဖွဲ့က ြဖစ်သည်ကို စုံစမ်းနေဆဲဖြစ်သည်။
စစ်ကောင်စီသည် နိုင်ငံတဝန်းတိုက်ပွဲများ၌ အထိနာနေသည့် အခြေအနေတွင် မကွေး၊ စစ်ကိုင်းတိုင်းအပါအဝင် နိုင်ငံတဝန်း ပြည်သူလူထု နေထိုင်ရာ နေရာများ၊ စာသင်ကျောင်း၊ ကျန်းမာရေးနှင့် ဘာသာရေးဆိုင်ရာ အဆောက်အဦများကို ပစ်မှတ်ထား လေကြောင်းတိုက်ခိုက်မှု၊ လက်နက်ကြီး၊ ဒရုန်း တိုက်ခိုက်မှုများ ဆက်တိုက်ပြုလုပ်လျက်ရှိရာ ပြည်သူလူထုသေဆုံးထိခိုက်မှုများ မကြာခဏ ဖြစ်နေသည်။
ယခု မေလအတွင်း စစ်ကိုင်း၊မန္တလေး၊မကွေး၊ပဲခူး၊ရခိုင်၊ ကချင်၊ရှမ်းမြောက်နှင့်ရှမ်းတောင်ဒေသတို့၌ စစ်ကောင်စီ၏ လေကြောင်းတိုက်ခိုက်မှုများ ပိုမိုပြုလုပ်လာ၍ အစုလိုက်၊အပြုံလိုက် သေဆုံးထိခိုက်ခဲ့ရမှု ဖြစ်စဉ်များရှိခဲ့ပြီး ကလေးငယ်များအပါအဝင် ပြည်သူသေဆုံးထိခိုက်မှုများ မြင့်တက်နေသည်။
